သန့်ဇင် (NSS) - ဧပြီ ၈

ရှမ်းပြည်နယ်၊ တောင်ကြီးမြို့နယ်တွင် တွဲကားတစ်စီး ဘရိတ်ပေါက်ကာ ကား(၃)စီးကို ဝင်တိုက်မှုကြောင့် လူ(၄)ဦး သေဆုံးသွားခဲ့ကြောင်း မြန်မာနိုင်ငံမီးသတ်ဖွဲ့၏ သတင်းထုတ်ပြန်ချက်များအရ သိရသည်။

ယာဉ်တိုက်မှုသည် ယမန်နေ့(ဧပြီလ ၇ရက်)၊ ညနေ ၆နာရီ ၂၅မိနစ်အချိန်ခန့်တွင် တောင်ကြီးမြို့နယ်၊ တောင်ကြီး-အေးသာယာ အဆင်းလမ်း၌ ဖြစ်ပွားခဲ့ခြင်းဖြစ်ကြောင်း သိရသည်။

အဆိုပါလမ်းအတိုင်းမောင်းနှင်လာသည် ဒေါင်ဖန်းအမျိုးအစား(၂၂)ဘီးတွဲကားသည် ဘရိတ်ပေါက်၍ တစ်ဖက်ယာဥ်ကြောမှ မျက်နှာချင်းဆိုင် မောင်းနှင်လာသော ကား(၃)စီးအား ဝင်တိုက်မှုဖြစ်ပွားခဲ့ခြင်း ဖြစ်ကြောင်း သိရသည်။

အဆိုပါယာဉ်တိုက်မှုဖြစ်စဉ်ကြောင့် စုစုပေါင်း(၁၂)ဦးအနက် အမျိုးသား(၁)ဦးနှင့် အမျိုးသမီး(၃)ဦးသေဆုံးသွားခဲ့ပြီး ကျန်(၈)ဦးမှာ ထိခိုက်ဒဏ်ရာများ ရရှိခဲ့ကြောင်း သိရသည်။

ထို့ကြောင့် သေဆုံး၊ ထိခိုက်ဒဏ်ရာရရှိသူများကို အေးမေတ္တာလူမှုကူညီရေးအသင်းနှင့် ရွှေညီအကိုလူမှုကူညီရေးအသင်းတို့က တောင်ကြီးမြို့၊ စပ်စံထွန်းပြည်သူ့ဆေးရုံသို့ ပို့ဆောင်ကူညီပေးခဲ့ကြောင်း သိရသည်။