Pika (NSS) - ဩဂုတ် ၁၇

ရုရှားလေတပ်ပိုင် Tupolev Tu-22M3 အသံထက်မြန်သည့်တာဝေးပစ်ဗုံးကြဲလေယာဉ်တစ်စင်းသည် ဆိုက်ဘေးရီးယားဒေသ အရှေ့တောင်ပိုင်းရှိ Irkutsk ဖက်ဒရယ်ခရိုင်တွင် ပျက်ကျခဲ့ကြောင်း ရုရှားကာကွယ်ရေးဝန်ကြီးဌာနက အတည်ပြုခဲ့သည်။

အဆိုပါဖြစ်ရပ်သည် ဩဂုတ်လ(၁၅)ရက်နေ့ ည(၁၀)နာရီအချိန်တွင် ပုံမှန်လေ့ကျင့်ပျံသန်းမှုတစ်ခုအတွင်းဖြစ်ပွားခဲ့ခြင်းဖြစ်ပြီး နည်းပညာပိုင်းဆိုင်ရာချို့ယွင်းမှုကြောင့် လေယာဉ်၏အင်ဂျင်များထဲမှတစ်ခုမှာ မီးလောင်ကျွမ်းသွားခဲ့ပုံပေါ်ကြောင်းလည်း သိရသည်။ အဆိုပါလေယာဉ်အမှုထမ်းများသည် အင်ဂျင်တစ်လုံးမီးလောင်ကျွမ်းသွားသည့်လေယာဉ်ကို အရပ်ဘက်နေရာများနှင့်ဝေးသည့် နေရာတစ်ခုသို့ ထိုးချခဲ့ကြောင်းလည်း သိရသည်။

ထို့ပြင် ထိုင်ခုံနှင့်အတူ ပထမဆုံးကန်ထွက်ခဲ့သော လေယာဉ်မှူး(၃)ဦးကို အသက်ရှင်လျက်တွေ့ရှိခဲ့ပြီး နောက်ဆုံးမှ ထိုင်ခုံနှင့်အတူကန်ထွက်ခဲ့သော လေယာဉ်မှူးသည် ခြေထောက်ကျိုးသွားခဲ့ကြောင်းလည်း သိရသည်။ အမျိုးမျိုးသော ထိခိုက်ဒဏ်ရာများရရှိခဲ့သည့် လေယာဉ်မှူး(၄)ဦးလုံးကို ဆေးရုံသို့ချက်ချင်းပို့ဆောင်ခဲ့ပြီး ၎င်းတို့အနက်မှတစ်ဦးမှာ ရရှိခဲ့သောဒဏ်ရာများဖြင့် ဆေးရုံတွင် သေဆုံးသွားခဲ့ကြောင်း ကာကွယ်ရေးဝန်ကြီးဌာန၏ သတင်းရင်းမြစ်များကို ကိုးကားပြီး Irkutsk ဒေသအုပ်ချုပ်ရေးမှူး အိုင်ဂေါကော့ဇက်ဗ်က ဩဂုတ်လ(၁၆)ရက်နေ့ အစောပိုင်းတွင်ပြောကြားခဲ့သည်။ 

အိုင်ဂေါကော့ဇက်ဗ်က 'လေယာဉ်မှူးတွေထဲက တစ်ဦးက အသက်မရှင်သန်နိုင်ခဲ့တဲ့အတွက် တကယ်ကိုဝမ်းနည်းမိပါတယ်။ သေဆုံးသွားတဲ့ လေယာဉ် မှူးရဲ့ မိသားစုဝင်တွေနဲ့ သူငယ်ချင်းတွေအတွက် တကယ်ကို စိတ်မကောင်းဖြစ်မိပါတယ်။ ဒါကကြီးမားတဲ့ဆုံးရှုံးမှုတစ်ခုပါ'ဟု ပြောဆိုခဲ့သည်။ အဆိုပါဖြစ်ရပ်သည် နည်းပညာပိုင်းဆိုင်ရာချို့ယွင်းမှုများကြောင့် ဖြစ်ပွားခဲ့ခြင်းဖြစ်နိုင်ဖွယ်ရှိကြောင်း အစောပိုင်းအစီရင်ခံစာများအရ သိရသည်။ လေယာဉ်ပျက်ကျရသည့် အကြောင်းအရင်းများကို တိတိကျကျသိရှိရန်အတွက် ကာကွယ်ရေးဝန်ကြီးဌာနက စုံစမ်းစစ်ဆေးမှုများ ဆက်လက်လုပ်ဆောင်နေကြောင်းလည်းသိရသည်။