ဂျန်ဇက် (NSS) - ဧပြီ ၉ 

တရုတ်အစိုးရဟာ ယူကရိန်းစစ်ပွဲနဲ့ပတ်သက်ပြီး အမေရိကန်နိုင်ငံရဲ့သတိပေးမှုတွေကို ငြင်းဆန်ပယ်ချလိုက်ကြောင်းသိရပါတယ်။

ယူကရိန်းစစ်ပွဲနဲ့ပတ်သက်ပြီး ရုရှားစစ်တပ်ကို ကူညီထောက်ပံ့ပေးနေတဲ့ တရုတ်ကုမ္ပဏီတွေ ဆိုးရွားတဲ့အကျိုးဆက်တွေရင်ဆိုင်ရဖွယ်ရှိတယ်လို့ အမေရိကန်ဘဏ္ဍာရေးဝန်ကြီး Janet Yellen က ပြီးခဲ့တဲ့ရက်ပိုင်းမှာ သတိပေးခဲ့ပါတယ်။ ဒါပေမဲ့ တရုတ်နိုင်ငံခြားရေးဝန်ကြီးဌာနက တရုတ်နိုင်ငံဟာ တရုတ်နိုင်ငံသားတွေရဲ့အကျိုးစီးပွားကို နိုင်ငံခြားတိုင်းပြည်တွေက ကြားဝင်စွက်ဖက်ခြင်းကနေ ကာကွယ်ပေးသွားမှာဖြစ်ကြောင်း ပြောပါတယ်။ 

တရုတ်နိုင်ငံခြားရေးဝန်ကြီးဌာနပြောရေးဆိုခွင့်ရှိသူမာအိုနင်က " တရုတ်နိုင်ငံနဲ့ ရုရှားနိုင်ငံရဲ့ဆက်ဆံရေးကို တိုက်ခိုက်တာမျိုးမလုပ်ဆောင်သင့်ဘူး၊ တရုတ်နိုင်ငံသားတွေနဲ့ တရုတ်ကုမ္ပဏီတွေရဲ့အကျိုးစီးပွားကို ထိခိုက်နစ်နာအောင်မလုပ်သင့်ဘူး၊ တရုတ်နိုင်ငံသားတွေဟာ စီးပွားရေးလုပ်ခွင့် တရားဝင်အခွင့်ရေးရှိပါတယ်။ တရုတ်အစိုးရဟာ နိုင်ငံသားတွေရဲ့ တရား ဝင်အခွင့်ရေးနဲ့အကျိုးစီးပွားတွေ ဘေးကင်းလုံခြုံအောင် လိုအပ်တဲ့အစီမံတွေလုပ်ဆောင်သွားမယ်။"လို့ပြောပါတယ်။

ဒါ့ပြင်တရုတ်နိုင်ငံ နဲ့ ရုရှားနိုင်ငံကြား ပုံမှန်ဆက်ဆံရေးကို နိုင်ငံခြားတိုင်းပြည်တွေက ကန့် သတ်တာ၊ ဝင်ရောက်စွက်ဖက်တာမျိုးတွေမလုပ်သင့်ကြောင်း ၎င်းကထပ်မံပြောဆိုခဲ့ပါတယ်။အမေရိကန်နိုင်ငံဟာ ယူကရိန်းစစ်ပွဲနဲ့ပတ်သက်ပြီး ရုရှားနိုင်ငံအပေါ် ပိတ်ဆို့မှုအမျိုးမျိုးချမှတ်ခဲ့သလို ရုရှား ၊အိန္ဒိယနိုင်ငံတို့ကိုလည်း ပိတ်ဆို့မှုများချမှတ်စေဖို့ တွန်းအားပေးနေကြောင်းသိရပါတယ်။ အမေရိကန်အစိုးရက တရုတ်ကုမ္ပဏီတွေဟာ ရုရှားနိုင်ငံကို တင့်ကားတွေတည်ဆောက်ဖို့ နဲ့ ဒုံးကျည်တည်ဆောက်ဖို့ လိုအပ်တဲ့ပစ္စည်းတွေကူညီထောက်ပံ့ပေးနေကြောင်း ပြောပါတယ်။