Pika (NSS) - ဧပြီ ၉

ထိုင်းနိုင်ငံသည် မြန်မာနိုင်ငံပဋိပက္ခတွင် ကြားနေအဖြစ် ဆက်လက်ရပ်တည်နေပြီး တိုက်ပွဲများကြောင့် ရွှေ့ပြောင်းနေထိုင်ရသူပေါင်း(၁)သိန်းအထိ လက်ခံထားပေးနိုင်ကြောင်း ထိုင်းနိုင်ငံခြားရေးဝန်ကြီး Parnpree Bahiddha-nukara က ဧပြီလ(၉)ရက်နေ့တွင် ထုတ်ဖော်ပြောဆိုခဲ့သည်။

ထို့ပြင် မြန်မာပဋိပက္ခတွင်ပါဝင်ပတ်သက်နေသူအားလုံးကို ငြိမ်းချမ်းရေးအတွက် စေ့စပ်ညှိနှိုင်းမှုများလုပ်ဆောင်ရန် Parnpree Bahiddha-nukara ကတိုက်တွန်းခဲ့ကြောင်းသိရသည်။ မြန်မာနိုင်ငံအတွင်း၌ ပဋိပက္ခများ ပြင်းထန်လာမှုကို ဆွေးနွေးရန်အတွက် ကျင်းပမည့် ထိုင်းအစိုးရအဖွဲ့၏ အစည်းအဝေးမတိုင်မီ Parnpree Bahiddha-nukara က ယခုကဲ့သို့ တိုက်တွန်းပြောဆိုခဲ့ခြင်းဖြစ်သည်။ ထိုင်းဝန်ကြီးချုပ် ဆာရက်တာသာဗီဆင်က 'မြန်မာနိုင်ငံရဲ့ အခြေအနေဟာ ထိုင်းနိုင်ငံအတွက် အရေးကြီးပါတယ်။ ထိုင်းအစိုးရဟာ ငြိမ်းချမ်းရေးနဲ့ တည်ငြိမ်ရေးတို့ကို ဖန်တီးဖို့အတွက် မြန်မာပဋိပက္ခမှာ ပါဝင်ပတ်သက်နေတဲ့ အဖွဲ့တွေအားလုံးနဲ့ ပူးပေါင်းဆောင်ရွက်မှုတွေကို မြှင့်တင်ဖို့ အသင့်ရှိနေပါတယ်'ဟု ပြောဆိုခဲ့သည်။

ထို့ပြင် မြန်မာအစိုးရသည် အင်အားတောင့်တင်းမှု လျော့နည်းလာပြီဖြစ်ကြောင်း နှင့် လက်ရှိအချိန်သည် ငြိမ်းချမ်းရေးအတွက် ဆွေးနွေးပွဲများလုပ်ဆောင်ရန် အကောင်းဆုံးအချိန်တစ်ချိန်ဖြစ်ကြောင်း ဆာရက်တာသာဗီဆင်က မကြာသေးမီက အင်တာဗျူးတစ်ခုအတွင်း ထုတ်ဖော်ပြောဆိုခဲ့သည်။ မြန်မာနိုင်ငံနှင့် ထိုင်းနိုင်ငံကြား ထိစပ်နေသော နယ်စပ်တစ်လျှောက်သည် ကီလိုမီတာ(၂၀၀၀)ကျော် ရှည်လျားကြောင်းသိရသည်။ ဆာရက်တာသာဗီဆင်သည် ပြီးခဲ့သည့်နှစ် ဩဂုတ်လတွင် ဝန်ကြီးချုပ်အဖြစ် စတင်တာဝန်ယူခဲ့ပြီးနောက်ပိုင်းကတည်းက မြန်မာနိုင်ငံနှင့် ထိတွေ့ဆက်ဆံမှုများစွာကို လုပ်ဆောင်ခဲ့ကြောင်းလည်းသိရသည်။