Pika (NSS) - စက်တင်ဘာ ၁၉ 

ရုရှားသမ္မတပူတင်ဟာ အီရန်နိုင်ငံနဲ့မဟာဗျူဟာမြောက်မိတ်ဖက်သဘောတူစာချုပ်ကို လက်မှတ်ရေးထိုးဖို့ ရုရှား နိုင်ငံခြားရေးဝန်ကြီးဌာနရဲ့အဆိုပြုချက်ကို လက်ခံခဲ့တယ်လို့ နိုင်ငံပိုင်ဝက်ဘ်ဆိုက်မှာ ထုတ်ပြန်ထားတဲ့ အချက်အလက်တွေအရ သိရပါတယ်။

အဲဒီသဘောတူညီချက်ကို လက်မှတ်ရေးထိုးတာဟာ သင့်လျော်တဲ့လုပ်ရပ်တစ်ခုဖြစ်တယ်လို့ ထုတ်ပြန်ချက်မှာ ရေးသားဖော်ပြထားပေမယ့်လည်း ဘယ်အချိန်မှာ လက်မှတ်ရေးထိုးမယ်ဆိုတဲ့အချက်ကိုတော့ ဖော်ပြထားတာမျိုးမရှိဘူးလို့ သိရပါတယ်။

ယူကရိန်းစစ်ပွဲမှာ အသုံးပြုဖို့အတွက် စစ်လက်နက်ပစ္စည်းတွေကို အီရန်က ရုရှားကို ထောက်ပံ့ပေးနေတယ်ဆိုတဲ့ အစီရင်ခံစာတွေ ထွက်ပေါ်လာပြီးနောက်ပိုင်း ပြီးခဲ့တဲ့သီတင်းပတ်တွေအတွင်း အီရန်နဲ့ ရုရှားတို့ကြား ပူးပေါင်း ဆောင်ရွက်မှုဟာ အလယ်အလတ်အဆင့်ကို ရောက်ရှိလာခဲ့တယ်လို့ သိရပါတယ်။ ရုရှားဟာ အီရန်ဆီကနေ ပဲ့ထိန်း ဒုံးကျည်တွေကို လက်ခံရရှိပြီး လာမယ့်သီတင်းပတ်တွေအတွင်း ယူကရိန်းကို တိုက်ခိုက်ရာမှာ အသုံးပြုနိုင်ဖွယ် ရှိနေတယ်လို့ အမေရိကန်နိုင်ငံခြားရေးဝန်ကြီးအန်တိုနီဘလင်ကန်က စက်တင်ဘာလ(၁၇)ရက်မှာ ထုတ်ပြန်ပြော ခဲ့ပါတယ်။

ဒါ့ပြင် ရုရှားနဲ့ အီရန်ကြားပူးပေါင်းဆောင်ရွက်မှုဟာ ဥရောပလုံခြုံရေးကို ကျယ်ကျယ်ပြန့်ပြန့်ခြိမ်းခြောက်နေတယ် လို့ အန်တိုနီဘလင်ကန်က ပြောကြားခဲ့ပါတယ်။ စက်တင်ဘာလ(၁၇)ရက်မှာ အမေရိကန်၊ ဂျာမနီ၊ ဗြိတိန် နဲ့ ပြင်သစ်တို့ဟာ အီရန်အမျိုးသားလေကြောင်းလိုင်း Iran Air ကို ပိတ်ဆို့အရေးယူမှုတွေ အပါအဝင် အီရန်အပေါ် ပိတ်ဆို့အရေးယူမှုအသစ်တွေကို ချမှတ်ခဲ့တယ်လို့လည်း သိရပါတယ်။ 

အီရန်အစိုးရဟာ ရုရှားနိုင်ငံကို ပဲ့ထိန်းဒုံးကျည်တွေ ပေးပို့ခဲ့တာမျိုးမရှိဘူးလို့ အီရန်နိုင်ငံခြားရေးဝန်ကြီး Abbas Araqchi က စက်တင်ဘာလ(၁၈)ရက်မှာ ထုတ်ပြန်ပြောကြားခဲ့ပါတယ်။ ဒါ့ပြင် အီရန်အပေါ် အမေရိကန်နဲ့ အခြားဥရောပသုံးနိုင်ငံက ချမှတ်ထားတဲ့ပိတ်ဆို့အရေးယူမှုတွေဟာ အဖြေမဟုတ်ဘူးလို့လည်း Abbas Araqchi က ပြောကြားခဲ့ပါတယ်။