Pika (NSS) - စက်တင်ဘာ ၂၉

အာရှတိုက်ရဲ့ အရေးကြီးဆုံးနေရာတွေထဲကတစ်ခုဖြစ်တဲ့ ဖိလစ်ပိုင်ရဲ့သီးသန့်စီးပွားရေးဇုန်အတွင်းမှာ ဂျပန်၊ နယူးဇီလန်၊ အမေရိကန်တို့နဲ့အတူ ပူးတွဲရေကြောင်းလှုပ်ရှားမှုတွေကို လုပ်ဆောင်သွားမယ်လို့ ဩစတြေးလျနဲ့ဖိလစ်ပိုင်အစိုးရတို့က ထုတ်ပြန်ပြောကြားခဲ့ပါတယ်။

ဩစတြေးလျကာကွယ်ရေးဝန်ကြီးဌာနက "ပူးတွဲရေကြောင်းလှုပ်ရှားမှုဟာ တည်ငြိမ်အေးချမ်းပြီး သာယာဝပြောတဲ့ အင်ဒို-ပစိဖိတ်ဒေသကို ပံ့ပိုးကူညီဖို့အတွက် ဒေသတွင်းနဲ့နိုင်ငံတကာပူးပေါင်းဆောင်ရွက်မှုတွေ အားကောင်းလာအောင်လုပ်ဆောင်ဖို့ ကျွန်တော်တို့ရဲ့စုပေါင်းကတိဝတ်တွေကို သက် သေပြနေတာပဲဖြစ်ပါတယ်"လို့ သတင်းထုတ်ပြန်ထားပါတယ်။ ဒါ့ပြင် HMAS Sydney ရေတပ်သင်္ဘောနဲ့ P-8A Poseidon ရေကြောင်းကင်းလှည့်လေယာဉ်တို့ဟာ ဂျပန်၊ နယူးဇီလန်၊ အမေရိကန်၊ ဖိလစ်ပိုင်တို့ရဲ့ တပ်ဖွဲ့ဝင်တွေနဲ့အတူ ပူးပေါင်းပါဝင်လုပ်ဆောင်သွားမှာဖြစ်တယ်လို့လည်း ထုတ်ပြန်ချက်မှာရေးသားဖော်ပြထားပါတယ်။

တရုတ်နဲ့ဖိလစ်ပိုင်တို့ဟာ အငြင်းပွားတောင်တရုတ်ပင်လယ်အတွင်းမှာ ထိပ်တိုက်တွေ့ဆုံမှုတွေ မကြာခဏဖြစ်ပွားခဲ့ပြီးနောက် ယခုလိုပူးတွဲစစ်ရေးလေ့ကျင့်မှု ထွက်ပေါ်လာတာလည်းဖြစ်ပါတယ်။ ပြီးခဲ့တဲ့ စက်တင်ဘာလ (၂၅)ရက်နေ့က နယူးဇီလန်နဲ့ဩစတြေးလျတို့ရဲ့ ရေတပ်သင်္ဘောတွေဟာ ထိုင်ဝမ်ရေလက်ကြားကို ဖြတ်သန်းသွားလာခဲ့ပြီးနောက် တရုတ်ဘက်ကစိုးရိမ်ပူပန်မှုတွေ ထွက်ပေါ်လာခဲ့တယ်လို့လည်း သိရပါတယ်။ ထိုင်ဝမ်ရေ လက်ကြားကို ဖြတ်သန်းသွားလာမှုဟာ တည်ငြိမ်အေးချမ်းပြီး သာယာဝ ပြောတဲ့ အင်ဒို-ပစိဖိတ်ဒေသအတွက် ၎င်းတို့ရဲ့ကတိဝတ်တွေကို ပြသခဲ့တာမျိုးဖြစ်တယ်လို့ ဩစတြေးလျကာကွယ်ရေးဝန်ကြီးဌာနက ပြောဆိုခဲ့ပါတယ်။ တရုတ်အစိုးရဟာ ထိုင်ဝမ်ကို ၎င်းရဲ့ပိုင်နက်နယ်မြေအဖြစ်ရှုမြင်ထားပြီး ငြိမ်းချမ်းစွာပြန်လည်ပေါင်းစည်းဖို့အတွက် လိုအပ်ရင်အင်အားသုံးဖြေရှင်းသွားမယ်လို့လည်း တရုတ်သမ္မတရှီကျင့်ဖျင်က ပြောဆိုထားပါတယ်။

တောင်တရုတ်ပင်လယ်တစ်ခုလုံးနီးပါးကို ၎င်းတို့ပိုင်ဆိုင်ကြောင်း တရုတ်ဘက်က ပြောဆိုထားသလို ဖိလစ်ပိုင်၊ ဗီယက်နမ်၊ အင်ဒိုနီးရှား၊ မလေးရှား နဲ့ ဘရူနိုင်းနိုင်ငံတို့ကလည်း တောင်တရုတ်ပင်လယ်အတွင်း တစ်စိတ်တစ်ပိုင်းကို ၎င်းတို့ ပိုင်ဆိုင်တယ်လို့ အခိုင်အမာပြောဆိုထားပါတယ်။