သန့်ဇင် (NSS) - မတ် ၂၆

ဧရာဝတီတိုင်း၊ လပွတ္တာမြို့တွင် ဝါယာရှော့မှတစ်ဆင့် မီးလောင်မှုဖြစ်ပွားကာ လူနေအိမ်(၂၆)လုံး မီးလောင်ဆုံးရှုံး ခဲ့ပြီး မီးဘေးသင့် (၁၀၀)ကျော်ကို စောင့်ရှောက်မှုများပေးထားကြောင်း လပွတ္တာမြို့နယ်ကြက်ခြေနီသူနာပြု တပ်ဖွဲ့ထံမှ သိရသည်။

မီးလောင်မှုသည် ယမန်နေ့(မတ်လ ၂၅ ရက်)၊ မွန်းလွဲ ၃ နာရီ ၃ဝ မိနစ်အချိန်ခန့်တွင် လပွတ္တာမြို့၊ ၈ ရပ်ကွက်တွင် ဖြစ်ပွားခဲ့ခြင်းဖြစ်ကြောင်း သိရသည်။

“မီးလောင်တာက ဝါယာရှော့ကနေ လောင်တာလို့ သိရတယ်။ အဲဒီအိမ်မှာက လူကြီးတွေ မရှိချိန်ပေါ့။ ကလေးတွေ ချည်း အိမ်မှာ ရှိနေတာကနေ လျှပ်စစ်မီးက ဝိုင်ယာရှော့ဖြစ်ပြီးလောင်တာ။ ဓနိ၊ ထရံကာအိမ်တွေဆိုတော့ မီးလာင်လွယ်ပြီး အိမ်ခြေ(၂၆)လုံး ပါသွားတယ်။ အိမ်ခြေကလည်း စိတ်တော့ မီးလောင်တာများသွားတာပါ” ဟု လပွတ္တာမြို့နယ် ကြက်ခြေနီသူနာပြုတပ်ဖွဲ့မှ တာဝန်ရှိသူတစ်ဦးက NP News ကို ပြောသည်။

အဆိုမီးလောင်မှုဖြစ်စဉ်တွင် လူထိခိုက်မှုမရှိခဲ့သော်လည်း လူနေအိမ်(၂၆)လုံး မီးလောင်ဆုံးရှုံးသွားခဲ့ပြီး မီးဘေးသင့် ပြည်သူ(၁၁၂)ဦးထိ ရှိခဲ့ကြောင်း သိရသည်။

ထို့နောက် ၎င်းမီးလောင်မှုကို လပွတ္တာခရိုင် နှင့် မြို့နယ်မီးသတ်တပ်ဖွဲ့အပြင် အခြားပရဟိတအသင်းများ စုပေါင်း ကာ (၄၅)မိနစ်ခန့်အကြာ သွားရောက်မီးငြှိမ်းသတ်ခဲ့ကြောင်း သိရသည်။

လက်ရှိတွင် အဆိုပါမီးဘေးသင့်ပြည်သူများကို အနီးနားရှိ မူလတန်းကျောင်းတွင် နေရာချထားပြီးလိုအပ်သည့် စောင့်ရှောက်မှုများ ပေးထားကာ သက်ဆိုင်ရာအဖွဲအစည်းများနှင့် ပုဂ္ဂလိက လှူဒါန်းမှုများလည်း ဆက်လက်လုပ် ဆောင်လျက်ရှိကြောင်း သိရသည်။