Pika (NSS) - စက်တင်ဘာ ၁၆ 

ပြီးခဲ့တဲ့ ဇန်နဝါရီလက အမေရိကန်နဲ့တရုတ်တို့ကြား ပြန်လည်စတင်ခဲ့တဲ့ဆွေးနွေးပွဲတွေကို ဆက်လက်လုပ်ဆောင် ဖို့အတွက် နှစ်နိုင်ငံစလုံးရဲ့စစ်ဘက်ဆိုင်ရာခေါင်းဆောင်တွေဟာ ဘေဂျင်းမြို့မှာ တွေ့ဆုံခဲ့တယ်လို့ သိရပါတယ်။ 

အဲဒီတွေ့ဆုံပွဲဟာ စက်တင်ဘာလ(၁၅)ရက်မှာ အဆုံးသတ်ခဲ့ပြီး စစ်ဘက်ဆိုင်ရာခေါင်းဆောင်တွေဟာ ထိုင်ဝမ်၊ ရုရှား-ယူကရိန်းစစ်ပွဲနဲ့ တောင်တရုတ်ပင်လယ်အတွင်း ထိပ်တိုက်တွေ့ဆုံမှုတွေလိုမျိုး ကိစ္စရပ်တွေကို ဆွေးနွေးခဲ့ ကြတယ်လို့လည်း သိရပါတယ်။ 

ပြီးခဲ့တဲ့ ဇန်နဝါရီလက နောက်ဆုံးကျင်းပခဲ့တဲ့ နှစ်နိုင်ငံကာကွယ်ရေးမူဝါဒညှိနှိုင်းဆွေးနွေးပွဲတွေကို ပြန်လည် စတင်ဖို့အတွက် ကိုယ်စားလှယ်အဖွဲ့တစ်ဖွဲ့ကို တရုတ်၊ ထိုင်ဝမ် နှင့် မွန်ဂိုလီးယားနိုင်ငံဆိုင်ရာ အမေရိကန် လက်ထောက်ကာကွယ်ရေးဝန်ကြီး မိုက်ကယ်ချေ့စ်က ဦးဆောင်ခဲ့တယ်လို့လည်း သိရပါတယ်။

ဆွေးနွေးပွဲတွေအတွင်း တောင်တရုတ်ပင်လယ်အရေးအပြင် ထိုင်ဝမ်အရေးတို့နဲ့ပတ်သက်ပြီး သဘောထားကွဲလွဲမှု တွေကို ပြေလည်အောင်ဖြေရှင်းဖို့ မျှော်လင့်ထားတာမျိုးမရှိပေမယ့်လည်း အမေရိကန်ဟာ ပဋိပက္ခကို ရှောင်ရှားဖို့ နည်းလမ်းတစ်ခုအဖြစ် ဆွေးနွေးပွဲတွေ ဆက်လက်လုပ်ဆောင်ဖို့ တွန်းအားပေးခဲ့တယ်လို့လည်း သိရပါတယ်။

ဘေဂျင်းမြို့မှာ Xiangshan လုံခြုံရေးဖိုရမ်ကို ကျင်းပပြီးနောက် ရက်ပိုင်းအကြာမှာ အမေရိကန်နဲ့ တရုတ်တို့ရဲ့ စစ်ဘက်ဆိုင်ရာခေါင်းဆောင်တွေ တွေ့ဆုံဆွေးနွေးမှု ထွက်ပေါ်လာတာဖြစ်ပါတယ်။ အဲဒီဆွေးနွေးပွဲအတွင်း နှစ်နိုင်ငံစလုံးဟာ ယူကရိန်းစစ်ပွဲအတွင်း ရုရှားအတွက် တရုတ်ရဲ့ထောက်ခံမှုတွေအပြင် တောင်တရုတ်ပင်လယ် အရေးနဲ့ပတ်သက်ပြီး တရုတ်ရဲ့လုပ်ရပ်တွေကို ဆွေးနွေးခဲ့ကြတယ်လို့ အမေရိကန်အကြီးတန်းကာကွယ်ရေး အရာရှိတစ်ဦးက ထုတ်ပြန်ပြောကြားခဲ့ပါတယ်။