မြူနစ် (NSS) - မတ် ၂၈

တပ်မတော်က စစ်အုပ်ချုပ်ရေး ကြေညာထားသည့် သိန္နီမြို့နယ်တွင် ကိုးကန့်လက်နက်ကိုင်အဖွဲ့ MNDAA နှင့် ရှမ်းလက်နက်ကိုင်အဖွဲ့ SSPP တို့ကြား တိုက်ပွဲဖြစ်ပွားခဲ့ကြောင်း သတင်းရရှိသည်။

MNDAA အဖွဲ့နှင့် SSPP အဖွဲ့တို့သည် မတ် ၂၆ ရက်နှင့် ၂၇ ရက်တို့တွင် ရှမ်းပြည်နယ်မြောက်ပိုင်း၊ သိန္နီမြို့နယ်၊ နမ့်စလပ်ကျေးရွာအုပ်စုနှင့် စယ်အူကျေးရွာအုပ်စုအတွင်း၌ ထိတွေ့တိုက်ပွဲ ဖြစ်ပွားခဲ့ခြင်းဖြစ်ကြောင်း သိရသည်။

ကိုးကန့်လက်နက်ကိုင်အဖွဲ့ MNDAA သည် ဒရုန်းဖြင့် SSPP စစ်ကြောင်းကို စတင်တိုက်ခိုက်ခဲ့ခြင်းဖြစ်သည့်အတွက် နှစ်ဖက်တိုက်ပွဲဖြစ်ပွားခဲ့ရခြင်းဖြစ်ကြောင်း SSPP အဖွဲ့က သတင်းထုတ်ပြန်ထားသည်။

ထို့ပြင် MNDAA မှ အင်အား (၂၀၀)ခန့်ရှိသောအဖွဲ့သည် SSPP ၏ အထူးတပ်စခန်းတစ်ခုကို တိုက်ခိုက်ရေးဒရုန်းဖြင့် အကြိမ်ပေါင်း (၅၀)ကျော် ဗုံးကြဲကာ ထိုးစစ်ဆင်တိုက်ခိုက်ခဲ့သည်လည်းဟု ထုတ်ပြန်ထားသည်။ ထိုသို့ MNDAA ၏ ထိုးစစ်ဆင်တိုက်ခိုက်မှုအပေါ် SSPP က ခုခံကာကွယ်သည့်အနေအထားဖြင့်သာ တိုက်ခိုက်ခဲ့ပြီး တိုင်းရင်းသား အချင်းချင်းပြန်လည်သင့်မြတ်ရေးကို ရှေးရှုကာ တွေ့ဆုံဆွေးနွေးမှုလမ်းစဉ်ဖြင့် ပြဿနာများကို ဖြေရှင်းသွားနိုင် ရန် ကြိုးပမ်းဆောင်ရွက်သွားမည်ဟုလည်း အသိပေးထုတ်ပြန်ထားသည်။

ယင်းကဲ့သို့ တွေ့ဆုံဆွေးနွေးရေးလမ်းစဉ်ဖြင့် လုံးဝဖြေရှင်း၍မရပါက SSPP အနေဖြင့် ထိရောက်စွာ ပြန်လည်တုံ့ပြန်သွားမည်ဟုလည်း ကြေညာထားသည်။ ယခုကဲ့သို့ တိုက်ပွဲဖြစ်ပွားခဲ့သော သိန္နီမြို့နယ်သည် တပ်မတော်က စစ်အုပ်ချုပ်ရေးကြေညာထားသော မြို့နယ်တစ်ခုလည်း ဖြစ်သည်။