Pika (NSS) - အောက်တိုဘာ ၁၈

တရုတ်-အိန္ဒိယဆက်ဆံရေးတိုးတက် ကောင်းမွန်လာမှုကို ဆက်လက်ထိန်းသိမ်းရန်အတွက် ထိုင်ဝမ်နှင့်ဆက်စပ်သည့် ကိစ္စရပ်များကို သတိထား ကိုင်တွယ်ရန် အိန္ဒိယကို တရုတ်အစိုးရက အောက်တိုဘာလ(၁၇)ရက်တွင် တိုက်တွန်းခဲ့ကြောင်းသိရသည်။ အိန္ဒိယနိုင်ငံ မွန်ဘိုင်းမြို့တွင် ထိုင်ဝမ်ကောင် စစ်ဝန်ရုံးဖွင့်လှစ်ခဲ့ပြီးနောက် တရုတ်ဘက်ကတိုက်တွန်းမှုများထွက်ပေါ်လာခြင်းဖြစ်သည်။ 

ထို့ပြင် ထိုင်ဝမ်နှင့်တရားဝင် အဆက်အသွယ်ရှိသည့် နိုင်ငံများ၏ လှုပ်ရှားမှုများကို တရုတ်နိုင်ငံက ဆန့်ကျင် ကန့်ကွက်ကြောင်း တရုတ်နိုင်ငံခြားရေးဝန်ကြီးဌာနပြောရေးဆိုခွင့်ရှိသူ မာအိုနင်က ပုံမှန်သတင်းစာရှင်း လင်းပွဲတစ်ခုတွင်ပြောကြားခဲ့သည်။ ထိုင်ဝမ်အစိုးရသည် ၎င်း၏တတိယမြောက်ကိုယ်စားလှယ်ရုံးကို အောက်တိုဘာလ(၁၆)ရက်တွင် အိန္ဒိယနိုင်ငံမှာ စတင်ဖွင့်လှစ်ခဲ့ကြောင်း ထိုင်ဝမ်၏တရားဝင်ဗဟို သတင်းအေဂျင်စီက ထုတ်ပြန်ပြောကြားခဲ့သည်။ထိုင်ဝမ်အစိုးရ၏ ပထမနှင့်ဒုတိယမြောက်ကိုယ်စားလှယ်ရုံးတို့မှာ နယူးဒေလီမြို့နှင့် ချန်နိုင်းမြို့တို့တွင် ရှိကြောင်းသိရသည်။ နှစ်နိုင်ငံကြားနယ်စပ်တွင် ဖြစ်ပွားနေသော အငြင်းပွားမှုများနှင့် တင်းမာမှုများကို လျှော့ချရန်အတွက် တရုတ်နှင့်အိန္ဒိယတို့က ကြိုးပမ်း နေချိန်တွင် ထိုင်ဝမ်၏ကောင်စစ်ဝန်ရုံးဖွင့်လှစ်မှု ထွက်ပေါ်လာခြင်းဖြစ်သည်။ ထိုင်ဝမ်ကို ၎င်း၏ပိုင်နက်နယ်မြေအဖြစ်ရှုမြင်ထားသော တရုတ်အစိုးရ သည် ယခုသီတင်းပတ်အစောပိုင်းတွင် ထိုင်ဝမ် ကျွန်းအနီးတစ်ဝိုက်မှာ စစ်ရေးလေ့ကျင့်မှုများကို လုပ် ဆောင်ခဲ့ကြောင်းလည်းသိရသည်။ တရုတ်အစိုးရ၏ ပိုင်နက်နယ်မြေပိုင်ဆိုင်မှုပြောဆိုချက်များကို ထိုင်ဝမ် အစိုးရက ငြင်းဆန်ပယ်ချထားပြီး ထိုင်ဝမ်ကျွန်းပြည်သူများကသာ ၎င်းတို့၏အနာဂတ်ကို ကိုယ်တိုင်ဆုံး ဖြတ်နိုင်ကြောင်းပြောကြားထားသည်။

မာအိုနင်က "ထိုင်ဝမ်ရဲ့ကောင်စစ်ဝန်ရုံး ဖွင့်လှစ်လိုက်တာနဲ့ပတ်သက်ပြီး ကျွန်မတို့ရဲ့ သဘော ထားတွေကို အိန္ဒိယဘက်ကို တင်ပြထားပါတယ်။ တရုတ်တစ်နိုင်ငံတည်းမူဝါဒဟာ အိန္ဒိယဘက်က အလေးထားတဲ့နိုင်ငံရေး ကတိကဝတ်တစ်ခု ဖြစ်ပြီး တရုတ်-အိန္ဒိယဆက်ဆံရေးရဲ့ နိုင်ငံရေး အခြေခံ အုတ်မြစ်လည်းဖြစ်ပါတယ်"ဟုပြောဆိုခဲ့သည်။ ထို့ပြင် ထိုင်ဝမ်နှင့်ဆက်စပ်သည့် ကိစ္စရပ် များကို သတိထားကိုင်တွယ်ရန်၊ ထိုင်ဝမ်နှင့်တရား ဝင်ဖလှယ်မှုပုံစံများကို လုံးဝရှောင်ကြဉ်ရန် အိန္ဒိယအစိုးရကို တရုတ်ဘက်ကတိုက်တွန်းခဲ့ကြောင်း မာအို နင်က ထပ်မံပြောဆိုခဲ့သည်။