ALynn (NSS) - ဩဂုတ် ၂၇

ပါကစ္စတန်သည် အောက်တိုဘာလတွင် ကျင်းပမည့် ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) အစည်းအဝေးသို့ အိန္ဒိယ၀န်ကြီးချုပ် နာရင်ဒရာမိုဒီအား ဖိတ်ကြားခဲ့သည်။ လက်ရှိတွင် ပါကစ္စတန်သည် အဖွဲ့အစည်း၏ ဒုတိယအရေးကြီးဆုံး ဆုံးဖြတ်ချက်ချသည့်အဖွဲ့ဖြစ်သော အစိုးရအကြီး အကဲများကောင်စီ၏ အလှည့်ကျဥက္ကဋ္ဌတာဝန်ကို ထမ်းဆောင်လျက်ရှိသည်။ 

မိုဒီသည် အဆိုပါပွဲကို တက်ရောက်မှာမဟုတ်သော်လည်း ယခင်က လုပ်ဆောင်ခဲ့သည့်အတိုင်း အိန္ဒိယကို ကိုယ်စားပြုမည့် ဝန်ကြီးတစ်ဦးကို တာဝန်ယူတက်ရောက်ခိုင်းခဲ့ကြောင်း Times of India က တနင်္ဂနွေနေ့ (ဩဂုတ်လ ၂၅ ရက်) တွင် ဖော်ပြခဲ့သည်။ ဝန်ကြီးချုပ်သည် ဇူလိုင်လက ကာဇက်စတန်တွင် နောက်ဆုံးကျင်းပခဲ့သည့် SCO ထိပ်သီးအစည်းအဝေးကိုလည်း ပါလီမန် အစည်းအဝေးနှင့် တိုက်ဆိုင်နေသည့်အပြင် မော်စကိုခရီးစဉ်နှင့် နီးကပ်နေသောကြောင့် မတက်ရောက်နိုင်ခဲ့ပေ။ အိန္ဒိယနိုင်ငံခြား ရေးဝန်ကြီး Subrahmanyam Jaishankar က ၎င်းထိပ်သီးအစည်းအဝေးတွင် နိုင်ငံကိုယ်စားပြု တက်ရောက်ခဲ့သည်။

အိန္ဒိယနှင့် ပါကစ္စတန်နှစ်နိုင်ငံစလုံးသည် 2017 ခုနှစ် ဇွန်လကတည်းက ပေကျင်းအခြေစိုက် SCO ၏အဖွဲ့ဝင်များဖြစ်ခဲ့သည်။ သို့သော် အိန္ဒိယသည် SCO တွင် တရုတ်နိုင်ငံ၏ သြဇာလွှမ်းမိုးမှုကို သတိထားစောင့်ကြည့်လျက်ရှိပြီး ပေကျင်း၏ Belt and Road Initiative ကို ပူးတွဲထုတ်ပြန် ချက်တွင် ထောက်ခံရန် ငြင်းဆိုထားသည်။ အိန္ဒိယသည် “SCO အား အနောက်တိုင်း ဆန့်ကျင်ရေး အဖွဲ့တစ်ခုအဖြစ် အသုံးချရန် ကြိုးပမ်းအားထုတ်မှုများ” အတွက်လည်း စိုးရိမ်မိကြောင်း ဖော်ပြခဲ့သည်။

အိန္ဒိယနှင့် ပါကစ္စတန်တို့၏ ဆက်ဆံရေးသည် သမိုင်းကြောင်းအရ တင်းမာခဲ့ပြီး မကြာသေးမီ နှစ်များအတွင်း ပိုမိုဆိုးရွားလာခဲ့သည်။ ယင်းအငြင်းပွားမှုသည် မွတ်ဆလင်အများစုနေထိုင်ရာ ကက်ရှ်မီးယားကို နှစ်နိုင်ငံစလုံးမှ တောင်းဆိုရာမှ အခြေခံလာခဲ့သည်။ အိမ်နီးချင်းနှစ်နိုင်ငံသည် ဒေသတွင်းတွင် စစ်ပွဲများစွာ ဆင်နွှဲခဲ့ဖူးသည်။ ၂၀၂၁ ခုနှစ်၊ ဖေဖော်ဝါရီလတွင် အပစ်အခတ်ရပ်စဲရေး သဘောတူညီခဲ့သော်လည်း တိုက်ပွဲများ ကြိုကြားကြိုကြားဖြစ်နေဆဲဖြစ်သည်။

အိန္ဒိယက ပါကစ္စတန်ကို “နယ်စပ်ဖြတ်ကျော် အကြမ်းဖက်ဝါဒ” ကို ထောက်ခံသည်ဟု အကြိမ်ကြိမ်စွပ်စွဲခဲ့သည်။ ပြီးခဲ့သောလတွင် အိန္ဒိယ၀န်ကြီးချုပ်မိုဒီက ပါကစ္စတန်အား အကြမ်းဖက်သမားများကို ကျောထောက် နောက်ခံပေးနေကြောင်း စွပ်စွဲခဲ့သည်။ တစ်ဖန် ပါကစ္စတန်က အိန္ဒိယသည် “နိုင်ငံရပ်ခြားနယ်မြေများတွင် ပစ်မှတ်ထား လုပ်ကြံသတ်ဖြတ်မှုများ၊ အဖျက်အမှောင့်နှင့် အကြမ်းဖက်ဝါဒကို ကြိုးကိုင်ခြင်းများကို ဆောင်ရွက် နေကြောင်း” စွပ်စွဲခဲ့သည်။ ယခုနှစ်အစောပိုင်းက အကြမ်းဖက်အဖွဲ့များနှင့် ဆက်နွှယ်နေသည် ဟူသော စွပ်စွဲချက်ဖြင့် ပါကစ္စတန်နိုင်ငံသားနှစ်ဦးကို အိန္ဒိယအေးဂျင့်များက သတ်ဖြတ်ခဲ့သည်ဟု အစ္စလာမာဘတ်က အခိုင်အမာဆိုသည်။ နယူးဒေလီက ယင်းမှာ “မှားယွင်းပြီး အခြေအမြစ် မရှိသော” ဝါဒဖြန့်မှုအဖြစ် ပယ်ချခဲ့သည်။