Pearl (NSS) - မတ် ၂၇

အလုပ်အကိုင်အခွင့်အလမ်းအသစ်တစ်ခုဖြစ်ပြီး နိုင်ငံခြားငွေရရှိသော အမျိုးသမီးသင်္ဘောသား အလုပ်အကိုင်ကို စိတ်ဝင်စားသူများပြားနေကြောင်း မြန်မာနိုင်ငံပင်လယ်ကူးသင်္ဘောသား အလုပ်သမားများအဖွဲ့ချုပ်(MSF)မှ ဥက္ကဋ္ဌ ကပ္ပတိန်စိုးမင်းအောင်၏ ပြောကြားချက်အရသိရသည်။ 

“ သိထားတဲ့စာရင်းအရဆိုရင်သင်တန်းတက်ပြီးသား အမျိုးသမီးသင်္ဘောသား၊သင်္ဘောသား Passport ထုတ်ပြီးသား အမျိုးသမီးသင်္ဘောသားစုစုပေါင်း(၆၀ဝ)ကျော်လောက်ရှိတယ်လို့သိရတယ်။ (၆၀ဝ)ဆိုတာက သင်တန်းလည်းတက်ပြီးပြီ။ မြန်မာပြည်က CDC လည်းလျှောက်ပြီးသား။ မြန်မာ Seaman Passport ကိုလည်း ထုတ်ပြီးသား” ဟု ၎င်းကပြောသည်။ 

အမျိုးသမီးသင်္ဘောသားများအနေဖြင့် ခရီးသည်တင်သင်္ဘော၊ အပျော်စီးသင်္ဘောများတွင် ဝန်ထမ်းအဖြစ် အလုပ်လုပ်ကိုင်လျက်ရှိကာ လက်ရှိတွင် ပို့ဆောင်ဆက်သွယ်ရေးဝန်ကြီးဌာန၊ ရေကြောင်း ပို့ဆောင်ရေး ညွှန်ကြားမှုဦးစီးဌာနအနေဖြင့် ကုန်တင်သင်္ဘောများတွင် မြန်မာအမျိုးသမီးသင်္ဘောသားများကို အလုပ်လုပ်ကိုင်ရန် ခွင့်ပြုထားခြင်း မရှိသေးကြောင်း သိရသည်။ 

“ အပျော်စီးသင်္ဘောတွေကို လိုက်နိုင်တဲ့ အမျိုးသမီးကတော့ (၃၀ဝဝ)လောက်ရှိပါတယ်။ လောလော ဆယ်တော့ (၃၀ဝဝ) လုံး သင်္ဘောမှာ ရောက်ချင်မှရောက်မယ်။ နားတဲ့လူလည်းရှိမယ်။ အလုပ်လုပ်နေတဲ့ လူလည်း ရှိမှာပေါ့နော် ” ဟု ၎င်းက ဆက်လက်ပြော သည်။ 

မြန်မာအမျိုးသမီးသင်္ဘောသားများသည် သင်္ဘောပေါ်၌ စားသောက်ဆိုင်၊ စားဖိုဆောင်နှင့် အခန်းတွင်း သန့်ရှင်းရေး လုပ်ငန်းများတွင် လုပ်ကိုင်နေလျက်ရှိကာ ရာထူးအဆင့်အလိုက် တစ်လလျှင် အမေရိကန်ဒေါ်လာ (၈၀ဝ)မှ (၁၀ဝဝ)ကြားရရှိပြီး လက်ရှိတွင် စိတ်ဝင်စားမှုများပြားနေကြောင်းလည်း ကပ္ပတိန် စိုးမင်းအောင်၏ ပြောကြားချက်အရ သိရသည်။