NSS - ဧပြီ ၁၉

မကွေးတိုင်း၊ တောင်တွင်းကြီးမြို့နယ်ရှိ ကျေးရွာသုသာန်တစ်ခုအတွင်း၌ မေတ္တာပို့ဆုတောင်းနေသည့် သံဃာတော်(၄)ပါးကို PDF အဖွဲ့က သေနတ်ဖြင့်လာရောက်ပစ်ခတ်မှုကြောင့် တစ်ပါးပျံလွန်တော်မူကာ တစ်ပါးထိခိုက်ဒဏ်ရာရရှိခဲ့ကြောင်း နစကမှ သတင်းထုတ်ပြန် ထားသည်။

ဖြစ်စဉ်မှာ ယမန်နေ့(ဧပြီလ ၁၈ ရက်)၊ နံနက် ၁၀နာရီ ၁၅မိနစ်အချိန်တွင် တောင်တွင်းကြီးမြို့နယ်၊ ထောက်ကြံ့ကွင်းကျေးရွာသုသာန်၌ အထက်ပါကဲ့သို့ ဖြစ်ပွားခဲ့ခြင်းဖြစ်ကြောင်း သိရသည်။

ထောက်ကြံ့ကွင်းကျေးရွာတွင်နေထိုင်သည့် ကျေးရွာနေဒေသခံပြည်သူများက အဆိုပါကျေးရွာသုသာန်၌ သံဃာတော်(၄)ပါးပင့်ဖိတ်၍ မေတ္တာပို့ဆုတောင်းပွဲ ပြုလုပ်နေစဉ် PDF အဖွဲ့ဝင် (၂)ဦးက ဆိုင်ကယ်တစ်စီးဖြင့်ရောက်ရှိလာကာ သေနတ်ဖြင့်ပစ်ခတ်ခဲ့ကြောင်း သိရသည်။

ထိုသို့ ပစ်ခတ်ခံရမှုကြောင့် ဝါးသုံးပြူးကျေးရွာ၊ သီရိမာလာကျောင်းတိုက်မှ သက်တော်(၇၃) နှစ်၊ ဝါတော် (၂၂)ဝါရှိ ကျောင်းထိုင် ဆရာတော် ဘဒ္ဒန္တပညာဝံသတွင် ကျည်ထိမှန်ဒဏ်ရာများရရှိကာ ပျံလွန်တော်မူသွားခဲ့ကြောင်း သိရသည်။

ထို့ပြင် ထောက်ကြံ့ကွင်းကျေးရွာ၊ အောင်မြေသာသနာကျောင်းတိုက်မှ သက်တော်(၄၅)နှစ်၊ ဝါတော်(၂၅)ဝါရှိ ကျောင်းထိုင်ဆရာတော် ဘဒ္ဒန္တ ကုန္ဒလဇောတိတွင်လည်း ကျည်ထိမှန်ဒဏ်ရာများရရှိခဲ့ကြောင်း သိရသည်။

ထို့ကြောင့် ထိခိုက်ဒဏ်ရာရရှိခဲ့သည့် ဆရာတော်အား တောင်တွင်းကြီးမြို့နယ်ပြည်သူ့ဆေးရုံသို့ ပို့ဆောင်ပေးခဲ့ပြီး ပြစ်မှုကျူးလွန်သူများကို ဖော်ထုတ်ဖမ်းဆီးအရေးယူနိုင်ရေးလုံခြုံရေးတပ်ဖွဲ့ဝင်များက စုံစမ်းစစ်ဆေးလျက်ရှိကြောင်း သိရသည်။

လက်ရှိနစက အစိုးရလက်တွင် အကြမ်းဖက်သတ်ဖြတ်ခံရမှုကြောင့် သံဃာတော် အပါး (၁၀၀) ခန့် နှင့် သီလရှင် (၃)ပါးတို့ ပျံလွန်တော်မူထားကြောင်း သိရသည်။