Pika (NSS) - ဧပြီ ၂၁ 

ဂျပန်ရေကြောင်းခုခံကာကွယ်ရေးတပ်ဖွဲ့ရဲ့ရဟတ်ယာဉ်(၂)စင်းဟာ ဧပြီလ(၂၀)ရက် နှောင်းပိုင်းက ပစိဖိတ် သမုဒ္ဒရာမှာ စစ်ရေးလေ့ကျင့်မှုတွေ လုပ်ဆောင်နေစဉ်အချိန်အတွင်း ပျက်ကျခဲ့ပြီး တပ်ဖွဲ့ဝင်(၁)ဦး သေဆုံးကာ အခြား(၇)ဦး ပျောက်ဆုံးနေတယ်လို့ ဂျပန်ကာကွယ်ရေးဝန်ကြီးက ဧပြီလ(၂၁)ရက်မှာ ထုတ်ဖော်ပြောခဲ့ပါတယ်။ 

အဲဒီရဟတ်ယာဉ်နှစ်စင်းဟာ ညအချိန်မှာ စစ်ရေးလေ့ကျင့်မှုတွေ လုပ်ဆောင်နေစဉ်အချိန်အတွင်း Izu ကျွန်းစု Torishima ကျွန်းအရှေ့ဘက် (၂၇၀)ကီလိုမီတာအကွာရေပြင်မှာ ပျက်ကျခဲ့တာလို့လည်း သိရပါတယ်။ ရဟတ်ယာဉ်နှစ်စင်းဟာ စစ်ရေးလေ့ကျင့်မှုအတွင်း အချင်းချင်းတိုက်မိခဲ့ပုံပေါ်တယ်လို့ ကာကွယ်ရေးဝန်ကြီး Minoru Kihara က သတင်းထောက်တွေကို ပြောကြားခဲ့ပါတယ်။ 

Izu ကျွန်းစုဟာ တိုကျိုမြို့တောင်ဘက်မှာ တည်ရှိတယ်လို့လည်း သိရပါတယ်။ တပ်ဖွဲ့ဝင်(၄)ဦးစီ တင်ဆောင်လာ တဲ့ SH-60K ရဟတ်ယာဉ်နှစ်စင်းဟာ ည(၁ဝ)နာရီ (၃၈)မိနစ်နဲ့ (၁၁)နာရီ (၄)မိနစ်တို့မှာ အဆက်အသွယ် ပြတ်တောက်သွားခဲ့တာလို့လည်း သိရပါတယ်။ ဂျပန်ရေကြောင်းခုခံကာကွယ်ရေးတပ်ဖွဲ့ဟာ အရေးပေါ်အချက်ပြ မှုကို ည(၁ဝ)နာရီ (၃၉)မိနစ်မှာ လက်ခံရရှိခဲ့တယ်လို့လည်း သိရပါတယ်။ 

ရဟတ်ယာဉ်နှစ်စင်းလုံးရဲ့ပျံသန်းမှုမှတ်တမ်းတင်တဲ့စက်တွေကို ပျက်ကျရာနေရာအနီးမှာ ရှာဖွေတွေ့ရှိခဲ့ပြီး ပန်ကာဒလက်တွေနဲ့ အခြားအပျက်အစီးတွေကိုလည်း တွေ့ရှိခဲ့ရတယ်လို့ Minoru Kihara က ပြောခဲ့ပါတယ်။ ဒါပေမယ့်လည်း SH-60K ရဟတ်ယာဉ်နှစ်စင်း ပျက်ကျရတဲ့အကြောင်းအရင်းကို လက်ရှိအချိန်အထိ ရှင်းရှင်း လင်းလင်း မသိရှိရသေးဘူးလို့ သိရပါတယ်။