Pika (NSS) - အောက်တိုဘာ ၂

အရှေ့အလယ်ပိုင်းဒေသမှာ ကျယ်ပြန့်တဲ့စစ်ပွဲဖြစ်ပွားလာမှာကို စိုးရိမ်မှုတွေမြင့်တက်နေတဲ့အချိန်မှာပဲ အောက်တိုဘာလ(၁)ရက်နေ့ညမှာ အီရန်ဟာ အစ္စရေးကို ဒုံးကျည်အစင်းရေ(၂၀၀)ကျော်နဲ့ ပစ်ခတ်တိုက်ခိုက်ခဲ့တယ်လို့သိရပါတယ်။

အီရန်က ဒုံးကျည်တွေနဲ့ပစ်ခတ်တိုက်ခိုက်မှုနဲ့ပတ်သက်ပြီး သင့်လျော်တဲ့လက်တုံ့ပြန်မှုတွေကို လုပ်ဆောင်သွားမယ်လို့ အစ္စရေးအစိုးရက တိုက်ခိုက်မှုတွေအပြီးမှာ ပြောကြားခဲ့ပါတယ်။ ဒါ့ပြင် အီရန်အစိုးရဟာ အစ္စရေးကို ဒုံးကျည်အစင်းရေ(၂၀၀)ကျော်နဲ့ ပစ်ခတ်တိုက်ခိုက်ခဲ့တာကို အီရန်နိုင်ငံပိုင်ရုပ်မြင်သံကြားလိုင်းက အောက်တိုဘာလ(၂)ရက်နေ့မှာ အတည်ပြုပေးခဲ့တယ်လို့လည်း သိရပါတယ်။ အောက်တိုဘာလ(၁)ရက်နေ့ညမှာ အစ္စရေးဟာ ဒုံးကျည်အစင်းရေ(၁၈၀)ကျော်နဲ့ ပစ်မှတ်ထားတိုက်ခိုက်ခံခဲ့ရပြီး ဒုံးကျည်အများစုကို လေကြောင်းရန်ကာကွယ်ရေးစနစ်တွေက အောင်မြင်စွာကြားဖြတ်ဟန့်တားနိုင်ခဲ့တယ်လို့ အစ္စရေးဘက်က ထုတ်ပြန်ပြောဆိုထားပါတယ်။

တစ်ချိန်တည်းမှာပဲ အစ္စရေးဟာ လက်ဘနွန်နိုင်ငံ ဘေရွတ်မြို့တောင်ပိုင်းက ရပ်ကွက်တစ်ခုကို ပြင်းထန်တဲ့ဗုံးကြဲတိုက်ခိုက်မှုတွေ လုပ်ဆောင်ခဲ့တယ်လို့လည်းသိရပါတယ်။ ပြီးခဲ့တဲ့သီတင်းပတ်တွေအတွင်း အစ္စရေးနဲ့ဟစ်ဘိုလာလက်နက်ကိုင်အဖွဲ့တို့ဟာ ဒုံးကျည်တွေနဲ့ အပြန်အလှန်ပစ်ခတ်တိုက်ခိုက်မှုတွေကို ဆက်တိုက်လုပ်ဆောင်ပြီးနောက် တင်းမာမှုတွေပိုမိုမြင့်တက်လာခဲ့တာလည်း ဖြစ်ပါတယ်။ ပြီးခဲ့တဲ့ရက်ပိုင်းက အစ္စရေးတပ်ဖွဲ့တွေဟာ လက်ဘနွန်နိုင်ငံ ဘေရွတ်မြို့မှာရှိတဲ့ မြေအောက်ဘန်ကာတစ်ခုကို ဗုံးကြဲတိုက် ခိုက်မှုအတွင်း ဟစ်ဘိုလာလက်နက်ကိုင်အဖွဲ့ရဲ့ခေါင်းဆောင် Hassan Nasrallah ကို လုပ်ကြံသတ်ဖြတ်နိုင်ခဲ့တယ်လို့လည်း သိရပါတယ်။ ဟစ်ဘိုလာလက်နက်ကိုင်အဖွဲ့ခေါင်းဆောင် Hassan Nasrallah သေဆုံးမှုကြောင့် အစ္စရေးနဲ့ ဟစ်ဘိုလာလက်နက်ကိုင်အဖွဲ့ကြားတင်းမာမှုတွေ ပိုမိုမြင့်တက်လာခဲ့တာလည်းဖြစ်ပါတယ်။ ဒါ့ပြင် အောက်တို ဘာလ(၁)ရက်နေ့မှာ အစ္စရေးတပ်ဖွဲ့တွေဟာ လက်ဘနွန်နိုင်ငံတွင်းကို မြေပြင်ထိုးစစ်ဆင်မှုတွေစတင်လုပ်ဆောင်ခဲ့တယ်လို့ သိရပါတယ်။ လက်ဘနွန်နိုင်ငံတွင်းကို မြေပြင်ထိုးစစ်ဆင်မှုတွေလုပ်ဆောင်ခဲ့တဲ့ အောက်တိုဘာလ(၁)ရက်နေ့ညမှာပဲ အီရန်က အစ္စရေးကို ဒုံးကျည်တွေနဲ့ပစ်ခတ်တိုက်ခိုက်မှုတွေ လုပ်ဆောင်ခဲ့တာဖြစ်ပါတယ်။

အစ္စရေးကို အီရန်ကဒုံးကျည်တွေနဲ့ပစ်ခတ်တိုက်ခိုက်မှုဟာ လက်ခံနိုင်စရာကိစ္စတစ်ခုမဟုတ်ဘူးလို့ ဂျပန်အစိုးရက အောက်တိုဘာလ(၂)ရက်နေ့မှာ ပြစ်တင်ရှုတ်ချပြောဆိုခဲ့ပါတယ်။ ပြီးတော့ အီရန်ရဲ့ဒုံးကျည်အစင်းရေ (၂၀၀) ကျော်ကို အစ္စရေးလေကြောင်းရန်ကာကွယ်ရေးစနစ်တွေရဲ့ ကြားဖြတ်ဟန့် တားမှုတွေမှာ အမေရိကန်ရေတပ်ဖျက်သင်္ဘောက တစ်စိတ်တစ်ပိုင်း ပါဝင်ကူညီပေးခဲ့တယ်လို့ အမေရိကန်အစိုးရက အတည်ပြုခဲ့ပါတယ်။