Pika (NSS) - ဧပြီ ၉

မြန်မာအစိုးရ နှင့် လက်နက်ကိုင်တပ်ဖွဲ့များကြား ဆွေးနွေးပွဲများစတင်ရန်နှင့်ပတ်သက်ပြီး ထိလွယ်ရှလွယ်သည့်ပြဿနာများရှိနေကြောင်း ထိုင်းဝန်ကြီးချုပ် ဆာရက်တာသာဗီဆင်ကပြောကြားခဲ့သည်။

ဆာရက်တာသာဗီဆင်သည် မြန်မာနိုင်ငံအတွင်း၌ ပဋိပက္ခများပြင်းထန်လာမှုကို ဆွေးနွေးရန်အတွက် ကျင်းပခဲ့သော ထိုင်းအစိုးရအဖွဲ့အစည်းအဝေးအပြီးတွင် ယခုကဲ့သို့ထုတ်ဖော်ပြောဆိုခဲ့ခြင်းဖြစ်သည်။ ဆာရက်တာသာဗီဆင်က 'မြန်မာအရေးနဲ့ပတ်သက်ပြီး ကျွန်တော်တို့ဘက်ပေါင်းစုံနဲ့ စကားပြောရပါမယ်'ဟု ပြောကြားခဲ့သည်။ ထို့ပြင် မြန်မာအစိုးရသည် အင်အားတောင့်တင်းမှု တဖြည်းဖြည်းလျော့နည်းလာပြီဖြစ်ကြောင်း နှင့် လက်ရှိအချိန်သည် ငြိမ်းချမ်းရေးအတွက် ဆွေးနွေးပွဲများစတင်ရန် သင့်တော်သည့်အချိန်တစ်ခုဖြစ်ကြောင်း ဆာရက်တာသာဗီဆင်က မကြာသေးမီက ပြုလုပ်သော အင်တာဗျူးတစ်ခုတွင် ထုတ်ဖော်ပြောဆိုခဲ့သည်။

မြန်မာပဋိပက္ခနှင့်ပတ်သက်ပြီး ထိုင်းနိုင်ငံကကြားနေအဖြစ် ဆက်လက်ရပ်တည်နေဆဲဖြစ် ကြောင်း ထိုင်းနိုင်ငံခြားရေးဝန်ကြီး Parnpree Bahiddha-nukara က ဧပြီလ(၉)ရက်နေ့တွင် ထုတ်ဖော်ပြောဆိုခဲ့သည်။ ထိုင်းအနေဖြင့် မြန်မာနိုင်ငံတွင်ဖြစ်ပွားနေသော ပဋိပက္ခများကြောင့် နေရပ်စွန့်ခွါထွက်ပြေးနေရသူ(၁)သိန်းခန့်ကို လက်ခံထားပေးနိုင်ကြောင်းလည်း Parnpree Bahiddha-nukara က ထပ်မံပြောဆိုခဲ့သည်။ ထို့ပြင် မြန်မာပဋိပက္ခတွင် ပါဝင်ပတ်သက်နေသူအားလုံးကို ငြိမ်းချမ်းရေးအတွက် စေ့စပ်ညှိနှိုင်းမှုများလုပ်ဆောင်ရန် Parnpree Bahiddha-nukara က တိုက်တွန်းခဲ့ကြောင်းလည်း သိရသည်။ ထိုင်း-မြန်မာနယ် စပ်သည် ကီလိုမီတာ(၂၀၀၀)ကျော်ရှည်လျားပြီး ဆာရက်တာသာဗီဆင်သည် ဝန်ကြီး ချုပ်အဖြစ် စတင်တာဝန်ယူခဲ့သည့်နောက်ပိုင်းတည်းက မြန်မာနိုင်ငံနှင့် ထိတွေ့ဆက်ဆံမှုများစွာကို လုပ်ဆောင်ခဲ့ကြောင်းသိရသည်။ ထို့ပြင် မြန်မာနိုင်ငံတွင် ဖြစ်ပွားနေသော အခြေအနေများသည် ထိုင်းနိုင်ငံအတွက် အရေးကြီးကြောင်း ဆာရက်တာသာဗီဆင်က ထပ်မံပြောဆိုခဲ့သည်။