ရောင်နီ (NSS) - ဩဂုတ် ၂၇

          တောင်ကိုရီးယား အမျိုးသား K-pop အဖွဲ့ BTS ရဲ့ အဖွဲ့ဝင် Suga ဟာ တောင်ကိုရီးယားနိုင်ငံ၊ ဆိုးလ်မြို့မှာ အရက်မူးပြီး စကူတာမောင်းခဲ့မိတဲ့ ဖြစ်ရပ်အတွက် လက်ရေးစာနဲ့ တောင်းပန်စာ တစ်စောင်ရေးကာ ပရိသတ်တွေကို ထပ်မံတောင်းပန်ခဲ့ပါတယ်။ 

          လူမှုဝန်ဆောင်မှုအေးဂျင့်အဖြစ် လက်ရှိစစ်မှုထမ်းနေတဲ့ အသက် ၃၁ နှစ်အရွယ် Suga ရဲ့ အဆိုပါတောင်းပန်စာကို BTS ရဲ့ Weverse စာမျက်နှာမှာ တနင်္ဂနွေနေ့ညနေ (သြဂုတ် ၂၅) က တင်ခဲ့တာ ဖြစ်ပါတယ်။ Suga ဟာ ဩဂုတ်လ ၆ ရက် က အရက်မူးပြီး အီးစကူတာ မောင်းနှင်မှုနဲ့ အဖမ်းခံခဲ့ရကာ ယာဉ်မောင်းလိုင်စင်ပါ ရုတ်သိမ်းခံလိုက်ရတာ ဖြစ်ပါတယ်။ ဒီအတွက် Suga က သူ့ရဲ့ ပရိသတ်တွေကို စိတ်ပျက်စေမိတဲ့အတွက် ဩဂုတ်လ ၇ ရက်က ချက်ချင်းတောင်းပန်ခဲ့ပါတယ်။ ဒါ့ပြင် အဲဒီဖြစ်ရပ်ကြောင့် ဝေဖန်မှုတွေ ပြင်းပြင်းထန်ထန်ခံစားခဲ့ရပြီး သူ့ရဲ့အဖွဲ့ဖြစ်တဲ့ BTS ရဲ့ နာမည်ဂုဏ်သတင်းကိုပါ ထိခိုက်စေခဲ့တာတာကြောင့် ကျန်အဖွဲ့ဝင်တွေနဲ့ ပရိသတ်တွေကို သူကိုယ်တိုင်ရေးသားတဲ့ လက်ရေးစာနဲ့ ဒုတိယအကြိမ် ထပ်မံတောင်း ပန် ခဲ့ပါတယ်။

             "ပရိသတ်တွေရဲ့ စိတ်ပျက်စေမှုကို ပြန်ပြုပြင်ဖို့ဆိုတာ ခက်ခဲမယ်ဆိုတာ သိပါတယ်၊ ဒါကြောင့် ကျွန်တော့်ရဲ့လုပ်ရပ်တွေကို နောင်တရပြီး လေးနက်တဲ့ နှလုံးသားနဲ့ နေ့တိုင်း ပြန်တွေးကြည့်မိပါတယ်။ ဘယ်လိုပြစ်ဒဏ်ကိုမဆို ဝမ်းမြောက်စွာလက်ခံပါမယ်။ ဝေဖန်မှုနဲ့ ပြစ်တင်ရှုတ်ချခြင်းတို့ကိုလည်း ကျေကျေနပ်နပ်လက်ခံပါတယ်"လို့ ဆိုလိုတဲ့ လက်ရေးစာကို ရေးသားကာ ထပ်မံတောင်းပန်ခဲ့တာ ဖြစ်ပါတယ်။ 

တောင်ကိုရီးယားမှာ နာမည်ကျော်တွေ အရက်မူးပြီး ယာဉ်မောင်းနှင်ခြင်း၊ ဆေးလိပ်သောက်ခြင်းလို အမူအကျင့်တွေကို ပြင်းပြင်းထန်ထန်ရှုတ်ချဝေဖန်ကြလေ့ရှိပြီး အဲဒီဝေဖန်မှုတွေဟာ အနုပညာရှင်တွေအတွက် သူတို့ရဲ့ လမ်းကြောင်း ဆက်မရပ်တည်နိုင်တော့လောက်အောင်ထိ ပြင်းထန်လေ့ ရှိပါတယ်။