ဂျန်ဇက် (NSS) - ဧပြီ ၂၃

ဖိလစ်ပိုင်နိုင်ငံတောင်ပိုင်းမှာ ဖြစ်ပွားခဲ့တဲ့တိုက်ပွဲအတွင်း ခွဲထွက်ရေးသူပုန်အုပ်စုဝင် ၁၂ ဦး သေဆုံးသွားခဲ့ကြောင်း ဖိလစ်ပိုင်စစ်တပ်က သတင်းထုတ်ပြန်လိုက်ပါတယ်။

ဖိလစ်ပိုင်တောင်ပိုင်း မင်ဒါနာအို ပြည်နယ်မှာ စစ်သွေးကြွအုပ်စုများက ဖိလစ်ပိုင်စစ်တပ်ကို ချုံခိုတိုက်ခိုက်ခဲ့ပြီးနောက် အပြန်အလှန်ပစ်ခတ်မှုများဖြစ်ပွားခဲ့ရာ ဖိလစ်ပိုင်စစ်သား(၇)ဦး ဒဏ်ရာရခဲ့ကြောင်းသိရပါတယ်။ ဖိလစ်ပိုင်စစ်တပ်က Bangsamoro Islamic Freedom Fighters-Karialan Faction အဖွဲ့ခေါင်းဆောင် နဲ့ ၎င်းရဲ့ညီဖြစ်သူတို့အပြင် အခြားတပ်ဖွဲ့ဝင် (၁၀)ဦးတို့ ကျဆုံးခဲ့ကြောင်း ပြောပါတယ်။ ဖိလစ်ပိုင်စစ်တပ်ဟာ အမ် ၁၆ ရိုင်ဖယ်သေနတ်တွေအပါအဝင် သေနတ် ၁၂ လက်ကို သိမ်းဆည်းရမိခဲ့ကြောင်းပြောပါတယ်။ ဖိလစ်ပိုင်နိုင်ငံတောင်ပိုင်းမှာ ခွဲထွက်ရေးလက်နက် ကိုင်အုပ်စု အမျိုးမျိုးရှိနေပြီး မွတ်စလင်ခွဲထွက်ရေးအုပ်စုများက ISIS အဖွဲ့လက်အောက်ခံအဖွဲ့အဖြစ်ခံယူပြီး အစိုးရကို ဆန့်ကျင့်တိုက်ခိုက်နေပါတယ်။ 

ဖိလစ်ပိုင်အစိုးရဟာ ၂၀၁၄ ခုနှစ်က ဖိလစ်ပိုင်နိုင်ငံရဲ့အကြီးမားဆုံးလက်နက်ကိုင်အဖွဲ့စည်းဖြစ်တဲ့ Moro Islamic Liberation Front နဲ့ ငြိမ်းချမ်းရေးသဘောတူညီချက်စာချုပ်လက်မှတ်ရေးထိုးခဲ့ပေမယ့် အဲဒီလက်နက်ကိုင်အဖွဲ့ရဲ့လက်အောက်ခံ မွတ်စလင်လက်နက်ကိုင်အဖွဲ့ငယ်များကအစိုးရကို ဆက်လက်ဆန့်ကျင့်တိုက်ခိုက်နေဆဲဖြစ်ကြောင်းသိရပါတယ်။ အဆိုပါ ဖိလစ်ပိုင်တောင်ပိုင်းမှာ မွတ်စလင်ခွဲထွက်ရေးလက်နက်ကိုင်အုပ်စုတွေအပြင်ကွန်မြူနစ်လက်နက်ကိုင်အဖွဲ့တွေလည်းရှိနေကြောင်းသိရပါတယ်။