သန့်ဇင် (NSS) - အောက်တိုဘာ ၇

တနင်္သာရီတိုင်းဒေသကြီး၊ လောင်းလုံးမြို့နယ်တွင် ထားဝယ်မြို့နယ်မှ သန်းခေါင်စာရင်းကောက်ပြီး ပြန်လာသည့် ပညာရေးဝန်ထမ်း(၆)ဦး နှင့် ကျေးရွာအုပ်ချုပ်ရေးမှူးရုံး စာရေးမတစ်ဦးကို PDF အဖွဲ့က ဖမ်းဆီး ခေါ်ဆောင်သွားခဲ့ကြောင်း လုံခြုံရေးတပ်ဖွဲ့ဝင်များနှင့် နီးစပ်သူများထံမှ သိရသည်။

ဖြစ်စဉ်မှာ ယမန်‌နေ့(အောက်တိုဘာ ၆ ရက်)၊ မွန်းလွဲပိုင်းအချိန်က လောင်းလုံးမြို့နယ်၊ ရေဖြူကျေးရွာအုပ်စု၊ ရေဖြူကျေးရွာတွင် ဖြစ်ပွားခဲ့ခြင်းဖြစ်ကြောင်း သိရသည်။

အဆိုပါကျေးရွာတွင်နေထိုင်သည့် ကျေးရွာအုပ်စုအုပ်ချုပ်ရေးမှူးရုံးစာရေး ဒေါ်သီတာအပါအဝင် ကျောင်းဆရာမ (၄)ဦးတို့သည် ထားဝယ်မြို့နယ်မှ သန်းခေါင်စာရင်းကောက်ယူကာ ပြန်လာပြီး ၎င်းတို့နေအိမ်အသီးသီးတွင် ရှိနေစဉ် PDF အဖွဲ့ဝင်(၁၀)ဦးခန့်က ကားဖြင့်ရောက်ရှိလာကာ ဖမ်းဆီးခါ်ဆောင်သွားခဲ့ကြောင်း သိရသည်။

ထို့ပြင် ယင်းနေ့၊ ည ၇နာရီခွဲအချိန်ခန့်ကလည်း သန်းခေါင်းစာရင်းကောက်ယူရာ၌ ပါဝင်သော အထက်ပါကျေးရွာတွင် နေထိုင်သည့် မူလတန်းကျောင်းအုပ်ဆရာမတစ်ဦးနှင့် အထက်တန်းပြဆရာမတစ်ဦးတို့ကိုလည်း PDF အဖွဲ့က ထပ်မံဖမ်းဆီးခေါ်ဆောင်သွားခဲ့ကြောင်း သိရသည်။

လက်ရှိတွင် PDF လက်နက်ကိုင်အဖွဲ့၏ ဖမ်းဆီးခြင်းခံရသူများအား အမြန်ဆုံးပြန်လည် လွတ်မြောက်ရေးနှင့် ကျူးလွန်သူများအား ဖမ်းဆီးအရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းစစ်ဆေးမှုများဆက်လက်လုပ်ဆောင်လျက်ရှိကြောင်း သိရသည်။

အလားတူ ပြီးခဲ့သည့် အောက်တိုဘာ ၄ ရက်ကလည်း ချင်းပြည်နယ်၊ တီးတိန်မြို့နယ်၊ လမ်းဇန်ကျေးရွာတွင်နေထိုင်သော သန်းခေါင်စာရင်းကောက်ယူရာတွင် ပါဝင်သူ အသက်(၆၅)နှစ်အရွယ် အမျိုသားတစ်ဦးကို PDF အဖွဲ့က ဖမ်းဆီးခေါ်ဆောင်သွားသည့် ဖြစ်စဉ် ဖြစ်ပွားခဲ့ဖူးသည်။

လူဦးရေနှင့် အိမ်အကြောင်းအရာ သန်းခေါင်စာရင်းကို ပြီးခဲ့သည့် အောက်တိုဘာလ ၁ ရက်မှစတင်ကာ အောက်တိုဘာလ ၁၅ ရက်အထိ ကောက်ယူမည်ဖြစ်ပြီး လက်ရှိအချိန်ထိ ဒေသအချို့တွင် သန်းခေါင်စာရင်းကောက်ယူရာ၌ ပါဝင်သူများကို PDF လက်နက်ကိုင် အဖွဲ့များက နည်းလမ်းမျိုးစုံဖြင့် ချောင်းမြောင်းလုပ်ကြံခြင်း၊ ခြိမ်းခြောက်ခြင်းနှင့် ဖမ်းဆီးခြင်းများ လုပ်ဆောင်နေလျက်ရှိကြောင်း သိရသည်။