ယွန်း (NSS) - ဧပြီ ၁၂

တည်ဆောက်ဆဲ နေရောင်ခြည်သုံး လျှပ်စစ်ဓာတ်အားပေးစက်ရုံ(၁၃)ရုံရှိပြီး စုစုပေါင်းမဂ္ဂါဝပ် (၁၀ဝဝ) နီးပါး ထုတ်လုပ်ဖြန့်ဖြူးနိုင်မည်ဖြစ်ကြောင်း  လျှပ်စစ်စွမ်းအားဝန်ကြီးဌာနမှ နိုင်ငံပိုင်သတင်းစာသို့ ပြောကြားသည့်အချက်အလက်များအရ သိရသည်။

နိုင်ငံတွင်းလျှပ်စစ်ဓာတ်အားလိုအပ်ချက်မှာ နှစ်စဉ် (၁၅)ရာခိုင်နှုန်းခန့်တိုးတက်နေပြီး လက်ရှိ အချိန်ထိ တစ်နိုင်ငံလုံး၏ လျှပ်စစ်ဓာတ်အားရရှိမှု အချိုးမှာ ၆၆ ဒသမ ၈ ရာခိုင်နှုန်းကျော် ရရှိသုံးစွဲနေကြောင်း သိရသည်။ လက်ရှိတွင် မြန်မာနိုင်ငံ၌ တည်ဆောက်ပြီး နေရောင်ခြည်စွမ်းအင်သုံးဓာတ် အားပေးစက်ရုံ(၆)ရုံမှ စုစုပေါင်းမဂ္ဂါဝပ်(၁၈၀)ဖြင့် ဓာတ်အားထုတ်လုပ်ဖြန့်ဖြူးပေး လျက်ရှိပြီး မန္တလေးတိုင်းဒေသကြီး သာစည်မြို့နယ်နှင့် မြစ်သားမြို့နယ်တို့ရှိ နေရောင်ခြည်စွမ်းအင်သုံးဓာတ်အားပေး စက်ရုံ(၃)ရုံမှ မဂ္ဂါဝပ်(၈၀)ခန့် ထုတ်လုပ်ဖြန့်ဖြူးနေကြောင်းသိရသည်။

ထို့ပြင် မကွေးတိုင်းဒေသကြီး မင်းဘူးမြို့နယ်၊ ပွင့်ဖြူမြို့နယ်နှင့် စေတုတ္တရာမြို့နယ်တို့ရှိ စက်ရုံ(၃)ရုံ ကလည်း မဂ္ဂါဝပ်(၁၀ဝ)ခန့် တပ်ဆင်ထားသည့်အပြင် နေရောင်ခြည်လျှပ်စစ်ဓာတ်အားပေးစက်ရုံ(၁၃)ရုံ ကိုလည်း တည်ဆောက်ဆဲဖြစ်ကြောင်း လျှပ်စစ်စွမ်း အားဝန်ကြီးဌာနက ဆိုထားသည်။

‘တည်ဆောက်ဆဲ နေရောင်ခြည်သုံး လျှပ်စစ်ဓာတ်အားပေးစက်ရုံ(၁၃)ရုံကို ဆောင်ရွက်လျက်ရှိပြီး စုစုပေါင်းမဂ္ဂါဝပ် (၉၆၄) မဂ္ဂါဝပ်ခန့်ရှိပါတယ်။ မန္တလေးတိုင်းဒေသကြီး၊ မတ္တရာမြို့နယ်၊ ကျောက်ဆည်မြို့နယ်၊ သာစည်မြို့နယ်နဲ့ တောင်သာမြို့နယ် တို့မှာ စီမံကိန်း(၆)ခုအတွက် (၂၆၂)မဂ္ဂါဝပ်၊ နေပြည်တော် ကောင်စီနယ်မြေမှာ စီမံကိန်း(၃)ခုအတွက် (၃၉၀) မဂ္ဂါဝပ်၊ မကွေးတိုင်း ဒေသကြီး၊ မကွေးမြို့နယ်၊ မင်းဘူးမြို့နယ်တို့မှာရှိတဲ့ စီမံကိန်း(၂)ခုအတွက် (၂၅၂) မဂ္ဂါဝပ်နဲ့ ပဲခူးတိုင်းဒေသကြီးရွှေကျင်မြို့နယ်မှာ စီမံကိန်း(၁)ခု (၄၀)မဂ္ဂါဝပ်၊ ရှမ်းပြည်နယ် ရွာငံမြို့နယ်တွင် စီမံကိန်း(၁)ခု (၂၀)မဂ္ဂါဝပ်တည်ဆောက် ဆောင်ရွက်လျက်ရှိပါတယ်။ နိုင်ငံတော်အနေနဲ့ ပြည့်ဖြိုးမြဲစွမ်းအင်ကဏ္ဍကို ဖွံ့ဖြိုးဖို့အတွက် ဆောင်ရွက်လျက်ရှိရာ ကျွန်တော်တို့ဝန်ကြီးဌာန အနေနဲ့လည်း ရေအား၊ လေအား၊ နေရောင်ခြည် စွမ်းအင်တို့မှရနိုင်တဲ့ စွမ်းအင်တွေကို တိုးတက်ထုတ် လုပ်ဆောင်ရွက်လျက်ရှိပါတယ်” ဟု လျှပ်စစ်စွမ်း အားဝန်ကြီးဌာနမှ တာဝန်ရှိသူတစ်ဦးကပြောသည်။

လက်ရှိတွင် နေရောင်ခြည်စွမ်းအင်သုံးဓာတ် အားပေးစက်ရုံများအနေဖြင့် တစ်နိုင်ငံလုံးဓာတ် အားထုတ်လုပ်မှု၏ (၂)ရာခိုင်နှုန်းဆောင်ရွက်လျက်ရှိပြီး (၁၁)ရာခိုင်နှုန်းအထိ တိုးတက်ထုတ်လုပ်နိုင် ရေးကို လျှပ်စစ်စွမ်းအားဝန်ကြီးဌာနမှ ရည်မှန်းချက် ထားဆောင်ရွက်နေကြောင်းသိရသည်။ ပြည်တွင်း၌ ရေအားအပါအဝင် သဘာဝဓာတ်ငွေ့၊ နေရောင်ခြည်နှင့် ကျောက်မီးသွေးဟူ သည့် စွမ်းအင်အမျိုးအစား(၄)မျိုးဖြင့် စက်ရုံပေါင်း (၆၄)ရုံမှ လျှပ်စစ်ဓာတ်အား ထုတ်လုပ်လျက်ရှိကြောင်း သိရသည်။ အဆိုပါ စက်ရုံ (၆၄)ရုံတွင် စုစုပေါင်း စက်တပ်ဆင်အင်အား ၇၁၈၄ ဒသမ ၄၆ မဂ္ဂါဝပ် ဖြစ်သော်လည်း နေ့စဉ်ပျမ်းမျှ လျှပ်စစ်ဓာတ်အား (၃၀ဝဝ) မဂ္ဂါဝပ်ခန့်သာ ထုတ် လုပ်ဖြန့်ဖြူးပေးနိုင်ကြောင်း သိရသည်။