Pearl (NSS) - ဧပြီ ၅ 

International School တက်ရောက်သည့် အချို့‌သော ကလေးများအနေဖြင့် မြန်မာဘာသာရပ် အားနည်းနေသည့် အပြင် အင်္ဂလိပ်စာဘာသာရပ်၌လည်း အခြေခံမခိုင်သည့် အခြေအနေမျိုး ကြုံတွေ့နေရကြောင်း Modern Learning Centre (MLC) ၏ CEO ဖြစ်သူ ဦးရဲဝင်းထွန်းက NP News မှတစ်ဆင့် ထောက်ပြပြောကြားသည်။ 

‘တချို့မိဘတွေက ကလေးတွေကို International School ဆိုပြီး သွားထားတဲ့အခါမှာ တချို့ကလေးတွေက ကလေးတွေရဲ့ရင်ထဲကို မြန်မာလိုတွေ၊ အဓိပ္ပာယ်တွေ ကျကျနန ရောက်မလာဘူး။ ရောက်မလာတဲ့အခါကျတော့ တချို့ကလေးတွေက စကားလုံးသိတယ်။ အဓိပ္ပာယ် မသိဘူးဖြစ်နေတာ။ နောက်တစ်ခုက သူရဲ့ပတ်ဝန်းကျင်က အင်္ဂလိပ်လိုပြောတဲ့ ပတ်ဝန်းကျင်ဆိုရင် တစ်မျိုးပေါ့နော်။ အခု ကျွန်တော်တို့ဆီမှာက ပြောတဲ့ရပ်ဝန်းက မြန်မာလို ပြောတာ။ အဲဒါကို ကလေးတွေကို ဟိုဘက်ထဲ ထည့်လိုက်တဲ့အခါကျတော့   မြန်မာစာ စကားလည်း အား နည်းသွားတယ်။ ဟိုဘက်က အင်္ဂလိပ်စာ စကားမှာလည်း ဘာဖြစ်လဲဆိုတော့ အခြေခံခိုင်ခိုင်နဲ့ တတ်လာတာ မဟုတ်ဘဲနဲ့ ပြောနိုင်တယ်။ ဆိုနိုင်တယ် ဆိုတဲ့ အဆင့်ပဲဖြစ်တာပေါ့” ဟု ဦးရဲဝင်းထွန်းက  ပြောသည်။ 

ထို့ပြင် အချို့သော International School များ၌ မေးခွန်းကိုသာ ရင်းနှီးကျွမ်းဝင်အောင်လုပ်၍ မေးခွန်းများကိုသာ နာနာဖိဖြေဆိုသည့် သဘောဖြစ်နေသည့်အတွက် ကလေးများအနေဖြင့် စကောလား ရှစ်ကောင်းကောင်းရသော် လည်း အမှန်တကယ် သွားရောက်ကျောင်းတက်ချိန်တွင် အခက်အခဲများစွာ ကြုံတွေ့ရပြီး မေဂျာပြောင်းရခြင်း၊ အဆင့်နိမ့်သည့် ကျောင်းများသို့ ပြောင်းရခြင်းများ ထပ်မံဖြစ်ပေါ်နေသည်ကို ကြုံတွေနေရကြောင်း ၄င်းက ဆက်လက်ပြောသည်။ 

‘အလှမ်းကျယ်ပြီးတော့ အလယ်လပ်တဲ့ အနေအထားမျိုးအပြင် ဒီကလေးတွေရဲ့အခြေအနေကို မိဘတွေက သေချာ မကြည့် နိုင်တာပေါ့နော်။ တချို့က အလုပ်များတာရှိတယ်။ တချို့ကျတော့လည်း သေသေချာချာနားမလည်တော့ အပြင်က ဟိုလူပြော ဒီလူပြောနေသလို လုပ်တာမျိုးတွေရှိတယ်။ ဒါက တစ်ချက်ပေါ့။ နောက်တစ်ချက်က ဒီနိုင်ငံတကာပညာရေးတွေ ဘာတွေ သွားမယ်ဆိုရင် ကိုယ်က ဆုံးခန်းတိုင်တဲ့အထိကို ဒီဟာအတွက်ကို Support လုပ်နိုင်လားပေါ့ဆိုတဲ့ အနေအထားတွေ ရှိတယ်လေ။ တချို့က ခါးလယ်က ပြတ်ကုန်တာတွေရှိတယ်။ လက်ရှိ အနေအထားအရရော၊ ဘက်ပေါင်းစုံ အရပေါ့။ အဲဒီတော့ ဟိုဘက်လည်းမမီ၊ ဒီဘက်လည်း မမီတွေ များလာတယ်’ ဟု ဦးရဲဝင်းထွန်းက  ပြောသည်။ 

International School များတွင် ပုဂ္ဂလိကပညာ ရေး ဥပဒေနှင့်အညီ မြန်မာစာ၊ မြန်မာ့ပထဝီ၊ မြန်မာ့သမိုင်း ဘာသာရပ်များကို မဖြစ်မနေသင်ကြားကြရမည်ဖြစ်ပြီး နေ့စဉ်နိုင်ငံတော်အလံအလေးပြုခြင်း၊ နိုင်ငံတော်သီချင်း သီဆိုခြင်းများ ပြုလုပ်ကြရမည် ဖြစ်ကြောင်း ပညာရေးဝန်ကြီး ဒေါက်တာညွန့်ဖေက ပြောကြားဖူးသည်။ ပြီးခဲ့သော ကာလများ၌လည်း International School များတွင် မြန်မာစာမသင်ကြားခြင်း နှင့် နိုင်တော်အလံအား အလေးမပြု ခြင်းတို့အပေါ် ဝေဖန်ပြစ်တင်ခံခဲ့ရမှုများရှိခဲ့သည်။