ဂျန်ဇက် (NSS) - ဩဂုတ် ၁၉

     ဘင်္ဂလားဒေ့ရှ်နိုင်ငံသည် တက္ကသိုလ်ကျောင်းသားများဦးဆောင်သော ဆန္ဒပြပွဲများကြောင့် ရာထူး မှနုတ်ထွက်ကာ ပြည်ပထွက်ပြေးခဲ့သော ဝန်ကြီးချုပ်ဟောင်း ရှိတ်ဟာစီနာကို အိန္ဒိယနိုင်ငံထံမှ ပြန်လည်လွှဲပြောင်းရယူသွားမည်ဖြစ်ကြောင်း သိရသည်။ 

     ဘင်္ဂလားဒေ့ရှ်နိုင်ငံတွင် ဇူလိုင်လအတွင်း ဖြစ်ပွားခဲ့သော ဆန္ဒပြပွဲများကြောင့် လူသေဆုံးမှုများအပြင် ပြန်ပေး ဆွဲခံရခြင်းများရှိခဲ့ရာ ဘင်္ဂလားဒေ့ရှ်တရားရုံးက ရှိတ်ဟာစီနာအပြင် ဘင်္ဂလားဒေ့ရှ်အစိုးရအဖွဲ့တွင် ပါဝင်ခဲ့သူများကို လူသတ်မှုအတွက် စွဲချက်တင်ခဲ့ကြောင်း သိရသည်။ 

     ထို့အတွက်ကြောင့် ဘင်္ဂလားဒေ့ရှ် ယာယီ အစိုးရအဖွဲ့သည် ရှိတ်ဟာစီနာကို အိန္ဒိယနိုင်ငံထံမှ တရားခံလွှဲပြောင်းရယူရေးပုံစံမျိုးဖြင့် ပြန်လည်လွှဲ ပြောင်းယူသွားဖွယ်ရှိနေကြောင်း သတင်းများထွက်ပေါ်နေသည်။ ရှိတ်ဟာစီနာသည် ဘင်္ဂလားဒေ့ရှ် ဝန်ကြီးချုပ်အဖြစ် (၁၅)နှစ်ကြာ တာဝန်ယူပြီးနောက် ကျောင်းသားများဦးဆောင်သော ဆန္ဒပြပွဲများကြောင့် ဩဂုတ်လအစောပိုင်းတွင် အိန္ဒိယသို့ ထွက်ပြေးခဲ့ကာ ဒုက္ခသည်အဖြစ် နေထိုင်ခွင့်ရရန် ကြိုးပမ်းနေကြောင်း သိရသည်။ တက်ြွကလှုပ်ရှားသူတစ်ဦးဖြစ်ပြီး တရားလိုတစ်ဦးဖြစ်သည့် ရက်တူမူဟမ်မက်က ဆန္ဒပြကျောင်းသားများကို ကျည်ဆန်အစစ်သုံးပြီး ပစ်ခတ်မှုကျူးလွန်ရန် အမိန့်ပေးခဲ့ခြင်းများအတွက် ရှိတ်ဟာစီနာသည် လူသတ်မှုကျူးလွန်ခဲ့သူ ဖြစ်ကြောင်း စွပ်စွဲထားသည်။ 

     ယာယီအစိုးရအဖွဲ့တွင် ပါဝင်နေသည့် နိုင်ငံခြားရေးဝန်ကြီး ဟူစိန်က " ရှိတ် ဟာစီနာဟာ စွဲချက်တွေကို ရင်ဆိုင်ရမှာဖြစ်တယ်။ဘင်္ဂလားဒေ့ရှ်အစိုးရတာဝန်ရှိသူတွေကို သူ့ကို ဘင်္ဂလားဒေ့ရှ်နိုင်ငံကိုပြန်လာပြီး တရားရင်ဆိုင်ဖို့ တောင်း ဆိုမယ်"ဟု ပြောသည်။ ဘင်္ဂလားဒေ့ရှ် ယာယီအစိုးရအဖွဲ့၏ နိုင်ငံခြားရေးဝန်ကြီးသည် ဘင်္ဂလားဒေ့ရှ်နိုင်ငံ ဆိုင်ရာ အိန္ဒိယသံရုံးတာဝန်ရှိသူများနှင့်တွေ့ဆုံဆွေး နွေးခဲ့ပြီး ရှိတ်ဟာစီနာနှင့်ပတ်သက်ပြီး အိန္ဒိယသံရုံး တာဝန်ရှိသူများ၏ ပြောဆိုချက်များက အပြန်အလှန် ဆက်ဆံရေးပိုမိုကောင်းမွန်စေရန်အတွက် အပြုသဘောမဆောင်ကြောင်း ပြောသည်။ 

    ရှိတ်ဟာစီနာသည် လက်ရှိအချိန်တွင် အိန္ဒိယနိုင်ငံတွင်နေထိုင်နေသော်လည်း ဘင်္ဂလားဒေ့ရှ်ယာယီအစိုးရက ရွေးကောက်ပွဲ တစ်ကျော့ပြန်ကျင်းပချိန်တွင် မိခင်နိုင်ငံသို့ ပြန်လာဖွယ်ရှိနေကြောင်း ရှိတ်ဟာစီနာ၏သားဖြစ်သူက ပြောသည်။