Pika (NSS) - စက်တင်ဘာ ၁ဝ

အမေရိကန် နဲ့ တရုတ်တို့ဟာ နှစ်နိုင်ငံကြားစစ်ရေးအရ ဆက်ဆံမှုတွေ တည်ငြိမ်စေဖို့နဲ့ စစ်ရေးအရနားလည်မှုလွဲမှားနေတာတွေကို ကာကွယ်ဖို့အတွက် ကြိုးပမ်းနေမှုနဲ့အတူ စက်တင်ဘာလ(၁၀)ရက်နေ့မှာ နှစ်နိုင်ငံစလုံးရဲ့ ထိပ်တန်းစစ်ဘက်အရာရှိတွေဟာ ပထမဆုံးအကြိမ် video call ခေါ်ဆိုမှုတွေကို လုပ်ဆောင်ခဲ့တယ်လို့ သိရပါတယ်။ 

ပြီးခဲ့တဲ့နှစ်မှာ တရုတ်ရဲ့မိုးပျံပူဖောင်းတစ်လုံးကို ပစ်ချပြီးနောက်ပိုင်း ဆက် ဆံရေးတွေတင်းမာလာခဲ့ပြီးနောက် အမေရိကန်ဟာ တရုတ်နဲ့စစ်ရေးအရ ပုံမှန်ဆက်သွယ်မှု လမ်းကြောင်းအသစ်တွေကိုဖွင့်ဖို့ ကြိုးပမ်းနေတယ်လို့လည်း သိရပါတယ်။ အမေရိကန် အင်ဒို-ပစိဖိတ်စစ်ဌာနချုပ်အကြီးအကဲ ရေတပ်ဗိုလ်ချုပ် Sam Paparo ဟာ တရုတ်စစ်တပ်ရဲ့တောင်ပိုင်းစစ်ကွပ်ကဲမှုဌာနချုပ်အကြီးအကဲ Wu Yanan နဲ့ video call ခေါ်ဆိုမှုလုပ်ဆောင်ခဲ့တာဖြစ်တယ်လို့လည်း သိရပါတယ်။

ဒါ့ပြင်နှစ်ဘက်စလုံးဟာ လက်ရှိဖြစ်ပွားနေတဲ့ပြဿနာတွေနဲ့ပတ်သက်တဲ့ အမြင်တွေကို နက်နက်ရှိုင်းရှိုင်းဖလှယ်ခဲ့ကြတယ်လို့ တရုတ်ကာကွယ်ရေးဝန်ကြီးဌာနကပြောကြားခဲ့ပါတယ်။ အမေရိကန် အင်ဒို-ပစိဖိတ်စစ်ဌာနချုပ်ဟာ အဲဒီကိစ္စနဲ့ပတ်သက်ပြီး မှတ်ချက်ပေးဖို့တောင်းဆိုတာတွေကို ချက်ချင်းပြန်လည်တုံ့ပြန်ဖြေကြားတာမျိုးမရှိသေးဘူးလို့လည်း သိရပါတယ်။ အမေရိကန်အမျိုးသားလုံခြုံရေးအကြံပေးဂျိတ်ဆူလီဗန်နဲ့ တရုတ်သမ္မတရှီကျင့်ဖျင်ရဲ့ စစ်ရေးအကြံပေးတို့ဟာ ပြီးခဲ့တဲ့လမှာ ဘေဂျင်းမြို့မှာတွေ့ဆုံခဲ့ပြီးနောက် ယခုလိုဖုန်းခေါ်ဆိုမှုတွေ ထွက်ပေါ်လာတာဖြစ်ပါတယ်။

အမေရိကန် အင်ဒို-ပစိဖိတ်စစ်ဌာနချုပ်ရဲ့ တာဝန်နယ်ပယ်ထဲမှာ တောင်တရုတ်ပင်လယ်နဲ့ထိုင်ဝမ်ရေလက်ကြားတို့ပါဝင်တယ်လို့လည်း သိရပါတယ်။ အဲဒီနေရာနှစ်ခုဟာ တရုတ်နဲ့အမေရိကန်ကြား တင်းမာမှုတွေကို မြင့်တက်စေတဲ့ အဓိကနေရာနှစ်ခုဖြစ်တယ်လို့လည်း သိရပါတယ်။ ဒါ့ပြင် အမေရိကန်အစိုးရဟာ ယခုသီတင်းပတ်နှောင်းမှာ တရုတ်နိုင်ငံမှာကျင်းပမယ့် အဓိကလုံခြုံရေးဖိုရမ်တစ်ခုကို အမေရိကန်စစ်ဌာနချုပ်ပင်တဂွန်ရဲ့ အကြီးတန်းအရာရှိတစ်ဦးကို စေလွှတ်ဖို့ စီစဉ်ထားတယ်လို့လည်း သိရပါတယ်။