ရောင်နီ (NSS) - မတ် ၂၈

           တောင်ကိုရီးယား K-pop မိန်းကလေးအဖွဲ့ T-ara ရဲ့ အဖွဲ့ဝင်ဟောင်းတစ်ယောက်ဖြစ်တဲ့ Areum ဟာ မတ်လ ၂၇ ရက် နံနက်အစောပိုင်းက မိမိကိုယ်ကို သတ်သေဖို့ ကြိုးပမ်းခဲ့ပြီး ဒဏ်ရာကြောင့် ဆေးရုံတင်ထားရတယ်လို့ သိရပါတယ်။ 

             တောင်ကိုရီးယား မီဒီယာ Osen ရဲ့ အဆိုအရ Lee Areum ဟာ အဆိုပါကိစ္စ  ကြောင့် ဆေးရုံမှာ ဆေးကုသမှုခံယူနေရပေမယ့် သတိပြန်လည် မလာသေးဘူးလို့ သိရပါတယ်။ သူမဟာ ကိုယ့်ကိုယ်ကိုယ် သတ်သေဖို့ မကြိုးစားခင် သေတမ်းစာတစ်စောင် ရေးထားခဲ့တာတော့ရှိပြီး အခြားအသေးစိတ် အချက်အလက်တွေကိုတော့ မသိရသေးပါဘူး။ အသက် ၂၉ နှစ်အရွယ် Areum ဟာ စီးပွားရေးသမား ကင်ယောင်းဂျယ်နဲ့ လက်ထပ်ခဲ့ပြီးနောက် ၄ နှစ်အတွင်း အိမ်တွင်းအကြမ်းဖက်မှု ခံခဲ့ရတယ်လို့ မကြာသေးခင်က သတင်းရင်းမြစ်များအရ သိရပါတယ်။ မတ်လ ၂၅ ရက်ကလည်း  သူမက Instagram ပို့စ်တစ်ခုနဲ့အတူ ခင်ပွန်းဟောင်းဖြစ်သူ မစ္စတာကင်မ်ဟာ ငွေကြေးထောက်ပံ့ဖို့ ငြင်းဆန်ခြင်း၊ ကလေးတွေကို လျစ်လျူရှုခြင်း၊ လောင်းကစား၊ ပြည့်တန်ဆာလုပ်ငန်း လုပ်ခြင်း၊ ကလေးတွေရှေ့ စော်ကားခြင်း၊ နှိပ်စက်ခံထားရတဲ့ ဒဏ်ရာများ စတဲ့ သူမခံစားရသမျှ အကြောင်းအရာတွေကို ပရိသတ်တွေကို အသိပေး ပြောကြားခဲ့တာ ဖြစ်ပါတယ်။

          Areum ဟာ T-ara အဖွဲ့ကို ၂၀၁၂ ခုနှစ်မှာ ဝင်ရောက်ခဲ့ပြီး ၂၀၁၃ ခုနှစ်မှာ နှုတ်ထွက်ခဲ့ပေမယ့် အဖွဲ့ရဲ့အရေးပါတဲ့ member တစ်ယောက် ဖြစ်ခဲ့ပါတယ်။