ဂျန်ဇက် (NSS) - မတ် ၂၆

အစ္စရေးဝန်ကြီးချုပ်နေတန်ရာဟုဟာ ဂါဇာစစ်ပွဲနဲ့ပတ်သက်ပြီး တွေ့ဆုံဆွေးနွေးမှုတွေလုပ်ဆောင်ဖို့  အမေရိကန် နိုင်ငံကို ကိုယ်စားလှယ်အဖွဲ့စေလွှတ်မယ့် အစီအစဉ်ကို  ဖျက်သိမ်းလိုက်ကြောင်း သိရပါတယ်။ 

ကုလသမဂ္ဂလုံခြုံရေးကောင်စီမှာ ဂါဇာစစ်ပွဲနဲ့ပတ်သက်ပြီး အမေရိကန်နိုင်ငံက ကြားနေမဲ ပေးခဲ့ပြီးနောက် အစ္စရေး ဝန်ကြီးချုပ်က အခုလိုမျိုးဆုံးဖြတ်ခဲ့တာဖြစ်ပါတယ်။ အစ္စရေးဝန်ကြီးချုပ်က အမေရိကန်နိုင်ငံကို အစ္စရေး ကိုယ်စားလှယ်အဖွဲ့စေလွှတ်တော့မှာ မဟုတ်ကြောင်း ပြောပါတယ်။

အစ္စရေးဝန်ကြီးချုပ်က "အမေရိကန်ဟာ ကုလသမဂ္ဂလုံခြုံရေးကောင်စီမဲခွဲဆုံးဖြတ်ရာမှာ ဗီတိုအာဏာ အသုံးပြု တာမျိုးမရှိခဲ့ဘူး။ အမေရိကန်ဟာ ဂါဇာစစ်ပွဲစတင်ခဲ့ပြီးနောက်ပိုင်း ရပ်တည်ချက်တွေ ပြောင်းလဲသွားတာကို ရှင်းရှင်းလင်းလင်းပြသလိုက်တာဖြစ်တယ်။ ဟားမက်စ်အဖွဲ့ဟာ ပြန်ပေးဆွဲထားသူတွေ ပြန်မလွှတ်ဘဲ အပစ်ခတ် ရပ်စဲရေးရယူနိုင်အောင် နိုင်ငံတကာဖိအားတွေကို အသုံးချဖို့ မျှော်လင့်ခဲ့တယ်" လို့ ပြောပါတယ်။ 

အစ္စရေးဝန်ကြီးချုပ်က အမေရိကန်ဟာ ဂါဇာအရေးနဲ့ပတ်သက်ပြီး ကုလသမဂ္ဂလုံခြုံရေးကောင်စီမှာ မဲခွဲ ဆုံးဖြတ်ချိန်အတွင်း အမေရိကန်နိုင်ငံကို ဗီတိုအာဏာအသုံးပြုဖို့ တောင်းဆိုခဲ့ကြောင်း သိရပါတယ်။ အမေရိကန် နိုင်ငံအနေနဲ့ ဗီတိုအာဏာ အသုံးပြုမှုမရှိဘူးဆိုရင် ဂါဇာအရေးဆွေးနွေးဖို့ အစ္စရေးကိုယ်စားလှယ်အဖွဲ့ကို အမေရိကန်နိုင်ငံကို စေလွှတ်မှာမဟုတ်ဘူးလို့လည်း ပြီးခဲ့တဲ့ရက်ပိုင်းမှာ ပြောခဲ့ပါတယ်။ အမေရိကန်အစိုးရ ပြောရေးဆိုခွင့်ရှိသူတစ်ဦးကတော့ အစ္စရေးဝန်ကြီးချုပ်ရဲ့ထုတ်ပြန်ချက်တွေကို အံအားသင့်မိကြောင်း ပြောပါတယ်။ 

အပစ်ခတ်ရပ်စဲရေးနဲ့ ဖမ်းဆီးခံထားရသူတွေ ပြန်လွှတ်ပေးရေးက အမေရိကန်ရဲ့ရပ်တည်ချက်သဘောထားဖြစ်တဲ့ အတွက် ဗီတိုအာဏာမသုံးစွဲခဲ့ခြင်းဖြစ်ကြောင်း ၎င်းက ထပ်မံပြောဆိုခဲ့ပါတယ်။ အစ္စရေးက အမေရိကန်နိုင်ငံရဲ့ အကူအညီများမရဘူးဆိုရင်လည်း ဟားမက်စ်အဖွဲ့ကိုအမြစ်ပြတ်ချေမှုန်းသွားမှာဖြစ်ကြောင်း ပြီးခဲ့တဲ့ရက်ပိုင်းက သတင်းထုတ်ပြန်ထားပါတယ်။