Pika (NSS) - ဩဂုတ် ၁၉

မြောက်ကိုရီးယားအစိုးရသည် ကိုဗစ်(၁၉)ကပ်ရောဂါကာလအစောပိုင်း ၂၀၂၀ ပြည့်နှစ် ဇန်နဝါရီလကတည်းက ပိတ်ထားခဲ့သော ခရီးသွားလုပ်ငန်း တစ်စိတ်တစ်ပိုင်းကို ယခုနှစ်နှောင်းပိုင်းတွင် ပြန်လည်ဖွင့်လှစ်တော့မည်ဖြစ်ကြောင်း တရုတ်အခြေစိုက် ခရီးသွားအော်ပရေတာတစ်ခု၏ ပြောကြားချက်အရသိရသည်။ 

မြောက်ကိုရီးယားနိုင်ငံသို့ ခရီးစဉ်များကို ၂၀၂၄ ခုနှစ် ဒီဇင်ဘာလတွင် တရားဝင်ပြန်လည်စတင်တော့မည်ဖြစ်ကြောင်း ဘေဂျင်းအခြေစိုက် ခရီးသွားကုမ္ပဏီ Koryo Toursu က ဩဂုတ်လ(၁၄)ရက်နေ့တွင် ထုတ် ပြန်ကြေညာခဲ့သည်။ ထုတ်ပြန်ချက်တွင် ‘‘ဒီကြေညာချက်ကို ထုတ်ပြန်ဖို့ စောင့်နေတာ (၄)နှစ်လောက်ရှိပါပြီ။ မြောက်ကိုရီးယားခရီးသွားလုပ်ငန်းကို တစ်ဖန် ပြန်လည်ဖွင့်လှစ်ဖို့အတွက် တကယ်ကိုစိတ်လှုပ်ရှားမိပါတယ်”ဟု ရေး သားထားသည်။

မြောက်ကိုရီးယားနိုင်ငံသည် ကိုဗစ်(၁၉)ကပ်ရောဂါကာလအစောပိုင်း ၂၀၂၀ ပြည့်နှစ်ဇန်နဝါရီလတွင် ယင်းနယ်စပ်များကို ပိတ်ပစ်လိုက်ပြီး ကိုဗစ်(၁၉) ကပ်ရောဂါကြောင့် နိုင်ငံတွင်းသို့ ဝင်ရောက်ခွင့်ပိတ်လိုက်သော ပထမဆုံး နိုင်ငံဖြစ်လာခဲ့သည်။ Koryo Tours ကုမ္ပဏီက ‘‘ဒီပြန်လည်ဖွင့်လှစ်မှုဟာ Samjiyon မြို့မှာ စတင်မှာပါ။ ဒါပေမဲ့လည်း ပြုံးယမ်း ဒါမှမဟုတ် အခြားနေရာတွေကို ဝင်ရောက်ခွင့်ကိုတော့ ကန့်သတ်ထားဦးမှာပါ။ Samjiyon မြို့ဟာ ဆောင်းရာသီအချိန်အတွင်း မြောက်ကိုရီးယားမှာ ခရီးသွားတွေအတွက် အဓိကနေရာတစ်ခုပဲ ဖြစ်ပါတယ်။ မကြာခင် ခရီးသွားဖို့ မျှော်လင့်နေတဲ့ လူတွေကို ပြောချင်တာကတော့ အရာအားလုံးဟာ ပုံမှန်နဲ့တော့ အနည်းငယ်ကွဲပြားနေပါလိမ့်မယ်။ Samjiyon မြို့ဟာ ဆောင်းရာသီမှာ ခရီးသွားတွေအတွက် အကျော်ကြားဆုံးဒေသ ဖြစ်ပြီး နိုင်ငံရဲ့ထင်ရှားတဲ့မီးတောင် Mt. Paektu ရဲ့နေရာလည်း ဖြစ်ပါတယ်။ ကိုရီးယားကျွန်း ဆွယ်တစ်ခုလုံးအတွက်တော့ အဲဒီနေရာဟာ အထင်ရှားဆုံးနဲ့အမြင့်မြတ်ဆုံးနေရာတစ်ခုဖြစ် ပါတယ်”ဟု ပြောဆိုထားသည်။

နိုင်ငံတကာခရီးသွားများကို မကြာခင် စတင်လည်ပတ်ခွင့်ပေးမည်ဖြစ်သော်လည်း တောင်ကိုရီးယားနိုင်ငံသားများ လာရောက်လည်ပတ်ခွင့်ကို ခွင့်ပြုမည်မဟုတ်ကြောင်း ပြုံးယမ်းဘက်က ယုံကြည်ထားသည်။