ဂျန်ဇက် (NSS) - ဧပြီ ၁၈

လက်ဘနွန်အခြေစိုက် ဟစ်ဘိုလာလက်နက်ကိုင်အုပ်စုဟာ အစ္စရေးနိုင်ငံဘက်ခြမ်းကို ဒရုန်းတွေ၊ ရော့ကဒ်ဒုံးကျည်အစင်းပေါင်းများစွာနဲ့ ပစ်ခတ်တိုက်ခိုက်ခဲ့ရာ အစ္စရေးနိုင်ငံသားအနည်းဆုံး ၁၈ ဦး ဒဏ်ရာရခဲ့ကြောင်း ဒေသအတွင်းမီဒီယာတွေက ဖော်ပြထားပါတယ်။

ဟစ်ဘိုလာအုပ်စုဟာ ဟားမက်စ်လက်နက်ကိုင်အုပ်စုနဲ့ အစ္စရေးနိုင်ငံကြားစစ်ပွဲစတင်ခဲ့တဲ့ ပြီးခဲ့တဲ့နှစ် အောက်တိုဘာလနောက်ပိုင်းကတည်းက အစ္စရေးနိုင်ငံဘက်ခြမ်းကို ပစ်မှတ်ထားတိုက်ခိုက်ခဲ့ခြင်းဖြစ်ကြောင်း သိရပါတယ်။ အီရန်နိုင်ငံက အစ္စရေးနိုင်ငံကို ပစ်မှတ်ထားတိုက် ခိုက်ခဲ့ပြီးနောက်ပိုင်း ဟစ်ဘိုလာအုပ်စုကလည်း အစ္စရေးနိုင်ငံကိုပစ်မှတ်ထားတိုက်ခိုက်လာခြင်းဖြစ်ကြောင်း သိရပါတယ်။ အစ္စရေးသတင်းဌာန  KAN က "လက်ဘနွန်နိုင်ငံကနေ အစ္စရေးနိုင်ငံမြောက်ပိုင်းကို ပစ်ခတ်တိုက်ခိုက်တာတွေလုပ်ဆောင်ခဲ့တယ်။ ဟစ်ဘိုလာအုပ်စုတွေဟာ အစ္စရေးနိုင်ငံဘက်ခြမ်းကိုဒုံးကျည်တွေနဲ့ အဓိကထားတိုက်ခိုက်ခဲ့ပြီး ဒရုန်းတွေ  အသုံးပြုတာမျိုးသိပ်မရှိခဲ့ဘူး"လို့ ပြောပါတယ်။

အစ္စရေးဟာ ၎င်းနိုင်ငံကို တိုက်ခိုက်ခဲ့တဲ့ ဟစ်ဘိုလာအုပ်စုကိုလက်တုံ့ပြန်ခဲ့ရာ ပြီးခဲ့တဲ့လအတွင်းလက်ဘနွန်နိုင်ငံသား ၇၀ အပါအဝင် လူပေါင်း ၃၆၃ ဦး သေဆုံးခဲ့ကြောင်း ပြင်သစ် သတင်းဌာနက ဖော်ပြထားပါတယ်။ အစ္စရေးဟာ ပြီးခဲ့တဲ့နှစ် အောက်တိုဘာမှာ ဟားမက်စ်လက်နက်ကိုင်အုပ်စုနဲ့ စစ်ပွဲစတင်ခဲ့ပြီးနောက်ပိုင်းအရှေ့အလယ်ပိုင်းဒေသအတွင်းရှိ လက် နက်ကိုင်အုပ်စုတွေဟာ အစ္စရေးနိုင်ငံကို ပစ်မှတ်ထားတိုက်ခိုက်ခဲ့ကြောင်းသိရပါတယ်။ အရှေ့အလယ်ပိုင်းဒေသအတွင်းရှိ လက်နက်ကိုင်အုပ်စုတွေဟာ အီရန်နိုင်ငံရဲ့အထောက်ပံခံ အဖွဲ့စည်းတွေဖြစ်ရာ အီရန် နဲ့ အစ္စရေးစစ်ပွဲဖြစ်ပွားချိန်မှာ အဲဒီလက်နက်ကိုင်အုပ်စုတွေ ပူးပေါင်းပါဝင်လာပြီး အရှေ့အလယ်ပိုင်းဒေသအတွင်း စစ်မီးပိုမိုတောက်လောင်လာမှာကို စိုးရိမ်နေကြောင်းသိရပါတယ်။