Pika (NSS) - မတ် ၂၇

ဂါဇာကမ်းခြေတွင် လေယာဉ်များပေါ်မှ လေထီးဖြင့်ချပေးသော အကူအညီအထုပ်များဆီသို့ ရောက်ရှိရန်ကြိုးပမ်းကြစဉ်အချိန်အတွင်း လူ(၁၂)ဦးရေနစ်သေဆုံးခဲ့ကြောင်း ပါလက်စတိုင်းကျန်းမာရးအာဏာပိုင်များက မတ်လ(၂၆)ရက်တွင် ထုတ်ဖော်ပြောဆိုခဲ့သည်။

ထို့ပြင် ဂါဇာကမ်းမြောင်ဒေသတွင် အငတ်ဘေးကြုံတွေ့နေရမှုများနှင့် ပတ်သက်ပြီး စိုးရိမ်မှုများလည်း ပိုမိုမြင့်တက်လာခဲ့ကြောင်းသိရသည်။ လေကြောင်းမှချပေးသော အကူအညီအထုပ်များကျလာချိန်တွင် ဂါဇာကမ်းမြောင်ဒေသမြောက်ပိုင်း Beit Lahia မြို့ရှိ ကမ်းခြေသို့ လူအများအပြား ပြေးသွားကြသည်ကို ရိုက်တာသတင်းဌာနက ဖော်ပြထားသော ဗီဒီယိုဖိုင်တွင် တွေ့မြင်ခဲ့ရသည်။ ရေထဲတွင် ရပ်နေသောလူများနှင့်သေဆုံးသူများ၏ရုပ်အလောင်းကို ကမ်းခြေသို့ဆွဲခေါ်လာသူများကိုလည်း အဆိုပါဗီဒီယိုဖိုင်တွင် တွေ့မြင်ခဲ့ရသည်။

မတ်လ(၂၅)ရက်တွင် ဂါဇာကမ်းမြောင်ဒေသသို့ လေကြောင်းမှချပေးသည့် အကူအညီအထုပ်(၁၈)ခုအနက် (၃)ခုသည် လေထီးချို့ယွင်းမှုကြောင့် ရေထဲသို့ကျသွားခဲ့ကြောင်း အမေရိကန်စစ်ဌာနချုပ်ပင်တဂွန်က ပြောကြားခဲ့သည်။ သို့သော်လည်း အဆိုပါအကူအညီအထုပ်များဆီသို့ ရောက်ရှိရန်ကြိုးပမ်းခဲ့သူများ သေဆုံးမှု ရှိ/မရှိဆိုသည့်အချက်ကို လက်ရှိအချိန်အထိ ရှင်းရှင်းလင်းလင်းမသိရှိရသေးကြောင်း ပင်တဂွန်က ပြောကြားခဲ့သည်။

ကမ်းခြေတွင် ရပ်နေသည့် အမျိုးသားတစ်ဦးက 'ဒီအမျိုးသားဟာ သူ့ရဲ့ကလေးတွေအတွက် အစားအစာရရှိဖို့ ရေထဲကို ကူးသွားခဲ့ပါတယ်။ ကံမကောင်းစွာနဲ့ပဲ သူကရေနစ်သေဆုံးသွားခဲ့ပါတယ်။ အကူအညီတွေ ပေးနေတဲ့နိုင်ငံတွေဟာ ဒီအကူအညီအထုပ်တွေကို ကုန်းလမ်းကနေပဲ ပေးသင့်ပါတယ်။ သူတို့ ကျွန်တော်တို့အပေါ် ဘာလို့ ဒီလိုလုပ်ရတာလဲ'ဟု ပြောဆိုခဲ့သည်။