Pika(NSS) - ဧပြီ ၈

အီရန်နှင့်ပတ်သက်ပြီး ဖြစ်ပေါ်လာနိုင်သည့် မည်သည့်အခြေအနေများကိုမဆို ကိုင်တွယ်ဖြေရှင်းရန် အစ္စရေးနိုင်ငံက အဆင်သင့်ဖြစ်နေပြီဖြစ်ကြောင်း ကာကွယ်ရေးဝန်ကြီး Yoav Gallant က ဧပြီလ(၇)ရက်နေ့တွင် ထုတ်ဖော်ပြောဆိုခဲ့သည်။

ဧပြီလ(၁)ရက်နေ့တွင် အစ္စရေး၏ တိုက်ခိုက်မှုများကြောင့် အီရန်ဗိုလ်ချုပ်ကြီးတစ်ဦး သေဆုံးခဲ့ခြင်းအတွက် လက်တုံ့ပြန်သွားမည်ဖြစ်ကြောင်း အီရန်ဘက်က ခြိမ်းခြောက်ပြောဆိုခဲ့ပြီးနောက် အစ္စရေးကာကွယ်ရေးဝန်ကြီးက ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။ အဆိုပါတိုက်ခိုက်မှုများကြောင့် အီရန်ရှိ အစ္စရေးသံရုံးများသည် လုံခြုံမှုရှိတော့မည်မဟုတ်ကြောင်း အီရန်အရာရှိတစ်ဦးက အစောပိုင်းတွင်ထုတ်ဖော်ပြောဆိုခဲ့သည်။ ထို့ပြင် အစ္စရေးနိုင်ငံဆီသို့ ပစ်ခတ်တိုက်ခိုက်နိုင်စွမ်းရှိသော လက်နက်များကို ပြသထားသည့် ရုပ်ပုံတစ်ခုကို အီရန်သတင်းအေဂျင်စီတစ်ခုက ထုတ်ပြန်ခဲ့ကြောင်းလည်းသိရသည်။

ကာကွယ်ရေးဝန်ကြီး Yoav Gallant သည် အကြီးတန်းစစ်ဘက်အရာရှိများနှင့်  စစ်ဆင်ရေးအခြေအနေများကို အကဲဖြတ်မှုများလုပ်ဆောင်ခဲ့ပြီးနောက် အစ္စရေး၏အဆင့်သင့်ဖြစ်မှုများနှင့်ပတ်သက်ပြီး ၎င်း၏ရုံးက ကြေညာချက်ထုတ်ပြန်ခဲ့ခြင်းဖြစ်ကြောင်းသိရသည်။ ၎င်း၏ရုံးက 'အကဲဖြတ်မှုတွေ လုပ်ဆောင်ပြီးတဲ့နောက်မှာတော့ ကာကွယ်ရေးဝန်ကြီး Yoav Gallant ဟာ အီရန်နဲ့ပတ်သက်ပြီး ဖြစ်ပေါ်လာနိုင်တဲ့ အခြေအနေတွေအားလုံးကို ကိုင်တွယ်ဖြေရှင်းဖို့အတွက် ပြင်ဆင်မှုတွေကို လုပ်ဆောင်ထားဖို့ ပြောခဲ့ပါတယ်။'ဟု ပြောဆိုခဲ့သည်။

ထို့ပြင် အစ္စရေးသည် အီရန်နှင့် မည်ကဲ့သို့ ဆက်ဆံရမည် သို့မဟုတ် ထိုးစစ်နှင့် ခံစစ်တို့ကို ကောင်းစွာနားလည်ကြောင်း စစ်ဦးစီးချုပ် Herzi Halevi ကပြောကြားခဲ့သည်။ ၎င်းက"အနီးကနေပဲဖြစ်ဖြစ် အဝေးကနေပဲဖြစ်ဖြစ် အီရန်ကို ဘယ်လိုလက်တုံ့ပြန်ရမလဲဆိုတာ ကျွန်တော်တို့ ကောင်းကောင်းနားလည်ပါတယ်။ ပြီးတော့ ဒေသတွင်းမှာ အမေရိကန်အပြင် အခြားမိတ်ဖက်နိုင်ငံတွေနဲ့ ပူးပေါင်းဆောင်ရွက်မှုတွေကိုလည်း လုပ်ဆောင်နေပါတယ်။”ဟုပြောဆိုခဲ့သည်။