Pika (NSS) - ဩဂုတ် ၁၉

ဩဂုတ်လ(၁၉)ရက်နေ့က တောင်တရုတ်ပင်လယ်အတွင်းမှာရှိတဲ့ အငြင်း ပွားကျွန်းတစ်ခုအနီးမှာ တရုတ်နဲ့ဖိလစ်ပိုင်တို့ရဲ့ သင်္ဘောတွေ တိုက်မိမှုဖြစ်ပွားခဲ့တယ်လို့ နှစ်နိုင်ငံစလုံးက ပြောကြားခဲ့ပါတယ်။

Sabina Shoal ကျွန်းအနီးမှာဖြစ်ပွားခဲ့တဲ့ သင်္ဘောတိုက်မိမှုနဲ့ပတ်သက်ပြီး နှစ်နိုင်ငံစလုံးက အပြန်အလှန်ပြစ်တင်ဝေဖန်မှုတွေ လုပ်ဆောင်ခဲ့ကြတယ်လို့လည်း သိရပါတယ်။ ပြီးခဲ့တဲ့လတွေအတွင်း တရုတ်နဲ့ဖိလစ်ပိုင်တို့ဟာ အငြင်းပွား တောင်တရုတ်ပင်လယ်အတွင်းမှာ ထိပ်တိုက်တွေ့ဆုံမှုတွေ မကြာခဏဖြစ်ပွားခဲ့ပြီး နှစ်နိုင်ငံကြားတင်းမာမှုတွေ မြင့်တက်လာခဲ့တယ်လို့သိရပါတယ်။ တောင်တရုတ်ပင်လယ်တစ်ခုလုံးနီးပါးကို ၎င်းတို့ပိုင်ဆိုင်ကြောင်း တရုတ်ဘက်က ပြောဆိုထားသလို ဖိလစ်ပိုင်၊ ဗီယက်နမ်၊ အင်ဒိုနီးရှား၊ မလေးရှား နဲ့ ဘရူနိုင်းနိုင်ငံတို့ကလည်း တောင်တရုတ်ပင်လယ်အတွင်း တစ်စိတ်တစ်ပိုင်းကို ၎င်းတို့ ပိုင်ဆိုင်တယ်လို့ အခိုင်အမာပြောဆိုထားပါတယ်။

ဩဂုတ်လ(၁၉)ရက်နေ့ အစောပိုင်းမှာ ဖိလစ်ပိုင်သင်္ဘောတစ်စီးဟာ တရုတ်သင်္ဘောတစ်စီးကို တမင်တကာဝင်တိုက်ခဲ့တယ်လို့ တရုတ်ကမ်းခြေစောင့် တပ်ဖွဲ့ပြောရေးဆိုခွင့်ရှိသူဂမ်ယုက ပြောကြားခဲ့ပါတယ်။ ဂမ်ယုက "ဖိလစ်ပိုင်ကမ်းခြေစောင့်သင်္ဘောတွေဟာ တရုတ်အစိုးရရဲ့ ခွင့်ပြုချက်မရှိဘဲ Spratly ကျွန်းစုမှာရှိတဲ့ Sabina Shoal ကျွန်းအနီးရေပြင်ကို တရားမဝင် ဝင်ရောက်ခဲ့ပါတယ်။ တရုတ်ကမ်းခြေစောင့်တပ်ဖွဲ့ဟာ တရားမဝင်ဝင်ရောက်လာတဲ့ ဖိလစ်ပိုင်သင်္ဘောတွေကို ဥပဒေနဲ့အညီ အရေးယူဆောင်ရွက်မှုတွေ လုပ်ဆောင်ခဲ့ပါတယ်'လို့ ပြောဆိုခဲ့ပါတယ်။ 

Sabina Shoal ကျွန်းအနီးမှာ တရုတ်သင်္ဘောတွေနဲ့ တိုက်မိမှုအတွင်း ဖိလစ်ပိုင်ကမ်းခြေစောင့်သင်္ဘောနှစ်စီး ထိခိုက်ပျက်စီးခဲ့တယ်လို့ ဖိလစ်ပိုင်စစ်တပ်က ထုတ်ပြန်ပြောကြားခဲ့ပါတယ်။ ဖိလစ်ပိုင်စစ်တပ်က'ဒီတိုက်မှုကြောင့် ဖိလစ်ပိုင်ကမ်းခြေစောင့်တပ်ဖွဲ့ရဲ့ သင်္ဘောနှစ်စီးမှာ သိသာတဲ့ထိခိုက်ပျက်စီးမှုတွေ ရှိခဲ့ပါတယ်'လို့ ပြောဆိုခဲ့ပါတယ်။