Pika (NSS) - နိုဝင်ဘာ ၇

အမေရိကန်နိုင်ငံ တက္ကဆက်ပြည်နယ်မှအမျိုးသားတစ်ဦးသည် ကွယ်လွန်သွားပြီဖြစ်သော ပေါ့ပ်စတား Selena Quintanilla နှင့်ပတ်သက်သည့် အမှတ်တရစရာပစ္စည်း(၁၃၀၈)ခုကို စုဆောင်းခဲ့ပြီးနောက် ကမ္ဘာ့ဂင်းနစ်စံချိန်ချိုးဖျက်နိုင်ခဲ့ကြောင်း သိရသည်။

Lake Jackson မြို့တွင်နေထိုင်သော အန်ဒရူးလွန်ဂိုရီးယားဆိုသည့် အမျိုးသားသည် ပေါ့ပ်စတား Selena Quintanilla နှင့်ပတ်သက်သည့် အမှတ်တရစရာပစ္စည်း(၁၃၀၈)ခုကို စုဆောင်းခဲ့ပြီးနောက် အထောက်အထားများကို ကမ္ဘာ့ဂင်းနစ်စံချိန်မှတ်တမ်းအဖွဲ့သို့ တင်ပြခဲ့ခြင်းဖြစ်ကြောင်းသိရသည်။ထို့နောက် ကမ္ဘာ့ဂင်းနစ်စံချိန်မှတ်တမ်းအဖွဲ့က အန်ဒရူးလွန်ဂိုရီးယား၏စုဆောင်းမှုသည် ဂင်းနစ်စံချိန်ကို ချိုးဖျက်နိုင်ခဲ့ကြောင်း အတည်ပြုဆုံးဖြတ်ပေးခဲ့သည်။ အန်ဒရူးလွန်ဂိုရီးယား၏စုဆောင်းမှုတွင် အယ်လ်ဘမ်များ၊ လက်ကိုင်အိတ်များ၊ တီရှပ်များ၊ အရုပ်များ၊ တရားဝင်ထုတ်ထားသည့်ဂျင်းဘောင်းဘီများနှင့် အခြားအရာများပါဝင်ကြောင်းသိရသည်။ 

Selena Quintanilla သေဆုံးပြီးနောက် (၂)နှစ်အကြာတွင် ၎င်း၏အဘွားဖြစ်သူက "Dreaming of You" စီဒီချပ်ကို ဝယ်ယူလာပေးခဲ့ပြီးနောက် (၁၉၉၇)ခုနှစ်တွင် Selena Quintanilla ၏ပရိသတ်ဖြစ်လာခဲ့ခြင်းဖြစ်ကြောင်း အန်ဒရူးလွန်ဂိုရီးယားက ပြောကြားခဲ့သည်။ Selena Quintanilla နှင့်ပတ်သက်သည့် အမှတ်ရစရာပစ္စည်းများကို စုဆောင်းမှုအလေ့အကျင့်ကို အမေရိကန်အဆိုတော် Elvis နှင့်ပတ်သက်သည့် အမှတ်ရစရာပစ္စည်းများကို စုဆောင်းခဲ့သော ၎င်း၏အဘွားဖြစ်သူထံမှ လှုံ့ဆော်မှုရရှိခဲ့ခြင်းဖြစ်ကြောင်း အန်ဒရူးလွန်ဂိုရီးယားက ပြောကြားခဲ့သည်။ ထို့ပြင် Selena Quintanilla နှင့်ပတ်သက်သည့် အမှတ်တရစရာပစ္စည်း(၁၃၀၈)ခုကို စုဆောင်းခဲ့ပြီးနောက် ယခုကဲ့သို့ ကမ္ဘာ့ဂင်းနစ်စံချိန်ချိုးဖျက်နိုင်ခဲ့သည့်အတွက် အလွန်ဝမ်းသာမိကြောင်း အန်ဒရူးလွန်ဂိုရီးယားကပြောကြားခဲ့သည်။