ဂျန်ဇက် (NSS) - ဩဂုတ် ၅

 ဘင်္ဂလားဒေ့ရှ်နိုင်ငံမှာဖြစ်ပွားလျက်ရှိနေတဲ့ ဆန္ဒပြပွဲတွေကြောင့် ဝန်ကြီး ချုပ် ရှိတ်ဟာစီနာဟာ သြဂုတ်လ ၅ ရက်နေ့မှာ ရာထူးကနေ နုတ်ထွက်ပြီးထွက်ပြေးခဲ့ရကြောင်းသိရပါတယ်။ ဘင်္ဂလားဒေ့ရှ်နိုင်ငံမှာ တက္ကသိုလ်ကျောင်းသားတွေ ဦးဆောင်တဲ့ဆန္ဒပြပွဲများဖြစ်လာခဲ့ပြီးနောက် ဒီသီတင်းပတ်အတွင်းဖြစ်ပွားခဲ့တဲ့ ဆန္ဒပြပွဲအတွင်းလူပေါင်း (၃၀၀)နီးပါးသေဆုံးခဲ့ရကြောင်း သိရပါတယ်။

ဆန္ဒပြအုပ်စုတွေဟာ နိုင်ငံတဝန်း ညမထွက်ရအမိန့်ထုတ်ပြန်ကာ လုံခြုံရေးတင်းကြပ်ထားပေမယ့် ဆန္ဒပြမှုတွေကို ဆက်လက်လုပ်ဆောင်ခဲ့ပြီး သြဂုတ်လ ၅ ရက်နေ့မှာ ဝန်ကြီးချုပ်ရုံးကို စီးနင်းခဲ့ကြောင်း သိရပါတယ်။ ဘင်္ဂလားဒေ့ရှ် စစ်ဗိုလ်ချုပ်ကြီးတစ်ဦးဖြစ်တဲ့ Waker-Uz-Zaman က ဝန်ကြီးချုပ်ဟာ ရာထူးကနေ နုတ်ထွက်သွားခဲ့ကြောင်း ယာယီအစိုးရအဖွဲ့က နိုင်ငံကို ဆက်လက်ထိန်းချုပ်သွားမှာဖြစ်ကြောင်း အတည်ပြုပြောဆိုထားပါတယ်။သြဂုတ်လ ၄ ရက်နေ့က ဖြစ်ပွားခဲ့တဲ့ဆန္ဒပြပွဲအတွင်း လူပေါင်း (၉၀)ကျော်သေဆုံးခဲ့ပြီးနောက် ဆန္ဒပြအုပ်စုတွေဟာ စိတ်ဆိုးဒေါသဖြစ်ပွားမှုပိုမိုမြင့်တက်လာခဲ့ကာ သြဂုတ်လ (၅)ရက်နေ့မှာ အရှိန်မြင့်ဆန္ဒပြခဲ့ကြောင်း သိရပါတယ်။ 

ဘင်္ဂလားဒေ့ရှ် စစ်တပ်အကြီးအကဲတစ်ဦးဖြစ်တဲ့ ဗိုလ်ချုပ်ကြီး Waker-Uz-Zaman က ဘင်္ဂလားဒေ့ရှ်ပြည်သူတွေအနေနဲ့ လက်ရှိအချိန်မှာ စစ်တပ်အပေါ် ယုံကြည်မှုရှိစေလိုကြောင်း၊ စစ်တပ်အနေနဲ့ နိုင်ငံကို ငြိမ်းချမ်းရေး ပြန်လည်ရရှိအောင်လုပ်ဆောင်မှာဖြစ်ကြောင်း ပြောပါတယ်။ ဘင်္ဂလားဒေ့ရှ်စစ်တပ်အကြီးအကဲက "ကျွန်တော်တို့ဟာ နိုင်ငံရေးပါတီအားလုံးကို ဖိတ်ခေါ်ဆွေးနွေးမယ်။ ပူးပေါင်းဆောင်ရွက်ဖို့ ကမ်းလှမ်းမယ်။ ဆန္ဒပြပွဲအတွင်း သေဆုံးခဲ့သူအားလုံးအတွက် တရားမျှတမှုတွေ၊ အမှန်တရားရအောင်လုပ်ဆောင်မယ်" လို့ပြောပါတယ်။ ဝန်ကြီးချုပ်ရှိတ်ဟာစီနာဟာ စစ်ဘက်သုံးရဟတ်ယာဉ်ကို အသုံးပြုပြီးထွက်ပြေးခဲ့ရခြင်းဖြစ်ကြောင်း သိရပါတယ်။