Pika (NSS) - မေ ၂၃

အမေရိကန်နိုင်ငံ အိုင်အိုဝါပြည်နယ် ဂရင်းဖီးလ်မြို့ကို လေဆင်နှာမောင်းတစ်ခု ဝင်ရောက်တိုက်ခတ်ပြီးနောက် အနည်းဆုံးလူ(၅)ဦးသေဆုံးခဲ့ပြီး အခြားလူ(၃၅)ဦးထိခိုက်ဒဏ်ရာရရှိခဲ့တယ်လို့ အိုင်အိုဝါအာဏာပိုင်တွေက မေလ(၂၂)ရက်နေ့မှာပြောကြားခဲ့ပါတယ်။ 

Des Moines မြို့ အနောက်တောင်ဘက် မိုင်(၆၀)အကွာမှာရှိတဲ့ ဂရင်းဖီးလ်မြို့ကို လေဆင်နှာမောင်းဝင်ရောက်တိုက်ခတ်ပြီးနောက် ပျက်စီးဆုံးရှုံးမှုတွေကို အာဏာပိုင်တွေက စစ်ဆေးနေဆဲဖြစ်တယ်လို့လည်း သိရပါတယ်။ အိုင်အိုဝါပြည်နယ် ကင်းလှည့်တပ်ကြပ်ကြီး အဲလက်စ်ဒင်ကလာက 'လေဆင် နှာမောင်းတိုက်ခတ်မှုအတွင်း နေအိမ်အများအပြား ပျက်စီးသွားခဲ့တာမလို့ အသေအပျောက်တွေကို ထပ်မံစစ်ဆေးနေတုန်းပါပဲ'လို့ ပြောဆိုခဲ့ပါတယ်။သို့သော်လည်း ပျောက်ဆုံးနေဆဲလူရှိ/မရှိ ဒါမှမဟုတ် သေဆုံးသူတွေကို ရှာဖွေနေဆဲ ရှိ/မရှိဆိုတဲ့ အချက်တွေကို ကယ်ဆယ်ရေးအေဂျင်စီတွေက ထုတ်ပြန်ပြောကြားတာမျိုးမရှိခဲ့ဘူးလို့လည်း သိရပါတယ်။ ဒါ့ပြင် လေဆင် နှာမောင်းတိုက်ခတ်မှုကြောင့် သေဆုံးသွားတဲ့လူ(၅)ဦးနဲ့ပတ်သက်ပြီး အသေးစိတ်အချက်အလက်တွေကို ထုတ်ပြန်ထားတာမျိုး မရှိသေးဘူးလို့လည်း သိရပါတယ်။ လေဆင်နှာမောင်းတိုက်ခတ်ပြီးနောက် ထိခိုက်ဒဏ်ရာရရှိခဲ့သူ(၃၅)ဦးအနက် အနည်းဆုံး(၁၄)ဦးကို ဆေးကုသမှုတွေ လုပ်ဆောင်ဖို့အတွက် ဆေးရုံကို ခေါ်ဆောင်သွားခဲ့တယ်လို့လည်း တာဝန်ရှိသူတွေက ပြောကြားခဲ့ပါတယ်။

ထိခိုက်ဒဏ်ရာရရှိသူအရေအတွက်က ယခုထုတ်ပြန်ထားတဲ့ အရေအတွက်ထက် ပိုမိုများပြားနိုင်တယ်လို့လည်း တာဝန်ရှိသူတွေကထပ်မံပြောကြားခဲ့ပါတယ်။ဆိုရှယ်မီဒီယာပေါ်မှာ တင်ထားတဲ့ ဓါတ်ပုံတွေမှာ ပျက်စီးနေတဲ့နေအိမ်တွေ၊လဲကျနေတဲ့ သစ်ပင်တွေနဲ့ လွင့်စင်သွားပြီး ပျက်စီးသွားတဲ့ ကားတွေကို တွေ့မြင်ခဲ့ရပါတယ်။ လေဆင်နှာမောင်းတိုက်ခတ်ပြီးနောက် ဂရင်းဖီးလ်မြို့အပြင်ဘက်မှာရှိတဲ့ လေအားလျှပ်စစ် တာဘိုင်ကြီးနှစ်ခုလည်း ပြုတ်ကျနေတာကို အဆိုပါ ဓါတ်ပုံတွေထဲမှာ တွေ့မြင်ခဲ့ရပါတယ်။