ဂျန်ဇက် (NSS) - ဩဂုတ် ၁၉

     အစ္စရေး နှင့် ဟားမတ်စ်လက်နက်ကိုင်အဖွဲ့ ကြားဖြစ်ပွားနေသည့်စစ်ပွဲကြောင့် အနည်းဆုံး လူပေါင်း(၄၀ဝဝဝ)ကျော် သေဆုံးခဲ့ကြောင်း ပါလက်စတိုင်း ကျန်းမာရေးဝန်ကြီးဌာနက သတင်းထုတ်ပြန်ထားသည်။ 

ဂါဇာဒေသကို အစ္စရေး၏ထိုးစစ်ဆင်တိုက် ခိုက်မှုများကြောင့် (၁၀)လကျော်အတွင်း လူပေါင်း (၉၂၄၀၁)ဦး ဒဏ်ရာရခဲ့ပြီး ဂါဇာဒေသတွင် နေထိုင် နေသည့်အိမ်များအနက်မှ (၈၅)ရာခိုင်နှုန်းခန့် နေရပ် စွန့်ခွာနေထိုင်ခဲ့ရကြောင်း၊ သေဆုံးသူ အရေအတွက် သည်လက်ရှိထက်ပိုမိုမြင့်တက်လာဖွယ်ရှိနေကြောင်း ပါလက်စတိုင်း ကျန်းမာရေးဝန်ကြီးဌာနကဖော်ပြထား သည်။ 

      အစ္စရေးသည် ဂါဇာဒေသကို တိုက်ခိုက်ရာတွင် မြေပြင်ထိုးစစ်ဆင်မှုများသာမက လေကြောင်းမှတိုက် ခိုက်မှုများလုပ်ဆောင်ခဲ့ရာ ပြိုကျပျက်စီးခဲ့သော အဆောက်အအုံများထဲတွင် ပိတ်မိနေသူများနှင့် ရုပ်အလောင်းများ ဆက်လက်ရှိနိုင်ဖွယ်ရှိနေသည်ဟု ပါလက်စတိုင်း ကျန်းမာရေးဝန်ကြီးကပြောသည်။ ဟားမတ်စ်လက်နက်ကိုင်အဖွဲ့သည် ၂၀၂၃ ခုနှစ် အောက် တိုဘာလ ၇ ရက်နေ့က အစ္စရေးကို ရုတ်တရက်တိုက်ခိုက်ခဲ့ပြီး အမေရိကန်နိုင်ငံသားများ အပါအဝင် လူပေါင်း (၂၅၀) ကျော်ကို ဖမ်းဆီးခေါ် ဆောင်ခဲ့ကြောင်း သိရသည်။ အစ္စရေးအစိုးရက ဖမ်းဆီးခံရသူများအနက်မှ လူပေါင်း (၁၁၁)ဦး ပြန် လည်လွတ်မြောက်ခြင်း မရှိသေးကြောင်း၊ အဆိုပါ လူပေါင်း (၁၁၁)ဦးထဲတွင် ရုပ်အလောင်း (၃၉)ဦး နှင့်အတူ အမျိုးသမီးနှင့်ကလေးငယ်များကိုလည်း ထည့်သွင်းတွက်ချက်ခြင်းဖြစ်ကြောင်း သိရသည်။

အစ္စရေးနှင့် ဟားမတ်စ်လက်နက်ကိုင် အဖွဲ့ကြားဖြစ်ပွားနေသည့် ဂါဇာစစ်ပွဲအပစ်ခတ်ရပ်စဲပြီး ဖမ်းဆီးခံထားရသူများအမြန်ဆုံး ပြန်လွတ်မြောက်စေရန် အမေရိကန်၊ ကာတာနှင့် အီဂျစ်နိုင်ငံတို့ ကြား ဝင်ဆောင်ရွက်နေသော်လည်း (၁၀)လကျော်ချိန် အထိ အပစ်ခတ်ရပ်စဲရေးရယူနိုင်ခြင်းမရှိသေးဘဲ တိုက်ပွဲများ ဆက်လက်ဖြစ်ပွားနေဆဲဖြစ်ကြောင်းသိရသည်။ 

   အစ္စရေးအစိုးရက ၎င်းတို့သည် ဂါဇာဒေသ ကို တိုက်ခိုက်ရာတွင် ဟားမတ်စ်လက်နက်ကိုင်အဖွဲ့ကို ရည်ရွယ်တိုက်ခိုက်ခဲ့ခြင်းမျိုးဖြစ်ကြောင်း ပြောသည်။ အစ္စရေးက ဟားမတ်စ်လက်နက်ကိုင်အဖွဲ့သည် လူနေရပ်ကွက်ပတ်ဝန်းကျင်နှင့်ဆက်နွှယ်နေသည့် နေရာများတွင် စစ်ဆင်ရေးလုပ်ငန်းများ လုပ်ကိုင်ခဲ့သလို လူနေပတ်ဝန်းကျင်နှင့် ဆက်နွှယ်နေသည့် နေရာတွင် မြေအောက်စခန်းများထားရှိခဲ့ကြောင်း ပြောသည်။

အစ္စရေးကာကွယ်ရေးဝန်ကြီးဌာနက ဂါဇာဒေသကို တိုက်ခိုက်ခဲ့ခြင်းကြောင့် ဟားမတ်စ်လက် နက်ကိုင်အဖွဲ့ဝင် အနည်းဆုံး (၁၄၀ဝဝ)ကျော် သေဆုံးထားကြောင်း၊ ဟားမတ်စ်လက်နက်ကိုင် အဖွဲ့ဝင်အရေအတွက် တစ်ဝက်နီးပါး ထိခိုက်ပျက်စီးခဲ့ရခြင်းဖြစ်ကြောင်း ပြောသည်။