ALynn (NSS) - ဧပြီ ၂ဝ

အာဖရိက၏ ဆာဟယ်ဒေသတွင် မူးယစ်ဆေးဝါးဖမ်းဆီးရမိမှုများမြင့်မားလာပြီး ပဋိပက္ခများ ဖြစ်ပွားလျက်ရှိသော ၎င်းဒေသသည် မူးယစ်မှောင်ခိုလမ်းကြောင်းဖြစ်လာကြောင်း ကုလသမဂ္ဂ အစီရင်ခံစာအရသိရသည်။ 

၂၀၂၂ ခုနှစ်တွင် မာလီ၊ ချက်၊ ဘာကီနာဖာဆိုနှင့် နိုင်ဂျာတို့တွင် ကိုကင်း ၁,၄၆၆ ကီလိုဂရမ် ဖမ်းဆီးရမိခဲ့ကြောင်း ကုလသမဂ္ဂမူးယစ်နှင့်ရာဇဝတ်ရုံး၏ ဧပြီလ ၁၉ ရက် (သောကြာနေ့) က ထွက်ရှိခဲ့သော အစီရင်ခံစာအရသိရသည်။ ဆာဟယ်ဒေသသည် ဆာဟာရလွင်ပြင်ဒေသ၏ တောင်ပိုင်းတွင်ရှိပြီး အတ္တလန္တိတ်သမုဒ္ဒရာနှင့် ပင်လယ်နီတစ်လျှောက်တွင်ရှိနေသည်ဖြစ်ရာ တောင်အာဖရိကတွင်ထုတ်လုပ်သော ကိုကင်းများ ဥရောပသို့ တင်ပို့ဖို့အတွက် အကောင်းဆုံးလမ်းကြောင်းဖြစ်လာသည်။ မူးယစ်မှောင်ခိုခြင်းလုပ်ငန်းသည် ဒေသတွင်း၌သာမက ကမ္ဘာလုံးဆိုင်ရာ ကျန်းမာရေးနှင့် ငြိမ်းချမ်းရေးကို ထိခိုက်စေသည်။ 

ကုလသမဂ္ဂ၏ အစီရင်ခံစာအရ ဆာဟယ်ဒေသရှိ လက်နက်ကိုင်အုပ်စုများသည် မူးယစ် ကုန် သွယ်ရေးလုပ်ငန်းမှတစ်ဆင့် ငွေကြေးထောက်ပံ့မှုများရရှိနေသည်။ ၎င်းဒေသသည် အစွန်း ရောက်အုပ်စုများပေါများပြီး မကြာသေးမီကာလအတွင်းကလည်း အာဏာသိမ်းမှုများစွာ ဖြစ်ပွားခဲ့သည်။ ၎င်းဒေသတွင် မူးယစ်မှောင်ခိုလုပ်ငန်းအဆင်ပြေချောမွေ့နေခြင်းမှာလည်း နိုင်ငံရေးခေါင်းဆောင်များ၊ လူမှုအဖွဲ့အစည်းခေါင်းဆောင်များနှင့် လက်နက်ကိုင်အုပ်စုများပါဝင် ပတ်သက်နေခြင်းကြောင့် ဖြစ်သည်။ ထို့ကြောင့် မူးယစ်လုပ်ငန်းနှင့် နိုင်ငံရေးခေါင်းဆောင်များ၏ အကျင့်ပျက်ခြစားမှုများ၊ ငွေကြေးခဝါချမှုများသည်လည်း ပတ်သက်ဆက်နွှယ်နေခဲ့သည်။ ကုလသမဂ္ဂ၏ အထူးကိုယ်စားလှယ် Leonardo Santos Simao က “ဆာဟယ်ဒေသရှိ နိုင်ငံများ အနေဖြင့် မူးယစ်မှောင်ခိုမှုများကို တိုက်ဖျက်ရန် အတူတကွပူးပေါင်းပြီး ပြီးပြည့်စုံသော အရေးယူ မှုများကို အရေးတကြီး လုပ်ဆောင်သွားရန် လိုအပ်ကြောင်း” ဖော်ပြခဲ့သည်။