Pika (NSS) - ဧပြီ ၂၁

ပင်လယ်နီအတွင်းမှာ သွားလာနေတဲ့ ကုန်တင်သင်္ဘောတွေကို ယီမင်အခြေစိုက် အီရန်ကျောထောက်နောက်ခံပြုဟူသီလက်နက်ကိုင်အဖွဲ့ရဲ့ တိုက်ခိုက်မှုတွေကနေ ကာကွယ်ဖို့အတွက် ဖရီးဂိတ်သင်္ဘောအသစ်တစ်စီးကို လာမယ့်ဩဂုတ်လမှာ စေလွှတ်သွားမယ်လို့ ဂျာမနီအစိုးရက ဧပြီလ(၂၀)ရက်နေ့မှာ ထုတ်ဖော်ပြောဆိုလိုက်ပါတယ်။

ဧပြီလ(၂၀)ရက်နေ့က ပင်လယ်နီအတွင်းကနေ ထွက်ခွါသွားတဲ့ Hessen သင်္ဘောနေရာမှာ Hamburg ဖရီးဂိတ်သင်္ဘောအသစ်ကို အစားထိုးသွားမှာဖြစ်တယ်လို့ ဂျာမနီကာကွယ်ရေးဝန်ကြီး ဘောရစ်ပစ်စတိုးရီးယက်စ်က ပြောဆိုခဲ့ပါတယ်။ ပင်လယ်နီအတွင်းမှာသွားလာနေတဲ့ သင်္ဘောတွေကို ကာကွယ်ဖို့အတွက် ဥရောပသမဂ္ဂရဲ့ Aspides မစ်ရှင် တစ်စိတ်တစ်ပိုင်းအနေနဲ့ ပြီးခဲ့တဲ့ဖေဖော်ဝါရီလ(၂၃)ရက်နေ့မှာ Hessen သင်္ဘောကို စတင်စေလွှတ်ခဲ့တာလည်းဖြစ်ပါတယ်။ ဒါ့ပြင် လအတော်ကြာတိုက်ခိုက်မှုတွေအတွင်း ပင်လယ်နီနဲ့ အေဒင်ပင်လယ်ကွေ့တို့မှာသွားလာနေတဲ့ သင်္ဘောပေါင်း(၁၀၀)နီးပါးကို တိုက်ခိုက်ခဲ့တယ်လို့ ဟူသီလက်နက်ကိုင်အဖွဲ့က ဧပြီလ(၁၈)ရက်နေ့မှာ ထုတ်ဖော်ပြောဆိုခဲ့ပါတယ်။ ပြီးခဲ့တဲ့နှစ် နိုဝင် ဘာလမှာ အစ္စရေး-ဟားမက်စစ်ပွဲစတင်ဖြစ်ပွားပြီးနောက် ဟူသီလက်နက်ကိုင်အဖွဲ့ဟာ ပင်လယ်နီနဲ့ အေဒင်ပင်လယ်ကွေ့တို့မှာ သွားလာနေတဲ့ ကုန်တင်သင်္ဘောတွေကို စတင်တိုက်ခိုက်ခဲ့တာပဲဖြစ်ပါတယ်။ 

ဂါဇာကမ်းမြောင်ဒေသမှာရှိတဲ့ ပါလက်စတိုင်းလူမျိုးတွေကို ထောက်ခံတဲ့အနေနဲ့ ဒီလိုတိုက်ခိုက်မှုတွေကို လုပ်ဆောင်နေတာဖြစ်တယ်လို့လည်း ဟူသီလက်နက်ကိုင်အဖွဲ့ကပြောဆိုထားပါတယ်။ အဲဒီတိုက်ခိုက်မှုတွေကို လက်တုံ့ပြန်တဲ့အနေနဲ့ အမေရိကန်နဲ့ဗြိတိန်တပ်ဖွဲ့တို့ဟာ ပြီးခဲ့တဲ့ဇန်နဝါရီလကတည်းက ဟူသီလက်နက်ကိုင်အဖွဲ့ရဲ့ ပစ်မှတ်တွေကို လေကြောင်းကနေ တိုက်ခိုက်မှုတွေ ဆက်တိုက်လုပ်ဆောင်ခဲ့ပါတယ်။ အစ္စရေးရဲ့ မိတ်ဖက်နိုင်ငံဖြစ်တဲ့ အမေရိကန်ဟာ ပင်လယ်နီအတွင်းမှာသွားလာနေတဲ့ ကုန်တင်သင်္ဘောတွေကို ကာကွယ်ဖို့အတွက် ညွန့်ပေါင်းအဖွဲ့တစ်ခုကို ပြီးခဲ့တဲ့နှစ်မှာ စတင်ဖွဲ့စည်းခဲ့တယ်လို့လည်း သိရပါတယ်။