Pika (NSS) - စက်တင်ဘာ ၂၆

Arc’teryx ကုမ္ပဏီသည် ဝတ်ဆင်သူ၏ ခြေထောက်အားကို (၄၀)ရာခိုင်နှုန်းတိုးစေကာ ပေါင် (၃၀)ခန့် ပေါ့ပါးသွားသည်ဟုခံစားရစေမည့် ကမ္ဘာ့ပထမဆုံး မော်တာစွမ်းအင်သုံး exoskeleton ပုံစံ MO/GO  တောင်တက် ဘောင်းဘီကို ဖန်တီးကာ မိတ်ဆက်ခဲ့ကြောင်းသိရသည်။

ဆေးဘက်ဆိုင်ရာနယ်ပယ်တွင် မော်တာစွမ်းအင်သုံး exoskeleton ဝတ်စုံများသည် နှစ်ပေါင်းများစွာကြာ အောင် အလုပ်ဖြစ်ခဲ့သော်လည်း အပန်းဖြေနယ်ပယ်တွင် ယခုကဲ့သို့ အသုံးပြုခြင်းမျိုးမှာ ရှားပါး ကြောင်းလည်းသိရ သည်။ Arc’teryx ကုမ္ပဏီသည် ကမ္ဘာ့ပထမဆုံးမော်တာစွမ်းအင်သုံးတောင်တက် ဘောင်းဘီကို ဖန်တီးရန်အတွက် Skip ကုမ္ပဏီနှင့် မကြာသေးမီက ပူးပေါင်းခဲ့ကြောင်းသိရသည်။

MO/GO ဟုခေါ်သော တောင်တက်ဘောင်းဘီတွင် AI နည်းပညာဖြင့်ထိန်းချုပ်ထားသော မော်တာများမှ တစ်ဆင့်ကာဗွန်ဖိုက်ဘာဖြင့် ပြုလုပ်ထားသော exoskeleton ကို စွမ်းအင်ပေးကာ တောင်တက်ခြင်းကို ပိုမိုအဆင်ပြေစေ ရန်အတွက် ဒီဇိုင်းထုတ်ထားခြင်း ဖြစ်သည်။ဖန်တီးသူများက ‘‘ MO/GO တောင်တက် ဘောင်းဘီဟာ ရွေ့လျားမှုအားကို မြှင့်တင်ပေးပြီး ခန္ဓာကိုယ်နဲ့တစ်သားတည်းဖြစ်သလို ခံစားရမှာပါ။အပန်းဖြေနယ်ပယ်မှာ ဒီလို exoskeleton ဝတ်စုံ တွေကို အသုံးပြုတာမျိုးကတော့ ရှားပါးပါတယ်’’ဟု ပြောဆိုခဲ့သည်။ ဒူးခေါင်းဘေးဘက်တွင်ရှိသော မော်တာများကို ဘောင်းဘီ၏ခါးတစ် ဝိုက်တွင်ရှိသော ဘက်ထရီများဖြင့် စွမ်းအင်ပေးထားမည်ဖြစ်ပြီး အချိန် (၃)နာရီခန့် အသုံးပြုနိုင် မည် ဖြစ်ကြောင်းလည်း သိရသည်။

ထို့ပြင် အဆိုပါဘောင်းဘီကိုဝတ်ဆင်ထားသူသည် ကုန်းဆင်းသို့ လမ်း လျှောက်နေစဉ်အချိန်အတွင်း ဘက်ထရီက အလိုအလျောက်အားပြန်ပြည့် သွားမည်ဖြစ်ကြောင်းလည်းသိရသည်။ MO/GO တောင်တက်ဘောင်း ဘီသည် မော်တာများနှင့် ဘက်ထရီများအပါအဝင် စုစုပေါင်းအလေးချိန် (၇)ပေါင်ခန့်သာရှိပြီး ဈေးကွက်အတွင်း ရောင်းချမည့်ဈေးနှုန်းမှာ အမေရိကန်ဒေါ်လာ(၅၀ဝဝ)ဝန်းကျင် ရှိမည်ဖြစ်ကြောင်းလည်းသိရသည်။