ရောင်နီ (NSS) - စက်တင်ဘာ ၁၇

          ထိုင်းနိုင်ငံ၊ ဘန်ကောက်မြို့အနီး၊ ချွန်ဘူရီခရိုင်၊ Khao Kheow Open Zoo မှာ မကြာသေးခင်ကမှ ပေါက်ဖွားလာတဲ့ ရေမြင်းပေါက်လေး မူးတင်ဟာ အင်တာနက်ပေါ်မှာ ရေပန်းစား ကျော်ကြားလာနေပြီး သူ့ကိုကြည့်ဖို့ တိရစ္ဆာန်ရုံကို လာရောက်မယ့် လူအုပ်ကြီးကို ဆွဲဆောင်နေပါတယ်။ 

         မူးတင်ရဲ့ချစ်စရာကောင်းတဲ့ အပြုအမူလေးတွေ၊ သွားမရှိသေးပေမယ့် ပါးစပ်လေးဟပြီး ဧည့်သည်တစ်ယောက်ရဲ့လက်ကို ကိုက်ဖို့ကြိုးစားပုံလေးတွေဟာ ဆိုရှယ်မီဒီယာမှာ သန်းနဲ့ချီတဲ့ ပရိသတ်တွေကို ဆွဲဆောင်နေခဲ့ပါတယ်။ ပုံမှန် တိရစ္ဆာန်ရုံကို မိုးရာသီ လာရောက်တဲ့ ဧည့်သည်အရေအတွက်ဟာ သီတင်းပတ်ကုန်ပိတ်ရက်မှာတောင် ပျှမ်းမျှ ၈၀၀ ဝန်းကျင်သာရှိခဲ့ရာမှ ယခု weekday မှာ လာရောက်လည်ပတ်သူ အရေအတွက် ၃,၀၀၀ မှ ၄,၀၀၀ ကြား လာရောက်စေခဲ့တယ်လို့ သိရပါတယ်။ အဲဒီလာရောက်လည်ပတ်သူ အများစုဟာ မူးတင်ကိုကြည့်ဖို့ တန်းစီနေကြတာ ဖြစ်တယ်လို့ တိရစ္ဆာန်ရုံ တာဝန်ရှိသူတွေက ဆိုပါတယ်။ 

       မူးတင်ရဲ့အဖွားမာလီဟာ ထိုင်းနိုင်ငံရဲ့ အသက်အကြီးဆုံး ရေမြင်းဖြစ်ပြီး အသက် ၅၉ နှစ် ပြည့်ပြီးပြီ ဖြစ်တယ်လို့ သိရပါတယ်။