ALynn (NSS) - ဩဂုတ် ၁၇

အစ္စရေးသည် ဟားမတ်စ်ကို ဆက်လက်တိုက်ခိုက်နေပါက ဂါဇာရှိ ၎င်း၏ အဓိကရည်ရွယ်ချက် ပန်းတိုင်များထဲမှ တစ်စုံတစ်ရာကိုတောင် အောင်မြင်ဖို့ ခဲယဉ်းနိုင်မည်ဟု အမေရိကန်အစိုးရက ထုတ်ဖော်ပြောကြားခဲ့ကြောင်း New York Times က ဗုဒ္ဓဟူးနေ့ (ဩဂုတ်လ ၁၄ ရက်)တွင် ဖော်ပြခဲ့သည်။ 

ဂျိုးဘိုင်ဒန်အစိုးရက အစ္စရေးဝန်ကြီးချုပ် ဘင်ဂျမင်နေတန်ယာဟုအား အပစ်အခတ်ရပ်စဲရေးကို လက်ခံဖို့ ကြိုးပမ်းနေပြီး ပြီးခဲ့သည့်အောက်တိုဘာလ အတွင်းက ပါလက်စတိုင်းစစ်သွေးကြွများ နိုင်ငံတွင်းသို့ ကျူးကျော်ဝင်ရောက်လာစဉ် ဖမ်းဆီးထားသော ဓားစာခံများ ပြန်လည်လွတ်မြောက်ရေးအတွက် ကြိုးပမ်းနေသည်။

အစ္စရေးခေါင်းဆောင်အား အမေရိကန်အဆိုပြုထားသည့် သဘောတူညီချက်ကို လက်သင့်မခံရန် ၎င်း၏အစိုးရအဖွဲ့မှ လက်ယာယိမ်းအဖွဲ့ဝင်များထံမှ ဖိအားပေးခြင်းခံနေရသည်။ ဟားမတ်စ်အဖွဲ့၏ အောက်တိုဘာလ စီးနင်းတိုက်ခိုက်မှုကို တုံ့ပြန်သည့်အနေဖြင့် ချေမှုန်းပစ်ဖို့ ဂါဇာကမ်းမြောင် ဒေသရှိ ဟားမတ်စ်တို့အား ချေမှုန်းပစ်ရန် အစ္စရေးအစိုးရက ကျုံးဝါးခဲ့သည်။ 

CIA ဒါရိုက်တာ William Burns၊ ဘိုင်ဒန်၏ အရှေ့အလယ်ပိုင်း ညှိနှိုင်းရေးမှူး Brett McGurk နှင့် အိမ်ဖြူတော် အကြီးတန်း အကြံပေး Amos Hochstein တို့အပါအဝင် အကြီးတန်း အမေရိကန်အရာရှိများသည် ယခု သီတင်းပတ်အတွင်း အရှေ့အလယ်ပိုင်းသို့ လာရောက်ခဲ့ကြသည်။ 

၎င်းတို့၏တာဝန်များထဲမှ တစ်ခုသည် ဝါရှင်တန်၏သဘောထားကို ဒေသတွင်း သက်ဆိုင်သူများထံ မျှဝေရန်ဖြစ်ကြောင်း New York Times က ဖော် ပြခဲ့သည်။ ဟားမတ်စ်တပ်ဖွဲ့များသည် ဖိအားများကြားမှ ပြန်လည်စုဖွဲ့နိုင်သဖြင့် မကြာသေးမီက အစ္စရေးစစ်တပ်၏ စစ်ဆင်ရေးကို အမေရိကန်မှ လေ့လာသုံးသပ်သူများက “Whac-a-Mole ဗျူဟာတစ်ခု”အဖြစ် မြင်ကြသည်။

နေတန်ယာဟု အစိုးရအဖွဲ့မှ သဘောထားတင်းမာသူများသည် အပစ်အခတ်ရပ်စဲရေး အဆိုပြုချက်ကို လူသိရှင်ကြားပယ်ချခဲ့ပြီး အစ္စရေးသည် ပါလက်စတိုင်းနယ်မြေကို ပိတ်ဆို့ထားမည့်အစား တိုက်ပွဲများကို အရှိန်မြှင့်သင့်သည်ဟု ပြောဆိုခဲ့သည်။ “သူတို့ရဲ့လောင်စာတွေကို ဖြတ်လိုက်ရင် တစ်ပတ်အတွင်း သူတို့ ဒူးထောက်သွားလိမ့်မယ်။ ပြီးတော့ ကျွန်တော်တို့ အထောက်အပံ့ ထရပ်ကားတွေကို ရပ်လိုက်ရင် နှစ်ပတ်အတွင်း သူတို့ ဒူးထောက်သွားမှာပါ”ဟု အမျိုးသား လုံခြုံရေးဝန်ကြီး Itamar Ben-Gvir က ယခုသီတင်းပတ် အင်တာဗျူးတစ်ခုတွင် ပြောကြားခဲ့သည်။