Pika (NSS) - ဧပြီ ၂၁

တရုတ်သမ္မတရှီကျင့်ဖျင်ဟာ ပေါင်းစပ်စစ်ပွဲကို ကိုင်တွယ်ဖြေရှင်းဖို့အတွက် တာဝန်ယူမယ့် သတင်းထောက်ပံ့ရေးတပ်ဖွဲ့အသစ်ကို ဖန်တီးခဲ့ပြီး စစ်ဘက်ဆိုင်ရာ အကြီးစားပြန်လည်ပြင်ဆင်မှုတစ်ရပ်ကို ထုတ်ပြန်ကြေညာခဲ့တယ်လို့ သိရပါတယ်။

ရှီကျင့်ဖျင်ဟာ ဧပြီလ(၁၉)ရက်နေ့က ဘေဂျင်းမြို့မှာကျင်းပတဲ့ အခမ်းအနားတစ်ခုမှာ ယခုလိုထုတ်ပြန်ကြေညာခဲ့တာပဲဖြစ်ပါတယ်။ တရုတ်နိုင်ငံဟာ ခေတ်သစ်မှာ စစ်တပ်ဖွံ့ဖြိုးတိုးတက်ရေးကို ဦးစားပေးဆောင်ရွက်ရမှာဖြစ်ပြီး ပြုပြင်ပြောင်းလဲမှုတွေ၊ သိပ္ပံပညာတွေ၊ စွမ်းရည်အသစ်တွေနဲ့အတူ ကိုယ်ပိုင်စွမ်းဆောင်ရည်ကို မြှင့်တင်ရမယ်လို့ ရှီကျင့်ဖျင်ကပြောဆိုခဲ့ပါတယ်။ ရှီကျင့်ဖျင်ဟာ အသစ်ဖန်တီးထားတဲ့ တပ်ဖွဲ့ကို သတင်းအချက်အလက်စနစ်ကွန်ရက်တွေကို ပေါင်းစည်းဖို့နဲ့ အသုံးပြုဖို့အတွက် မရှိမဖြစ်လိုအပ်တဲ့ ပံ့ပိုးကူညီမှုတွေ လုပ်ဆောင်ပေးမယ့် မဟာဗျူဟာမြောက်တပ်ဖွဲ့အသစ်တစ်ခုလို့ ဖော်ပြပြောဆိုခဲ့ပါတယ်။ ရှီကျင့်ဖျင်က 'ဒီတပ်ဖွဲ့အသစ်ဟာ ခေတ်မီစစ်ပွဲတွေမှာ တရုတ်စစ်တပ်ရဲ့ အရည်အသွေးမြင့်တဲ့ ဖွံ့ဖြိုးတိုးတက်မှုတွေနဲ့ ယှဉ်ပြိုင်နိုင်စွမ်းတွေကို မြှင့်တင်ဖို့အတွက် အရေးကြီးတဲ့ အခန်းကဏ္ဍကနေ ပါဝင်လာပါလိမ့်မယ်။”လို့ ပြောဆိုခဲ့ပါတယ်။

ဒါ့ပြင် ရှီကျင့်ဖျင်ဟာ ဗိုလ်ချုပ်ကြီးဘိုင်ရီကို စစ်ဘက်ဌာနခွဲအသစ်ရဲ့ တပ်မှူးအဖြစ် ခန့်အပ်ခဲ့ပြီး ဗိုလ်ချုပ်ကြီးလီဝေကို political commissar အဖြစ် ခန့်အပ်ခဲ့တယ်လို့လည်း သိရပါတယ်။ ချော့မွေ့တဲ့သတင်းအချက်အလက်လင့်တွေ၊ ပေါင်းစည်းထားတဲ့ သတင်းရင်းမြစ်တွေနဲ့ သတင်းအချက်အလက်ကာကွယ်ရေးကို အားကောင်းအောင်လုပ်ဆောင်ဖို့ကလည်း အရေးကြီးတယ်လို့ ရှီကျင့်ဖျင်က မှတ်ချက်ပြုပြောဆိုခဲ့ပါတယ်။ ရှီကျင့်ဖျင်ရဲ့ ပြန်လည်ပြင်ဆင်မှုတွေနဲ့ပတ်သက်ပြီး ကာကွယ်ရေးဝန်ကြီး Wu Qian က မှတ်ချက်ပြုပြောဆိုခဲ့တယ်လို့လည်း သိရပါတယ်။ Wu Qian က'လက်ရှိအချိန်မှာ တရုတ်စစ်တပ်မှာ ကြည်းတပ်၊ရေတပ်၊လေတပ်နဲ့ ဒုံးကျည်တပ်ဖွဲ့အပြင် နောက်ထပ်တပ်ဖွဲ့လေးခုဖြစ်တဲ့ အာကာသတပ်ဖွဲ့၊ဆိုက်ဘာအာကာသတပ်ဖွဲ့၊သတင်းအချက်အလက်ထောက်ပံ့ရေးတပ်ဖွဲ့နဲ့ ပူးတွဲထောက်ပံ့ပို့ဆောင်ရေးတပ်ဖွဲ့တို့ ရှိလာပါပြီ။”လို့ပြောဆိုခဲ့ပါတယ်။