Pika (NSS) - မတ် ၂၇

ပါကစ္စတန်နိုင်ငံ အနောက်မြောက်ပိုင်းရှိ ရေကာတာစီမံကိန်းအတွက် လုပ်ဆောင်နေသော တရုတ်အင်ဂျင်နီယာများလိုက်ပါလာသည့် ယာဉ်တန်းကို အသေခံဗုံးခွဲသမားတစ်ဦးက ကားဖြင့်ဝင်တိုက်ကာ အသေခံဗုံးခွဲခဲ့ခြင်းကြောင့် လူ(၆)ဦးသေဆုံးခဲ့ကြောင်း ရဲတပ်ဖွဲ့ကပြောကြားခဲ့သည်။

အဆိုပါတိုက်ခိုက်မှုသည် ပါကစ္စတန်နိုင်ငံတွင် ယခုသီတင်းပတ်အတွင်း တရုတ်၏ အကျိုး စီးပွားကို ပစ်မှတ်ထားသည့် တတိယအကြိမ်မြောက်တိုက်ခိုက်မှုတစ်ခုဖြစ်ကြောင်းလည်းသိရသည်။ ယခင်တိုက်ခိုက်မှုနှစ်ခုမှာ အခြေခံအဆောက်အအုံ ပရောဂျက်များတွင် တရုတ်နိုင်ငံက အမေရိကန်ဒေါ်လာဘီလျံပေါင်းများစွာ ရင်းနှီးမြှုပ်နှံထားသည့် ဘလိုချီစတန်ပြည်နယ်ရှိ တရုတ်က အသုံးပြုနေသော မဟာဗျူဟာမြောက်ဆိပ်ကမ်းတစ်ခုနှင့် ပါကစ္စတန်ရေတပ်၏ လေတပ်အခြေစိုက်စခန်းတို့ကို ပစ်မှတ်ထားတိုက်ခိုက်ခဲ့ခြင်းဖြစ်ကြောင်းသိရသည်။

တရုတ်အင်ဂျင်နီယာများသည် Islamabad မြို့မှ Khyber Pakhtunkhwa ပြည်နယ် Dasu မြို့ရှိ ဆောက်လုပ်ရေးလုပ်ငန်းခွင်သို့ သွားနေသည့်အချိန်တွင် ယခုကဲ့သို့ တိုက်ခိုက်ခံခဲ့ရခြင်းဖြစ်ကြောင်း ဒေသတွင်းရဲမှူးချုပ် Mohammad Ali Gandapur ကပြောကြားခဲ့သည်။၎င်းက 'ဒီတိုက်ခိုက်မှုအတွင်း ပါကစ္စတန်နိုင်ငံသားယာဉ်မောင်းနဲ့ တရုတ်နိုင်ငံသား(၅)ဦးတို့ သေဆုံးခဲ့ပါတယ်'ဟု ပြောဆိုခဲ့သည်။ Dasu မြို့သည် အဓိကဆည်ကြီးတစ်ခု၏ နေရာဖြစ်ပြီး ယခင်ကတည်းက တိုက်ခိုက်မှုများကိုခံခဲ့ရခြင်းဖြစ်ကြောင်းသိရသည်။ ၂၀၂၁ ခုနှစ်တွင် ဘတ်စ်ကားတစ်စီးပေါက်ကွဲခဲ့ခြင်းကြောင့် တရုတ်နိုင်ငံသား(၉)ဦးအပါအဝင် လူ(၁၃)ဦးသေဆုံးခဲ့ဖူးကြောင်းသိရသည်။

မတ်လ(၂၆)ရက်က ဖြစ်ပွားခဲ့သော တိုက်ခိုက်မှုနှင့်ပတ်သက်ပြီး တာဝန်ရှိသည်ဆိုသည့်အချက်များကို မည်သည့်အကြမ်းဖက်အဖွဲ့အစည်းကမှ ထုတ်ပြန်ပြောဆိုခြင်းမျိုးမရှိသေးကြောင်းသိရသည်။