Pearl (NSS) - ဧပြီ ၂၂

လာမည့် ပညာသင်နှစ်အတွက် ပုဂ္ဂလိကကျောင်းများအနေဖြင့် ကျောင်းအပ်လက်ခံပြီး  ကြိုတင် စာသင်ကြားခြင်း ပြုလုပ်ပါက ဥပဒေအရ အရေးယူမည်ဖြစ်ကြောင်း ပညာရေးဝန်ကြီးဌာန၊ အခြေခံပညာဦးစီဌာန၏ ထုတ်ပြန်ချက်များအရ သိရသည်။ 

ပညာရေးဝန်ကြီးဌာန၊ အခြေခံပညာဦးစီဌာနက ပြီးခဲ့သည့် ရက်ပိုင်းက အထက်ပါကဲ့သို့ သတိပေးထုတ် ပြန်ထားခြင်း ဖြစ်သည်။ 

ပုဂ္ဂလိက ကျောင်းအချို့သည် ကြိုတင်ကျောင်းအပ်လက်ခံပြီး စာသင်ကြားခြင်းပြုလုပ်နေကြောင်း သတင်းများအရ အခြေခံပညာဦးစီးဌာနအနေဖြင့် မြို့နယ်ပညာရေးရုံးများမှတစ်ဆင့် အမျိုးသားသင်ရိုးညွှန်းတမ်းဖြင့် သင်ကြားသော ပုဂ္ဂလိကအခြေခံကျောင်းများကို  အသိပေးဆောင်ရွက်ရန် နှင့် လိုက်နာမှုမရှိသောကျောင်းများအား ပုဂ္ဂလိက ပညာရေးဥပဒေအရ အရေးယူဆောင်ရွက်မည်ကို သိရှိကြောင်း ဝန်ခံကတိရေးထိုးစေရန် ထုတ်ပြန်ထားသည်။

ထို့ပြင် ညွှန်ကြားချက်အားဖောက်ဖျက်ကြောင်းပေါ်ပေါက်ပါက စစ်ဆေးတွေ့ရှိချက်အပေါ် မူတည်၍ သက်ဆိုင်ရာ ပညာရေးဝန်ထမ်းအား ထိရောက်စွာ အရေးယူဆောင်ရွက်မည်ဖြစ်ကြောင်းလည်း  ထုတ်ပြန်ချက်တွင် ‌ဖော်ပြထားသည်။