Pika (NSS) - ဩဂုတ် ၃၁

ဩဂုတ်လ(၃၀)ရက်နေ့က မီးငြှိမ်းသတ်မှုတွေလုပ်ဆောင်ပြီးပြန်လာခဲ့တဲ့ ရဟတ်ယာဉ်တစ်စင်းဟာ ပေါ်တူဂီနိုင်ငံ မြောက်ပိုင်း Douro မြစ်ထဲကို ပျက်ကျခဲ့ရာ အနည်းဆုံးလူ(၄)ဦးသေဆုံးခဲ့ပြီး အခြားလူတစ်ဦးမှာ ပျောက်ဆုံးနေတယ်လို့ အာဏာပိုင်တွေက ပြောကြားခဲ့ပါတယ်။

ရဟတ်ယာဉ်ပျက်ကျရာနေရာအနီးမှာရှိတဲ့  ခရီးသွားသင်္ဘောတစ်စင်းက လေယာဥ်မှူးကို အသက်ရှင်လျက်ကယ်ဆယ်နိုင်ခဲ့တယ်လို့လည်း သိရပါတယ်။ အသက်ရှင်လျက်တွေ့ရှိခဲ့တဲ့ လေယာဉ်မှူးဟာ ခြေထောက်ကျိုးသွားခဲ့တာကြောင့် ဆေးရုံကို အလျင်အမြန်ပို့ဆောင်ပေးခဲ့ရတယ်လို့လည်း သိရပါတယ်။ အဲဒီရဟတ်ယာဉ်ပေါ်မှာ လေယာဉ်မှူးအပြင် အရေးပေါ်ကာကွယ် ရေးနဲ့ကယ်ဆယ်ရေးဌာနက အထူးကျွမ်းကျင်သူ(၅)ဦးပါဝင်တဲ့အဖွဲ့တစ်ဖွဲ့ လိုက်ပါလာခဲ့တာဖြစ်တယ်လို့လည်း သိရပါတယ်။ 

Douro ဆိပ်ကမ်းအာဏာပိုင်အဖွဲ့မှူး Rui Silva Lampreia က 'ရဟတ် ယာဉ်အတွင်းပိုင်းမှာ ရုပ်အလောင်းနှစ်ခုကိုတွေ့ရှိခဲ့ပြီး အခြားရုပ်အလောင်းနှစ်ခုကို ရဟတ်ယာဉ်ရဲ့အမြီးပိုင်းနားမှာတွေ့ရှိခဲ့ပါတယ်။ ပျက်ကျချိန်အတွင်းမှာ ရဟတ်ယာဉ်က နှစ်ခြမ်းကွဲထွက်သွားခဲ့ပါတယ်။ ရဟတ်ယာဉ်နဲ့ ကမ်းနားပိုင်းမှာ ရေအောက်ရှာဖွေမှုတွေကို ဆက်လက်လုပ်ဆောင်နေပါတယ်'လို့ ပြောဆိုခဲ့ပါတယ်။

ရဟတ်ယာဉ်ပျက်ကျမှု ဘာကြောင့်ဖြစ်သွားရတယ်ဆိုတဲ့အချက်ကိုတော့ ယခုအချိန်အထိ ရှင်းရှင်းလင်းလင်း မသိရှိရသေးဘူးလို့ သိရပါတယ်။ ဒါဇင်နဲ့ချီတဲ့ ကယ်ဆယ်ရေးသမားတွေ၊ ရေကြောင်းရဲတွေ၊ ရေငုပ်သမားတွေ နဲ့ လေတပ်ရဟတ်ယာဉ်နှစ်စင်းတို့ဟာ မြစ်အတွင်းမှာ ရှာဖွေကယ်ဆယ်ရေးလုပ်ငန်းတွေကို ဆက်လက်လုပ်ဆောင်နေတယ်လို့လည်း သိရပါတယ်။