ဂျန်ဇက် (NSS) - ဧပြီ ၁ဝ

အရပ်သားတွေ သေဆုံးမှုမြင့်တက်လာမှာကို စိုးရိမ်မှုမြင့်တက်နေပေမယ့် ဂါဇာဒေသရှိ ရာဖယ်မြို့ကို ထိုးစစ်ဆင် တိုက်ခိုက်မှုတွေကို ဆက်လက်လုပ်ကိုင်သွားမှာဖြစ်ကြောင်း အစ္စရေးဝန်ကြီးချုပ်နေတန်ရာဟုက ပြောပါတယ်။ အစ္စရေးဝန်ကြီးချုပ်ဟာ ဂါဇာစစ်ပွဲ စတင်ခဲ့ပြီးနောက်ပိုင်းကတည်းက နိုင်ငံတကာအဖွဲ့အစည်းတွေရဲ့ ဖိအားပေးမှု တွေ ရင်ဆိုင်ခဲ့ရပြီး မကြာသေးမိကလည်း မဟာမိတ် အမေရိကန်နိုင်ငံရဲ့ သတိပေးမှုတွေကို ထပ်မံရင်ဆိုင်ခဲ့ရပါ တယ်။ 

ရာဖယ်မြို့မှာ လူပေါင်း ၁ ဒသမ ၃ သန်းရှိနေပြီး အစ္စရေးက ထိုးစစ်ဆင်တိုက်ခိုက်မယ်ဆိုရင် လူသေဆုံးမှု ပိုမိုမြင့်တက်လာမှာကို စိုးရိမ်နေခြင်းဖြစ်ပါတယ်။ ဒါပေမယ့် အစ္စရေးဝန်ကြီးချုပ်က "ရာဖယ်မြို့ အပါအဝင် ဟားမက်စ်လက်နက်ကိုင်အဖွဲ့တွေရှိနေတဲ့နေရာတွေကို ဆက်လက်တိုက်ခိုက်သွားမယ်။ ကျွန်တော်တို့ကို ဘယ်သူမှ တားဆီးလို့ရမှာ မဟုတ်ဘူး။ တပ်ဖွဲ့ဝင်တွေဟာ ဟားမက်စ်အဖွဲ့တွေကို တိုက်ခိုက်ဖို့ ကြိုးပမ်းနေတယ်" လို့ ပြောပါတယ်။

အစ္စရေးအစိုးရက ဂါဇာစစ်ပွဲ စတင်ခဲ့ပြီးနောက်ပိုင်းကတည်းက ဟားမက်စ်လက်နက်ကိုင်အဖွဲ့တွေကို အမြစ်ပြတ် ချေမှုန်းသွားမှာဖြစ်ကြောင်း သတင်းထုတ်ပြန်ခဲ့ပါတယ်။ အစ္စရေးဝန်ကြီးချုပ်က ရာဖယ်မြို့ကို တိုက်ခိုက်ဖို့ ရက်သတ်မှတ်ပြီးဖြစ်ကြောင်း၊ ပြောဆိုခဲ့ပေမယ့် ရက်အတိအကျကိုပြောဆိုခြင်းမျိုး မရှိခဲ့ကြောင်း သိရပါတယ်။