Pika (NSS) - မတ် ၂၈

ယီမင်အခြေစိုက် ဟူသီလက်နက်ကိုင်အဖွဲ့က ပင်လယ်နီအတွင်းရှိ အမေရိကန်စစ်သင်္ဘောဆီသို့ ဦးတည်ပစ်လွှတ်လိုက်သော ဒရုန်း(၄)စင်းကို အောင်မြင်စွာပစ်ချခဲ့ကြောင်း အမေရိကန်စစ်တပ်က မတ်လ(၂၇)ရက်တွင် ထုတ်ဖော်ပြောဆိုခဲ့သည်။

အမေရိကန်တပ်ဖွဲ့များသည် မတ်လ(၂၇)ရက်၊ နံနက်(၂)နာရီတွင် ဟူသီလက်နက်ကိုင်အဖွဲ့ပစ်လွှတ်လိုက်သော တာဝေးပြေးဒရုန်းလေးစင်းကို ပစ်ချနိုင်ခဲ့ကြောင်း အမေရိကန်ဗဟိုကွပ်ကဲမှုဌာနချုပ်က ထုတ်ပြန်ပြောကြားခဲ့သည်။ ထုတ်ပြန်ချက်တွင် 'ဒီဒရုန်းတွေဟာ ဒေသတွင်းမှာရှိတဲ့ ကုန်တင်သင်္ဘောတွေနဲ့ အမေရိကန်စစ်သင်္ဘောတွေကို အန္တရာယ်ပြုလာနိုင်တာကြောင့် ဖျက်ဆီးပစ်ခဲ့တာပါ။ လွတ်လပ်စွာရေကြောင်းသွားလာမှုကို ကာကွယ်ဖို့၊နိုင်ငံတကာရေပိုင်နက်ကို လုံခြုံအောင်လုပ်ဆောင်ဖို့၊ အမေရိကန်စစ်သင်္ဘောတွေနဲ့ကုန်တင်သင်္ဘောတွေရဲ့ လုံခြုံရေးကို အာမခံနိုင်ဖို့အတွက် ဒီလိုမျိုးဖျက်ဆီးပစ်ခဲ့တာပါ'ဟု ရေးသားထားသည်။ 

အစ္စရေး-ဟားမက်စစ်ပွဲကို ဆန့်ကျင်သည့်အနေဖြင့် ယီမင်အခြေစိုက်ဟူသီလက်နက်ကိုင်အဖွဲ့သည် ပြီးခဲ့သည့်နှစ် နိုဝင်ဘာလ(၁၉)ရက်မှစတင်ပြီး ပင်လယ်နီအတွင်းသွားလာနေသော ကုန်တင်သင်္ဘောများကို ဒရုန်းများ၊ ဒုံးကျည်များဖြင့် စတင်ပစ်မှတ်ထားတိုက်ခိုက်ခဲ့ကြောင်း သိရသည်။ ဟူသီလက်နက်ကိုင်အဖွဲ့၏ တိုက်ခိုက်မှုများကြောင့် သင်္ဘောကုမ္ပဏီများသည် ၎င်းတို့၏သင်္ဘောများကို ရှည်လျားသော ရေကြောင်းလမ်းဖြစ်သည့် အာဖရိက တောင်ပိုင်းတစ်ဝိုက်သို့ လမ်းကြောင်း ပြောင်းခိုင်းခဲ့ပြီး ပို့ဆောင်ခမြင့်မားခြင်းနှင့် ပို့ဆောင်မှုနှောင့်နှေးခြင်းတို့ကြောင့် ကမ္ဘာ့ကုန်သွယ်မှုကို အနှောင့်အယှက်ဖြစ်စေခဲ့ကြောင်း သိရသည်။ ဟူသီလက်နက်ကိုင်အဖွဲ့၏ ကုန်တင်သင်္ဘောများကို ပစ်မှတ်ထားတိုက်ခိုက်မှုများအား လက်တုံ့ပြန်သည့်အနေဖြင့် အမေရိကန်နှင့်ဗြိတိန်တပ်ဖွဲ့တို့သည် ယီမင်နိုင်ငံရှိ ဟူသီလက်နက်ကိုင်အဖွဲ့၏ ပစ်မှတ်များကို လေကြောင်းမှ တိုက်ခိုက်မှုများ ဆက်တိုက်လုပ် ဆောင်ခဲ့ကြောင်း သိရသည်။