ယွန်း(NSS) - ဧပြီ ၂၁ 

လာမည့်ရက်ပိုင်းအတွင်း ရန်ကုန် အပါအဝင် တိုင်းနှင့်ပြည်နယ်အချို့တွင် မိုးထစ်ချုန်းရွာသွန်းနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။

မိုးလေဝသနှင့် ဇလဗေဒညွှန်ကြားမှုဦးစီးဌာနကက ယနေ့(ဧပြီ ၂၁ ရက်)တွင် ထုတ်ပြန်သည့် ဧပြီလ တတိယ(၁၀)ရက်ပတ်အတွက် မိုးလေဝသခန့်မှန်းချက်တွင် အထက်ပါကဲ့သို့ အသိပေးထားခြင်းဖြစ်သည်။

ဧပြီတတိယ(၁၀)ရက်ပတ်အတွင်း စစ်ကိုင်း၊ တနင်္သာရီ၊ ကချင်၊ ရှမ်း နှင့် ချင်းတို့တွင် ၃ ရက်မှ ၅ ရက်ခန့် မိုးထစ်ချုန်းရွာသွန်းနိုင်ကြောင်း သိရသည်။

အလားတူ ရန်ကုန် အပါအဝင် နေပြည်တော်၊ စစ်ကိုင်းအောက်ပိုင်း၊ မန္တလေး၊ မကွေး၊ ပဲခူး၊ ဧရာဝတီ၊ ရခိုင်၊ ကယား၊ ကရင် နှင့် မွန်တို့တွင်လည်း ၁ ရက်မှ ၂ ရက်ခန့် မိုးထစ်ချုန်းရွာနိုင်ကြောင်း မိုးဇလမှ အသိပေးထားသည်။

ထို့ပြင် အဆိုပါကာလအတွင်း နေပြည်တော်၊ စစ်ကိုင်း၊ မန္တလေး၊ မကွေး၊ ပဲခူး၊ ရန်ကုန်၊ ဧရာဝတီ၊ တနင်္သာရီ၊ ရှမ်း၊ ကယား နှင့် မွန်တို့၌ နေ့အပူချိန်များသည် ဧပြီလပျမ်းမျှအပူချိန်၏ ၁ ဒသမ ၅ ဒီဂရီဆဲလ်စီးယက်အထက် ပိုနိုင်ကြောင်း သိရသည်။

မိုးဇလအနေဖြင့် ဧပြီလ ၁၇ ရက်မှ ဧပြီလ ၂၃ ရက်အတွင်း အနောက်ဘက်မှ ရွေ့လျားလာသော လေ‌ပွေလှိုင်းများ၏ အရှိန်ကြောင့်လည်းကောင်း၊ အရှေ့ဘက်မှ ရွှေ့လျားလာသော တိမ်တိုက်များနှင့် အပူပျံတက်တိမ်များဖြစ်ထွန်းမှုအားကောင်းခြင်းတို့ကြောင့် အချိန်အခါမဟုတ်မိုးရွာသွန်းနိုင်ကြောင်းကို ပြီးခဲ့သည့် ရက်ပိုင်းတွင် အသိပေးထုတ်ပြန်ထားသည်။