Pika (NSS) - ဧပြီ ၁၁

ထိုင်ဝမ်နှင့် ငြိမ်းချမ်းစွာပြန်လည်ပေါင်းစည်းရေးကို ပြည်ပမှဝင်ရောက်စွက်ဖက်မှုများက တားဆီးနိုင်မည်မဟုတ်ကြောင်း နှင့် နှစ်ဖက်စလုံးကြားတွင် ဆွေးနွေး၍မရနိုင်သော ပြဿနာများမရှိကြောင်း တရုတ်သမ္မတရှီကျင့်ဖျင်က ထိုင်ဝမ်သမ္မတဟောင်း Ma Ying-jeou ကို ဧပြီလ(၁၀)ရက်နေ့တွင် ပြောကြားခဲ့သည်။ 

၂၀၀၈ ခုနှစ်မှ ၂၀၁၆ခုနှစ်အထိ ထိုင်ဝမ်သမ္မတအဖြစ် တာဝန်ထမ်းဆောင်ခဲ့ဖူးသော Ma Ying-jeou သည် ပြီးခဲ့သည့်နှစ်တွင် တရုတ်နိုင်ငံသို့ ပထမဆုံးအကြိမ်သွားရောက်လည်ပတ်ခဲ့ပြီး ယခုတစ်ကြိမ်သွားရောက်လည်ပတ်မှုမှာ ၎င်း၏ဒုတိယမြောက် လည်ပတ်မှုခရီးစဉ်တစ်ခုဖြစ်ကြောင်းလည်း သိရသည်။ Ma Ying-jeou သည် ၂၀၁၅ ခုနှစ်နှောင်းပိုင်းတွင် စင်ကာပူနိုင်ငံ၌ တရုတ်သမ္မတရှီကျင့်ဖျင်နှင့် ပထမဆုံးအကြိမ်တွေ့ဆုံခဲ့ဖူးခြင်းဖြစ်ကြောင်းသိရသည်။

ရှီကျင့်ဖျင်သည် တရုတ်ထိပ်တန်းအရာရှိများနှင့် နိုင်ငံခြားခေါင်း ဆောင်များ ဆွေးနွေးပွဲများလုပ်ဆောင်လေ့ရှိသည့် ဘေဂျင်းမြို့ရှိ Great Hall of the People ခန်းမတွင် Ma Ying-jeou နှင့် တွေ့ဆုံခဲ့ခြင်းဖြစ်သည်။ ထို့ပြင် ထိုင်ဝမ်ရေလက်ကြား နှစ်ဖက်စလုံးရှိလူများမှာ တရုတ်လူမျိုးများဖြစ်ကြောင်း ရှီကျင့်ဖျင်ကပြောဆိုခဲ့သည်။ ရှီကျင့်ဖျင်က 'ပြည်ပက ဝင်ရောက်စွက်ဖက်မှုတွေဟာ ထိုင်ဝမ်နဲ့ ငြိမ်းချမ်းစွာပြန်လည်ပေါင်းစည်းရေးကို တားဆီးနိုင်မှာ မဟုတ်ပါဘူး။ ထိုင်ဝမ်ရေလက်ကြား နှစ်ဖက်စလုံးကလူတွေဟာ တရုတ်လူမျိုးတွေဖြစ်ပါတယ်။ကျွန်တော်တို့ကြားမှာ မဖြေရှင်းနိုင်တဲ့ပြဿနာတွေ မရှိပါဘူး။ ဘယ်အရာကမှ ကျွန်တော်တို့ကို ခွဲခြားလို့မရပါဘူး။”ဟုပြောဆိုခဲ့သည်။