Pika (NSS) - အောက်တိုဘာ ၁၉

ပျက်ကျခဲ့တဲ့ တောင်ကိုရီးယားရဲ့ စစ်ဘက်ဆိုင်ရာဒရုန်းအပျက်အစီးတွေကို ရှာဖွေတွေ့ရှိခဲ့ပြီးနောက် တောင်ကိုရီးယားကို လက်တုံ့ပြန်မှုတွေလုပ်ဆောင်သွားမယ်လို့ မြောက်ကိုရီးယားက အောက်တိုဘာလ(၁၉)ရက်မှာ ခြိမ်းခြောက်ပြောဆိုခဲ့ပါတယ်။

မြောက်ကိုရီးယားရဲ့ ကြေညာချက်ဟာ ကိုရီးယားကျွန်းဆွယ်မှာဖြစ်ပွားနေတဲ့ တင်းမာမှုတွေကို ပိုမိုမြင့်တက်လာစေခဲ့တယ်လို့လည်း သိရပါတယ်။ မြောက်ကိုရီးယားနိုင်ငံပိုင် သတင်းအေဂျင်စီ KCNA ရဲ့အဆိုအရ တောင်ကိုရီးယားဟာ ဝါဒဖြန့်ချိရေးလက်ကမ်းစာစောင်တွေကို မြောက်ကိုရီးယားနိုင်ငံမှာ ကြဲချဖို့အတွက် အဲဒီဒရုန်းတွေကို အသုံးပြုခဲ့ပုံပေါ်တယ်လို့လည်း သိရပါတယ်။ ဒါ့ပြင် ယခုလအစောပိုင်းမှာ ဝါဒဖြန့်ချိရေး လက်ကမ်းစာစောင်တွေကို ကြဲချနေတဲ့ တောင်ကိုရီးယားရဲ့ အလားတူဒရုန်းတွေကို ခြေရာခံတွေ့ရှိခဲ့တယ်လို့လည်း KCNA ကရေးသားဖော်ပြထားပါတယ်။

မြောက်ကိုရီးယားအစိုးရက "မြောက်ကိုရီးယားရဲ့ မြေပြင်၊ ဝေဟင်နဲ့ရေပြင်ပိုင်နက်တွေကို ချိုးဖောက်နေတဲ့ တောင်ကိုရီးယားစစ်တပ်ရဲ့လုပ်ရပ်တွေကို ထပ်မံရှာဖွေတွေ့ရှိပြီး အတည်ပြုနိုင်ခဲ့မယ်ဆိုရင် မြောက်ကိုရီးယားရဲ့ အချုပ်အခြာအာဏာကိုဆန့်ကျင်တဲ့ ပြင်းထန်တဲ့စစ်ရေးအရ ရန်စမှုတစ်ခုလို့ ယူဆသွားမှာဖြစ်ပြီး ချက်ချင်းစစ်ကြေညာပြီးတော့ လက်တုံ့ပြန်တိုက်ခိုက်မှုတွေကို လုပ်ဆောင်သွားမှာပါ"လို့ သတိပေးပြောဆိုခဲ့ပါတယ်။

ဝါဒဖြန့်ချိရေးလက်ကမ်းစာစောင်တွေကို သယ်ဆောင်လာတဲ့ တောင်ကိုရီးယားရဲ့ဒရုန်းတွေဟာ ပြုံးယမ်းမြို့ကောင်းကင်ယံကို ဝင်ရောက်လာခဲ့တယ်လို့ မြောက်ကိုရီးယားအစိုးရက ပြီးခဲ့တဲ့အောက်တိုဘာလ(၁၁)ရက်မှာ စွပ်စွဲပြောဆိုခဲ့ပါတယ်။ ပြီးတော့ တောင်ကိုရီးယားဒရုန်းတွေ ထပ်မံဝင်ရောက်လာမယ်ဆိုရင် ဆိုးရွားတဲ့ဘေးအန္တရာယ်တွေကို တောင်ကိုရီးယားက ရင်ဆိုင်ရလိမ့်မယ်လို့ မြောက်ကိုရီးယားခေါင်းဆောင်ကင်ဂျုံအန်းရဲ့ ညီမဖြစ်သူ ကင်ယိုဂျုံက ပြီးခဲ့တဲ့ရက်ပိုင်းမှာ သတိပေးပြောဆိုခဲ့ဖူးပါတယ်။ ဒါပေမဲ့လည်း အဲဒီကိစ္စနဲ့ပတ်သက်ပြီး မြောက်ကိုရီးယားအစိုးရရဲ့စွပ်စွဲပြောဆိုချက်တွေကို အတည်မပြုပေးနိုင်ဘူးလို့ တောင်ကိုရီးယားစစ်ဦးစီးချုပ်များရုံးက ပြန်လည်တုံ့ပြန်ဖြေကြားခဲ့ပါတယ်။