Pika (NSS) - စက်တင်ဘာ ၂၂ 

လာမယ့်နိုဝင်ဘာလ(၅)ရက်မှာ ပြုလုပ်မယ့် အမေရိကန်သမ္မတရွေးကောက်ပွဲမတိုင်မီ စကားစစ်ထိုးပွဲထပ်မံ လုပ်ဆောင်ဖို့ ဒီမိုကရက်တစ်သမ္မလောင်း ကာမာလာဟားရစ်ရဲ့တောင်းဆိုချက်ကို ရီပတ်ဘလစ်ကန်သမ္မတ လောင်းဒေါ်နယ်ထရမ့်က စက်တင်ဘာလ(၂၁)ရက်မှာ ငြင်းဆန်ပယ်ချခဲ့တယ်လို့ သိရပါတယ်။

အစောပိုင်းမဲပေးမှုတွေဟာ အချို့ပြည်နယ်တွေမှာ စတင်လုပ်ဆောင်နေပြီဖြစ်တာမလို့ စကားစစ်ထိုးပွဲ ထပ်မံ လုပ်ဆောင်ဖို့က အချိန်နောက်ကျနေပြီဖြစ်တယ်လို့လည်း ဒေါ်နယ်ထရမ့်က ပြောဆိုခဲ့ပါတယ်။ လာမယ့် အောက်တိုဘာလ(၂၃)ရက်မှာ ပြုလုပ်မယ့် စကားစစ်ထိုးပွဲမှာ ပါဝင်ဖို့ CNN သတင်းဌာနရဲ့ဖိတ်ကြားချက်ကို ကာမာလာဟားရစ်က လက်ခံခဲ့တယ်လို့ ၎င်းရဲ့ကမ်းပိန်းက ပြောကြားခဲ့ပါတယ်။

စက်တင်ဘာလ(၁၀)ရက်က ပြုလုပ်ခဲ့တဲ့ စကားစစ်ထိုးပွဲပြီးရင် ယခုတစ်ကြိမ်ထပ်မံလုပ်ဆောင်မယ့် စကားစစ်ထိုးပွဲ ဟာ ဒေါ်နယ်ထရမ့်နဲ့ ကာမာလာဟားရစ်ကြား ဒုတိယအကြိမ်မြောက်လုပ်ဆောင်မယ့် စကားစစ်ထိုးပွဲဖြစ်တယ်လို့ လည်း သိရပါတယ်။ ကာမာလာဟားရစ်ကမ်းပိန်းရဲ့ဥက္ကဋ္ဌ Jen O'Malley Dillon က "အမေရိကန်ပြည်သူတွေဟာ မဲမထည့်ခင် ဒေါ်နယ်ထရမ့် နဲ့ ကာမာလာဟားရစ်တို့ရဲ့စကားစစ်ထိုးပွဲကိုမြင်တွေ့ရမယ့် အခြားအခွင့်အရေးတစ်ခုနဲ့ ထိုက်တန်ပါတယ်" လို့ ပြောခဲ့ပါတယ်။

ကာမာလာဟားရစ် က "ဒေါ်နယ်ထရမ့်က ဒီစကားစစ်ထိုးပွဲမှာ ပါဝင်လာမယ်လို့ ကျွန်မမျှော်လင့်ပါတယ်" လို့ ပြောခဲ့ပါတယ်။ ဒေါ်နယ်ထရမ့် က "အချို့ပြည်နယ်တွေမှာ အစောပိုင်းမဲပေးတာက စတင်နေပြီမလို့ စကားစစ်ထိုးပွဲ လုပ်ဆောင်ဖို့က နောက်ကျနေပါပြီ" လို့ တုံ့ပြန်ခဲ့ပါတယ်။

ပြီးခဲ့တဲ့ရက်ပိုင်းက ပြုလုပ်ခဲ့တဲ့ စကားစစ်ထိုးပွဲအတွင်း ဒေါ်နယ်ထရမ့်နဲ့ ကာမာလာဟားရစ်တို့ဟာ  ဒီမိုကရေစီ အရေး၊ လူဝင်မှုကြီးကြပ်ရေးကိစ္စ၊ ယူကရိန်းစစ်ပွဲ အပါအဝင် အခြားကိစ္စရပ်တွေကို အချိန်(၁)နာရီကျော်ကြာ ဆွေးနွေးပြောဆိုခဲ့ကြတယ်လို့လည်း သိရပါတယ်။