ဂျန်ဇက် (NSS) - ဧပြီ ၂၃

အမေရိကန်အစိုးရဟာ ယူကရိန်းစစ်ပွဲနဲ့ ဆက်နွှယ်ပြီး ရုရှားနိုင်ငံကို ကူညီထောက်ပံ့ပေးမှုတွေအတွက် တရုတ်ဘဏ်တွေကို ပိတ်ဆို့မှုတွေချမှတ်သွားဖွယ်ရှိနေကြောင်းသိရပါတယ်။ 

အမေရိကန်အစိုးရဟာ တရုတ်ဘဏ်အချို့ကို ကမ္ဘာ့ဘဏ္ဍာရေးစနစ် နဲ့ အဆက်သွယ်ဖြတ်တောက်ဖို့ စီစဉ်နေတယ်လို့ ဆိုပါတယ်။ အမေရိကန်အစိုးရတာဝန်ရှိသူများက တရုတ်ကုမ္ပဏီများအနေ နဲ့ ရုရှားစစ်လက်နက် ပစ္စည်းထုတ်လုပ်ရေးကုမ္ပဏီတွေကို ကူညီထောက်ပံ့ပေးနေတဲ့ ကူညီပေးမှုတွေရပ်တန့်သွားဖို့ မျှော်လင့်ထားကြောင်း ပြောပါတယ်။ အမေရိကန်နိုင်ငံခြားရေးဝန်ကြီး အန်တိုနီဘလီကန်ဟာ ဒီသီတင်းပတ်အတွင်းမှာ တရုတ်နိုင်ငံကို သွားရောက်လည်ပတ်မှာဖြစ်ပြီး အဲဒီခရီးစဉ်အတွင်း တရုတ်အစိုးရတာဝန်ရှိသူများနဲ့တွေ့ဆုံကာ နှစ်နိုင်ငံကြား ဆက်ဆံရေးအပြင်၊ အရှေ့အလယ်ပိုင်းအရေး၊ တောင်တရုတ်ပင်လယ်အရေး၊ ကိုရီးယားကျွန်းဆွယ်အရေးကိစ္စတွေကိုဆွေးနွေးဖွယ်ရှိနေပါတယ်။ အမေရိကန်နိုင်ငံခြားရေးဝန်ကြီးဟာ ရုရှားကာကွယ်ရေးလုပ်ငန်းတွေကို ကူညီထောက်ပံ့ပေးမှုတွေနဲ့ ပတ်သက်ပြီး တရုတ်နိုင်ငံကိုဝေဖန်ပြစ်တင်မှုတွေလုပ်ဆောင်ခဲ့ကြောင်းသိရပါတယ်။ တရုတ်အစိုးရဟာ ယူကရိန်းစစ်ပွဲမှာ ရုရှားကို ကူညီထောက်ပံ့ပေးနိုင်ဖို့ တရုတ်ကုမ္ပဏီတွေကတဆင့် ကူညီပေးနေကြောင်း အမေရိကန်အစိုးရကပြောပါတယ်။

အမေရိကန်အစိုးရ တာဝန်ရှိသူများဟာ တရုတ်ဘဏ္ဍာရေးကုမ္ပဏီတွေကို အရေးယူဆောင်ရွက်ဖို့ အဆင့်သင့်ရှိနေကြောင်း၊ ၎င်းတို့ဟာ ရုရှားကိုစစ်ဘက်၊ အရပ်ဖက်နှစ်ခုစလုံးမှာ ကူညီထောက်ပံ့ပေးနေကြာင်း ပြောဆိုထားပါတယ်။